Read Navajo JOB 21 Bible Online

JOB 21 - Navajo bible

JOB 21

¹Ákohgo Job ánááhodoo'niidgo ání,

²Kodóó ánihidishníinii hazhó'ó deísółts'ą́ą'go díí bee hada'íínółníi doo.

³Haa'íyee' nihich'į' hadeesdzih biniyé shadi'noh'aah, áko ałtso nihich'į' haasdzíi'go índa shá nináádahołt'i'go t'áá áko.

⁴Da' shíísh diné bich'į' ák'e'eshdlí? Ha'át'éegoshą' doo ha'ííníshníi da doo?

⁵T'óó shik'ee nihił adahayóigo aadę́ę́' dashinół'į́, áádóó nihizéé' dádadinołnííh.

⁶Nitsískeesgo k'asdą́ą́' bik'ee tsíńdísyis áádóó shitah anáhodi'niitłi'.

⁷Ha'át'íísh biniyé diné doo yá'ádaashóonii dahiná áádóó ayóó ádabóodziil nidahaleehgo są́ yaa da'iiłdįįh?

⁸Ba'áłchíní daniyéego dabinááł yee ák'indadikai dooleełii yaa nídahidiikááh, áádóó ba'áłchíní da'ahílchíihii dabinááł ákót'éego dahiná.

⁹Dabighangóó doo bił daayéé'góó hazhó'ó hasht'edadít'éego kéédahat'į́ índa Diyin God doo atíbíléeh da.

¹⁰Dabidóola éí doo át'éhígóó bá nida'iichííh; béégashii éí doo bitsą́ hada'ii'eeł da.

¹¹Dibé nidanilkaadii nahalingo ba'áłchíní tł'óó'góó yéé'éłnih, áko naanída'ílzhíísh.

¹²Ásaa' yilghaałígíí índa tsin tł'óół bąąh daneelzhee'go bee nida'a'néii nideidiiniłgo tsin bee í'dílzoołí yaa bił nidahoozhǫǫh łeh.

¹³At'į́ yee ákidaadláago nidabííłka' áádóó jineesk'ołígíí nahalingo łeeh dabidii'nííł.

¹⁴Éí bąą Diyin God ádeiłní, Nihits'á nínááh; nik'ehgo dahonít'i'ii nihił béédahodoozįįłígíí doo daniidzin da.

¹⁵Aláahgo Ayóó'ábóodziilii ha'át'íísh át'éego bich'į' nidahwiidláa doo? Bich'į' sodadiilzingo ha'át'íísh nihá íidoodił?

¹⁶Jó, bidziilgo dah da'jíléhígíí éí doo bee hódahólníih da; diné doo yá'ádaashóonii kót'éego dajinínígíí éí ts'ídá doo shídéét'i' da!

¹⁷T'áá ahą́ą́h diné doo yá'ádaashóonii bits'ą́ą́' bee hool'iní dahiniltséés índa atídabi'dil'į́! Diyin God éísh báháchį'ii bik'ehgo adiniih neiłniih?

¹⁸T'áá ahą́ą́h níyol bidááhgóó tł'oh naadą́ą́' bitsǫz nihidíl'áhígi át'éego hoł nídahidiiyóół, índa azhool bił yóó'adahayółígíí nidahojílin!

¹⁹Diné doo ákwii ájíít'įįdii Diyin God ha'áłchíní yá hasht'e'niyiinííł, dadohní. T'áá hó k'ééhodidoodlííł, áko hoł bééhózin doo.

²⁰Atídahodi'doolníłígíí háni'dii t'áá hó deizdoołtsééł, áádóó Aláahgo Ayóó'ábóodziilii t'óó báhádzidgo bibee atí'él'íinii jidoodlį́į́ł.

²¹Jó, ákwíí hwee nínáádidooziłii hats'ą́ą́' nahjį' kólyaago dadziztsą́ą́dóó bik'ijį' ha'áłchíní doo baa hoł nááhójǫ́ǫ da doo.

²²Diyin God yá'ąąshdi dahólóonii yaa nídóot'įįłgo ła'daásh ił ééhózinii bínabizhdínóołtįįł?

²³Ła' t'ahdii hadziilgo hoł hasht'ehodít'éego áádóó hwiih jílį́įgo dazdootsaał.

²⁴Be'abe' bee ída'azįįd índa biwolda daashzhoh.

²⁵Diné náánáła' ádił nitsidoodáałgo bił niiłch'iihgo dadootsaał. Yá'át'éehii ts'ídá t'áadoo yizlįh da dooleeł.

²⁶Éí diné t'áá áłah łeeh bidi'doo'niłgo ch'osh bił dínóoyił.

²⁷Jó, nihintsíkees danilíinii shił bééhózin índa doo ákǫ́ǫ́ ádahodiilníił da, danohsingo shiyada'oohłeehígíí baa ákonisin.

²⁸Áko ádadohní, Háadiyee' naat'áanii bighan si'ą́? Háadiyee' diné doo yá'ádaashóonii níbaal yii' kéédahat'íinii naaznil?

²⁹Da'nítiingóó diné deíkáhígíísh doo nidabídółkid da? Índa yee nihił nídahoolne'ígíísh t'áadoo baa ákodanoozį́į' da?

³⁰Éí diné doo yá'ádaashóonii atí'oolnííł bá áá bi'dilzįįh. T'óó báhádzidgo bee atí'él'íinii beidoołkáałjį' ats'ádabidi'doo'nił.

³¹Éí ádáát'įįdígíí t'áá dabinii'jį' háísh yee bił hodoolnih? Yaa naaskaii biniinaa háí k'éébididoodlííł?

³²Łe'ii'níiłgi yiltééh áádóó yóó'ábi'diil'įįhgo ła'da yik'i ha'ídées'į́į́'.

³³Honíts'aa'gi bisígíí bił ayóó áhoot'éego yóó'abi'didoolnííłgóó yiltéełgo diné t'áá át'é bikéé' nooyéeł łeh, índa bitsijį' nidahaaskaígíí doo jóołta' ánéelą́ą' da.

³⁴T'áadoo biniyéhígóó bee shich'į' yádaałti'ígíishą' hait'éego bee ha'íídéeshniił? Aadę́ę́' bee shich'į' háádahisoohdzí'ígíí t'áá ałtso wooch'ííd t'éiyá ádaat'é.