Read Navajo JOB 22 Bible Online

JOB 22 - Navajo bible

JOB 22

¹Ákohgo Tííman kin haal'áádóó Élifaz wolyéii ánááhodoo'niidgo ání,

²Diné hóyáanii t'áá bí ádá ílíinii íidoolíłígi át'éego ła'daásh Diyin God bá ílíinii ázhdoolíiłgo bízhneel'ą́?

³Diné t'áá ákogi át'éii nílį́įgoósh bee Aláahgo Ayóó'ábóodziilii bił honíshǫ́ǫ dooleeł? Ts'ídá t'áadoo iisihí hazhó'ó yínáałgo í'diinilyaaígíísh bee bá bilááh nídoodleeł?

⁴Diyin God díínísinígíísh biniinaa nididooteh, áádóó hóyée'go naa nídóot'įįł?

⁵Ayóó át'éego doo yá'áshónígi yee' íínít'įįd áádóó doo ákwii ááníłígíí yee' t'áá náás yíłt'ih.

⁶Jó, nik'éí bąąh háíníł'áhígíí yee' t'áadoo biniyéhígóó nich'į' niná'doodlééł. Nee áchą́'íídéeni'go t'áadoo yił hanáádadólchídígóó t'áá daalchí'ígo íinilaa.

⁷Diné ch'ééh deeyáago t'áadoo tó ła' béíníką́ą da, índa diné dichin nilíinii t'áadoo ba'ííníłtsood da.

⁸Diné bidziilgo dah ooléełii kéyah yótą', índa diné bił ílíinii ákwii kééhat'į́.

⁹Asdzání bąąh ádahasdįįdii t'áadoo deíléhígóó níwehjį' bi'ayíníłnii'. Áłchíní bizhé'é ádaadinii bidziilę́ę bąąh ndahwííníłkaad.

¹⁰Díí bąą łoh nináhaaznil áádóó t'áadoo hooyání nił yéé' hazlį́į'go ádił hodínílchił,

¹¹doodaii' nił chahóółhélígíí bąą doo ííní'į́į da; tó yíląądgo ałtso nik'i diilkǫ'.

¹²Diyin God yee' yá'ąąsh alááh ánízáadi hólǫ́. Dego díní'į́į'go sǫ' doo deighánídi naaznilígíí níníł'į́!

¹³Áko ádíní, Diyin God hait'éegoshą' bił bééhózin? K'os diłhił biníkáádę́ę́'ésh ánihodii'aahgo yíneel'ą́?

¹⁴Bich'ą́ąhgi k'os diłhiłgo biniinaa doo ahoyoot'į́į da, áádóó yá'ąąsh yii'góó tádíghááh.

¹⁵Diné doo yá'ádaashóonii t'áá shiidą́ą'dii honít'i'góó nidaaskai yę́ęgi át'éegoósh honít'i'góó yínáał doo?

¹⁶Éí dazhdínóonéłígíí t'áadoo baa dahwiilzhíshí t'áá bítséedi nahjį' kódaho'diilyaa. Bee dadzíłdzilii yę́ę adahaaz'éél.

¹⁷Éí Diyin God ádeidííniid, Nihits'áhoníleeh. Aláahgo Ayóó'ábóodziiliishą' ha'át'íí há íidoolíiłgo yíneel'ą́?

¹⁸Azhą́ ákódaaníi nidi, dabighan góne' Diyin God yá'át'éehii há haidééłbįįd. Nidi diné doo yá'ádaashóonii kót'éego dajinínígíí shí doo shídéét'i' da.

¹⁹Diné t'áá ákogi ádaaníiłii éí dayiiłtséehgo bąą bił dahózhǫ́ǫ łeh; diné t'áadoo bee bik'ídahót'ahí daígíí haadloh bighą́ągo há nidahałt'i'

²⁰kódaaníigo, Nihi'ana'í danilíinii t'áá aaníí nahjį' kódaalyaa; binaalye'é daadziihígíí ałtso adahideezk'ą́ą́'.

²¹Diyin God bił ahééhonílzįįhgo hózhǫ́ǫgo nił haz'ą́ą doo; ákwíindzaago yá'át'éehii nee hodooleeł.

²²Nánooshkąąh, nich'į' yáłti'go bee haz'áanii yínaniniłtinígíí nídiilé, áádóó bizaad nijéí bii' hasht'e'nihidí'nííł.

²³Aláahgo Ayóó'ábóodziilii baa néínídzáago hasht'e'ninádíídááł áádóó doo ákwii é'ét'éii niníbaal sinildóó nízaadgóó ádíts'ą́ąjį' kwíinilaago,

²⁴áádóó ni'óola łeezh nahalingo yóó'anighaasgo, áádóó Óferdę́ę́' óola éí bokooh góyaa tsé áwózí bitahjį' yanáaghaasgo,

²⁵áko t'áá aaníí Aláahgo Ayóó'ábóodziilii éí niyódí nilį́į doo, áádóó nibéésh łigaii ayóo ílíinii nilį́į doo.

²⁶Índa Aláahgo Ayóó'ábóodziilii baa nił honeeni doo, áádóó Diyin God bich'į'go dídíí'įįł.

²⁷Náá'ákóne' bich'į' sodidíílzįįłgo nididoots'į́į́ł, áádóó ádee hadíínídzíi'ii bi'íílíił doo.

²⁸Baa nidíínaałgo nihidí'aahígíí ná bi'oolníił dooleeł, áádóó yínááłgóó ná i'díídíin doo.

²⁹Yaa jidínídahgo ádidííniił, De ánádahodi'doolnííł, áádóó a'ohgo ída'dólzinígíí Diyin God yisdábiinííł.

³⁰T'áadoo bee bik'ídahót'ahíii yisdáyiinííł; yá'ádaat'éehii íinilaaígíí bee yisdábiinííł.