Read Navajo JOB 23 Bible Online

JOB 23 - Navajo bible

JOB 23

¹Ákohgo Job ánááhodoo'niidgo ání,

²T'áá díí jį́ t'áá íiyisí shináháshch'íi'go saad honish'į́; dinish'nínígíí biláahgo shił nahonigaah.

³Dooládó' shił bééhózingo Diyin God bik'íjóya' laanaa da; dah sidáadi baosha' laanaa da.

⁴Ákwii Diyin God shá yaa nídóot'įįłii bee bił hodeeshnih, áádóó bił ałgha'disht'áah doo nisin.

⁵Saad yee shich'į' hááhidoodzihígíí shił bééhodoozįįł, áádóó áshididooniiłígíí bik'idi'deeshtį́į́ł nisin.

⁶Ayóó ábóodziilígíísh yee shighadi'doot'ááł? Dooda, t'áá aaníí shíídóołts'įįł.

⁷Áadi diné t'áá ákogi ááníiłii daats'í hoł ałgha'dit'áahgo yíneel'ą́; ákót'éego shi'ánihwii'aahii hool'áágóó shéé'doołnih.

⁸Jó, náás díyáago doo áadi naagháa da, índa t'ą́ą́' díyáago doo haa ákóniisįįh da;

⁹nishtł'ajígo nijilnishgi háhodíínísh'į́į' nidi, doo hwiistséeh da, índa nish'náájígo nazhnit'inígíí biniinaa doo hwiistséeh da.

¹⁰Nidi deeshááłgóó shá bił bééhózin; ałtso nashíneeztą́ą'go óola ąąh hadoolyį́'ígi át'éego ch'ídeeshááł.

¹¹Bikék'eh hashchį́į́góó nidahidishtaałgo Bóhólníihii bik'eh honish'į́įgo t'áadoo nahjį' háíyáa da.

¹²Bik'eh ó'oo'níiłii yee hahaasdzíi'ii t'áadoo bits'áníyáa da; t'áá ákónéehee shich'iyą'ígíí biláahgo saad yee shich'į' haadzí'ígíí t'áá íiyisí ílį́įgo ádííníshtą' nít'éé'.

¹³Nidi bintsíkees doo łahgo ánáyoodlíił da. Háishą' łahgo át'éego ánábidoodlííł? T'áá ádeeshłííł, néiniidzįįhígíí áyoolííł.

¹⁴Niidiní'áanii ałtso shá hadaałt'é íidoolííł; ákódaat'éii t'óó ahayóí yaa nitsíkees.

¹⁵Éí bąą bit'áahgi honishłónígíí bik'ee shił yéé'; baa nitsískeesgo t'áá íiyisí binásdzid.

¹⁶Diyin God éí doo shidziilgóó áshósin; Ayóó'ábóodziilii nilíinii bik'ee shił niníyéé',

¹⁷háálá t'ah doo shił chahałheeł yę́ędą́ą́' t'áadoo áshółdįįhí da, índa chahałheeł shik'iidooldohígíí bits'ąą t'áadoo yich'ą́ą́h nideelnii' da.