Read Navajo JOB 24 Bible Online

JOB 24 - Navajo bible

JOB 24

¹Ha'át'íí biniyé Aláahgo Ayóó'ábóodziilii anídóot'įįłii baa hoolzhiizhgo doo hasht'e'niyiiníił da, áádóó ha'át'íí biniyé anídóot'įįł bijį́įdi áhodooníłígíí diné béédahósinii ts'ídá doo bił béédahózin da?

²Diné ła' kéyah bee hoodzooígíí biniyé tsé adaaz'áago ádaalyaa yę́ę hadayiinííł; dibé naakaígíí t'áá na'níle'dii adeiniiłkaadgo t'áá bí yada'ałtso' łeh.

³Áłchíní bizhé'é ádaadinii dabitélii adeiniiłkaad; asdzání bąąh ádahasdįįdii nináda'iisdla'jį' bibéégashii ąąh nidayiinííł.

⁴Hojooba' ádeinízinii nahjį' hadeiniiłkaadgo kéyahdóó badahojoobá'íígíí ahíhiikáahgo nídahidit'įįh.

⁵Shoo, honoojíigi télii da'ałchinii nahalingo naanishgóó dahidikáahgo honoojíidi ba'áłchíní ch'iyáán yá hádaat'į́.

⁶Dá'ák'ehdi daneest'áanii náádayíiłjooł; diné doo yá'ádaashóonii bich'il na'atł'o'ii nínéiniłt'į́hígi nidahodikai.

⁷Áko bi'éé' t'áádaagééd danjahgo néílkááh; ayóó íídéesk'aazgo t'áadoo ák'ídayóltihígóó ádeile'.

⁸Dziłdi nihidahałtį́įhgo ninádaaltłoh, áádóó yiyaa adahidínóochéełii hádaat'į́įgo tsé biniit'aajį' áłah danilį́į łeh.

⁹Áłchíní bizhé'é ádaadinii bimá t'ahdii deiłt'o'go yílák'ee hadayiiłtł'iid, áádóó badahojoobá'íígíí t'áadoo ninádajódléłígóó ha'áłchíní yázhí hats'ą́ą́' ąąh nidayiinííł.

¹⁰Ha'éé' t'áádaagééd nidajikaigo dichin dajílį́įgo tł'oh naadą́ą́' bida'astł'ónígíí nidajiiyeeh.

¹¹Áliv tsin hadah hidiit'i'góó ákǫ́ǫ́ áliv bineest'ą' bik'ah hayída'iił'éesgo ak'ah biih nídaadzi'ii yiih dayiizííd; dibáá' yik'ee ti'dahooníihgo ch'il na'atł'o'ii bitoo' yąąh hadayii'éés.

¹²Kin haal'áádóó ayóó íits'a'go diné nidadi'ni', áádóó diné tídáánáanii chaał hadahoyiinííh, nidi Diyin God doo yaa ná'áhodílt'į́į da.

¹³Díí éí adinídíín yik'ijį' nidaalteehii ła' ádaat'į́; éí bik'ehgo dahonít'i'ígíí doo yéédahósin da áádóó doo yik'eh hidikáah da.

¹⁴Hool'įįhgo diné neiłtseedii nídii'nahgo diné bahojoobá'íii áádóó hojooba' ádaat'éii neiłtseed łeh, áko tł'ée'go ani'įįhii nilį́į łeh.

¹⁵Diné adiléii hiłyidoojį́łígíí yiba' át'éego, Doo ła' shiizdoołtséeł da, níi łeh, áádóó binii'jį' yik'é'éłtih.

¹⁶Tł'ée'go hooghan yigháda'anil; jį́įgo ádá nída'dilkałgo bąą adinídíín yits'ąą nida'ádí'nil.

¹⁷Háálá abínígo adididla'ígíí aniné bichaha'oh át'é nahalingo yaa nitsídaakees; bił béédahózingo aniné bichaha'oh yik'ee bił daayée' łeh.

¹⁸Tó adadziisxaalígi át'éego hoł yóó'ahodoogááł; nihokáa'gi kéédahojit'ínígóó hóyée'go bá hada'iidziih; hach'il na'atł'o'ii deíl'áhígóó doo t'áá k'ad ła' ákwii deeshnish da.

¹⁹Doo nahałtingóó áádóó hadoh éí yas too' néiłtsih; t'áá ákót'éego diné ádił nida'iisíi'ii jishcháá' nídabiłtsih.

²⁰Hamá nidi haidiyoonah; ch'osh bił jilkango dahodoolghał; ts'ídá doo hwéénínááhániih da doo, áko t'iis naa'anííkaadígi át'éego doo yá'áshǫ́ǫ́góó ááníiłii nidoot'ih.

²¹Asdzání ba'áłchíní ádinígíí doo ákǫ́ǫ́ ájííł'įįd da áádóó asdzání bąąh áhásdįįdii doo baa jijooba' da nít'éé'.

²²Diyin God bibee adziilii bee diné ayóó át'éii nidahaleehígíí ádích'į' niyii'éésh; Diyin God nídii'nahgo diné ákónízahjį' jiináa dooleełígíí doo hoł bééhózin da.

²³Hasih haz'ą́ yeidi'áahgo ák'inídiildził, nidi ádajít'éii hazhó'ó haisííd.

²⁴T'óó kónígháníjį' ayóó át'éii nidahaleeh áádóó bikéé' ádahadįįh; diné t'áá ałtso noonéłígi át'éego ajiildééh, índa tł'oh naadą́ą́' k'égishígíigi át'éego nahjį' kóho'doolnííł.

²⁵Háiyee' doo ákót'ée da dohníinii biyooch'íidiísh nishłį́įgo áshóhłééh áádóó baa yáshti'ígíísh doo ílį́į da óhłééh?