Read Navajo JOB 27 Bible Online

JOB 27 - Navajo bible

JOB 27

¹T'ah nááyówehgo Job t'ááłáhígi át'éego yááłtihgo ání,

²Ts'ídá t'áá aaníí Diyin God hiná: éí t'áá ákogi át'éego shá ha'doodzihii shits'ą́ą́' nahjį' kóyiilaa, áádóó Aláahgo Ayóó'ábóodziilii t'áá íiyisí shináháshch'íi'go áshiilaa.

³T'ah kwe'é hinishnáago áádóó Diyin God biyol bee t'ahdii nídísdzihgo kóshiilaa;

⁴éigi át'éego doo yá'áshǫ́ǫ́góó doo hadeesdzih da, doodaii' na'adlo' doo ła' bee hadeesdzih da.

⁵Dooda yéi, t'áá ákogi át'éego shaa yádaałti' ts'ídá doo nihidóshne' át'ée da; dasétsą́ bijį́įjį' doo shina'adlo'góó hinishnánígíí ts'ídá doo nahjį' nidósh'ááł át'ée da.

⁶T'áá ákogi ánísht'éhígíí t'áá shizááká yíníshtą'; doo bidideeshchił da; hinínaadę́ę́' áát'įįdígíí biniinaa shijéí doo nitseedáágóó áshósin.

⁷Shi'ana'í jílíinii háni'dii doo yá'áshóonii jileeh, áádóó atíshijiléehii háni'dii doo t'áá ákogi át'éii jileeh.

⁸Diné doo Diyin God k'ehgo ájít'éii t'áadoo le'é há bilááh silį́į' nidi, Diyin God éí hwii' sizíinii nahjį' kóyiilaagoshą' ha'át'íísh bee hoł chohoo'į́į doo?

⁹Hach'į' hodiiznáa'go sozdilzingoósh Diyin God t'áá hodidoots'į́į́ł?

¹⁰Da' t'áásh hó Aláahgo Ayóó'ábóodziilii baa hoł hózhǫ́ǫ doo? T'áásh áłahjį' Diyin God bich'į' sozdilzin doo?

¹¹Diyin God bibee adziilii bee nanihidínéeshtįįł; Aláahgo Ayóó'ábóodziilii binahat'a' doo nihits'ąą nanish'in da doo.

¹²Jó, t'áá ánółtso t' áá nihí danóoł'į́į́'; ákoshą' ha'át'íí biniyé nihí t'áadoo biniyéhígóó yee' hadah hisoohdzíí'?

¹³Diyin God éí diné doo yá'áshóonii kót'éii yeididoo'ááł, áádóó diné ade adahodzósinii yik'ee ti'dahwiidoonihii Aláahgo Ayóó'ábóodziilii díí yee atíhodoolííł.

¹⁴Bada'áłchíní k'ee'ąą dínéest'ą́ągo diltłish bee nidadootsił yiniyé ádaat'į́ áádóó bada'áłchíní náás ahoolchííłgóó ch'iyáán doo yee hwiih daole' át'ée da doo.

¹⁵Nidahasdzíi'ii daninéego naałniih t'áá bił łeeh dabidii'níił doo, áádóó hwe'asdzą́ą́ danilíinii bąąh ádzísdįįdii éí doo t'áá k'ad haa dáácha da doo.

¹⁶Azhą́ łeezh yáájiitsih nahalingo béésh łigaii ałk'i yáájiitsih nidi, áádóó ha'éé' dooleełii hashtł'ish dits'idí ahanjiitłeeh nahalingo ahanijiijáah nidi,

¹⁷ahanijiijááh shį́į́ dooleeł nidi, diné t'áá ákogi ádaat'éii dabi'ée' doo, áádóó diné t'áadoo bee bik'ídahót'ahíii béésh łigaii ałtaa deidoonih.

¹⁸Hakin nijí'aahígíí ch'osh ałchozhii bighanígi át'é, índa ha'asídí chaha'oh áyiilaaígi át'é.

¹⁹Ajit'íinii jintéehgo hanaalye'é doo bénáhoodzį́į́' át'ée da doo; ch'éédzídzi'go hayódí yę́ę ádin.

²⁰Tó ak'i ch'ídzíłhałígi át'éego t'óó báhádzidgo hoł yéé' áhooł'įįh; tł'ée'go níyoltsoh hoł yóó'iighááh.

²¹Ha'a'aahdę́ę́' diyołgo hoł nídiiyołgo doo hwééhoozįįh da; nijighá yę́ędóó hoł yóó'iiyoł.

²²Doo haa jooba'góó ts'ídá t'áá bizááká hach'į' níyol łeh; níyol bitsxe'ii bits'áhodeeshłeeł, ch'ééh jinízin.

²³Ts'íigo lą́ą, dahałníigo hach'į' ahídaakad doo, áádóó hoł nídiiyolgo yóó'ahóda'az'įįd doo.