Read Navajo JOB 28 Bible Online

JOB 28 - Navajo bible

JOB 28

¹T'áá aaníí béésh łigaii haagééd áádóó óola náhidilyį́į́h bá haz'ą́.

²Béésh nitł'izii éí nahasdzáán biyi'dóó haagééd áádóó tsé bii'dóó béésh łitsoii hadahidilyį́į́h.

³Diné ha'agédígíí t'áá nihoodzą́ąjį' haigédígíí neiłkaah, áádóó índa bee hool'iní yidiiłtłi'go t'áá íiyisí chahałheełdi índa doo naagháhí góne' ha'agéedgo yaa nídiidááh.

⁴Diné kéédahat'ínígíí bits'áhwiiní'ą́ądi i'iiníiłgo ha'agéedgo yaa nídiidááh; łeeyi'di ałnánálch'ąłgo t'áá tł'óo'di nidaakaígíí bits'ą́ądi ha'agééd.

⁵Łeeyi'dóó ch'iyáán nihwiileeh; níléí wóyahdi łeeyi'di kǫ' bee nishódahoot'eehígíí bee łahgo ánáyoodlííł.

⁶Tsé bits'ą́ą́dóó tsé ílíinii sáfair wolyéii hólǫ́, áádóó łeeyi' óola hólǫ́.

⁷Jó, áadi naat'agii éí atsį' hadeintáii doo hólǫ́ǫ da, áádóó jeeshóó' doo hoo'į́į da;

⁸naaldlooshii da'aldeełii doo ákǫ́ǫ́ nidaakai da, índa náshdóítsoh bitsiijį' daditł'ooii doo ákǫ́ǫ́ nidaakai da.

⁹Tsé nitł'izii yidilnishgo ch'il hahalts'ǫǫdígi át'éego dził naaznilígíí bee niłdzilii t'áá yił nídeidiyeenił.

¹⁰Tó nídadinahgóó tsétahgi na'anił; tsé da'ílíinii t'áá át'é yik'éghááh.

¹¹Tó doo danílį́į da dooleeł biniyé yidáda'diłtł'į́įhgo doo daat'íinii daat'į́ neheleeh.

¹²Nidi háadi lá hódzą́ bik'í'doodááł? Áádóó háadi lá ak'idi'dootį́łígíí bá haz'ą́?

¹³Hódzą́ bą́ą́h ílíinii éí diné doo bił bééhózin da, índa nihokáa'gi dahináanii bitahgi ádin.

¹⁴Tónteel ditáanii ání, Shí doo shii' hólǫ́ǫ da, índa tónteel ání, Shí shee ádin.

¹⁵Óola doo bik'é nidoolyéeł da, índa béésh łigaii doo bik'é dahididoodloh da.

¹⁶Óferdę́ę́' óola ts'ídá ílíinii biláahgo ílį́, índa nitł'iz ałtaas'éí ániks áádóó sáfair wolyéii biláahgo ílį́.

¹⁷Óola índa tózis biisdííłtóolii éí hódzą́ ílíinii doo bił aheełt'éego ílį́į da; yódí ałtaas'éí óola ílíinii bee ádaalyaii doo bił ałgháá'jó'nííł át'ée da.

¹⁸Áko yoo' łichí'í áádóó diichiłí ílíinii t'áadoo biniyéhí da, jiníi dooleeł; nitł'iz ałtaas'éí da'ílíinii biláahgo hódzą́ ílį́.

¹⁹Iithiyópiya kéyahdę́ę́' tsé ílíinii tópaz wolyéii nidi doo í'jítį́įh da; óola éí t'áá bízhání nidi t'áá níjíí'oh.

²⁰Ákoshą' háádę́ę́' hódzą́ nihwiileeh? Áádóó háádę́ę'shą' ak'idi'yiitįįh hwee hodooleeł?

²¹Hiná nináneel'ą́ąjį' t'áá ałtso bits'ąą nanil'in, índa tsídii wódahgo naaldeehii bits'ąą nanil'in.

²²Hool'áágóó atí'éłíinii áádóó aniné ání, T'óó jiní, ha'níigo t'éí baa hodiits'a'.

²³Diyin God éí hódzą́ át'éii bił bééhózin, áádóó ákwe'é át'éegi bił bééhózin,

²⁴háálá nahasdzáán nidahonees'ą́ą́góó déez'į́į́', áádóó wódahgo dahólóonii t'áá ałtso yoo'į́.

²⁵Níyol haa bóodziilgo áyiilaago áádóó tó ádanéelt'e'ígíí yída'nééł'ąądgo

²⁶áádóó nidahałtin doogo índa nida'dilch'il doogo yee nihodiiz'ą́ągo

²⁷kót'éego yiníł'į́, áádóó yaa ch'íhoní'ą́ áádóó bidziilgo áyiilaa índa t'áá aaníí hayíísid.

²⁸Áádóó diné áyidííniid, Shoo, Bóhólníihii dólzin éí hódzą́ át'é, áádóó doo yá'át'éehii bits'ájígháahgo ak'izhdi'yiitįįh jileeh.