Read Navajo JOB 29 Bible Online

JOB 29 - Navajo bible

JOB 29

¹T'ah nááyówehgo Job t'ááłáhígi át'éego yááłtihgo ání,

²Diyin God shaa áhályą́ągo shíiníłką́ yę́ędą́ą́' ánísht'é yę́ęgi ánísht'ée laanaa.

³Diyin God bibee hool'iní bee shitsiits'iin bik'i'diidíingo chahałheeł bii' yishááłdą́ą́' bibee adinídíinii bik'ehgo níyá,

⁴ániid naasháádą́ą́' Diyin God k'é shó'níigo shiníbaal yaa áhályą́ą́dą́ą́',

⁵Aláahgo Ayóó'ábóodziilii t'ahdii shił hólǫ́ yę́ędą́ą́', sha'áłchíní shinaagóó t'ahdii nidaakai yę́ędą́ą́',

⁶t'áá ałtsoní bee áda'azįįdgo hinishná yę́ędą́ą́', tsé nidi biyi'dę́ę́' ak'ah shá hadaazlį́į́dą́ą́',

⁷kin haal'áago dáń'dítį́įhjį' náshdááh yę́ędą́ą́' ákwii dah náníshdaah yę́ędą́ą́' ánísht'é yę́ęgi ánísht'ée laanaa;

⁸dinééh dashiiłtséehgo shits'ąą nínádadit'į́į́h nít'éé', hadaastihii bił nishłį́įgo nídeidzįįhgo t'áá naazį́į łeh nít'éé'.

⁹Naat'áanii danilíinii dadidoołhiłgo bizéé' dádadilnih nít'éé'.

¹⁰Ge', jidííniid nahalingo aląąjį' naazíinii t'óó dadéesyéél nít'éé' áádóó doo hada'atahee naazį́į łeh nít'éé'.

¹¹Diné dashidiits'į́įhgo shaa dahaniih nít'éé'; diné dashiiłtséehgo yá'át'éehgo shaa yádaałti' łeh nít'éé',

¹²háálá diné bahojoobá'ígíí daacha yę́ę índa áłchíní bizhé'é ádingo t'áadoo bíká oolyeedí da yę́ę yisdáhóójaa'.

¹³Diné k'adę́ę daatsaahii bee shaa hodoo'nihii bee shik'ihodzisdli' áádóó asdzání bąąh áhásdįįdii bijéí bił hózhǫ́ǫgo hataałgo áshłaa.

¹⁴T'áá ákogi át'éii ák'ísísti'go t'áá ákogi át'ééjí éé' bee hashi'diilyaa; doo haa dayit'éii bee hadiish'éé' índa shitsii' názt'i' nít'éé'.

¹⁵Diné doo da'oo'íinii bá anáá' nishłį́į́ nít'éé', índa diné doo nidaakaii bá ajáád nishłį́į́ nít'éé'.

¹⁶Diné badahojoobá'ígíí bizhé'é nishłį́į́ nít'éé'; diné doo bééhasinii bee bik'éhát'áahii bá naashkaah nít'éé'.

¹⁷Diné doo yá'ádaashóonii dabiyaats'iin k'íshtihgo dayótsa'ii bizéé' hááháshtł'iid nít'éé'.

¹⁸Kódíshníí nít'éé', T'áá shighandi dadeestsaał índa séí ayóó ánéelą́'ígi át'éego t'óó ahayóí shiidoołkááł.

¹⁹Shehétł'óól táyi'jigo taah noolzhee' índa tł'éé' bíighah shits'áoz'a' dahtoo' daabąąh łeh.

²⁰Bee ił nishłíinii t'áá áłahjį' ániidí náádleeł, áádóó she'ałtį́į́' ałdó' áłahjį' ániidí náádleeł.

²¹Diné dashíists'ą́ą'ii shiba' ádaat'éego nabik'íyáshti'go dadéesxéél nít'éé'.

²²Haasdzihgo doo shich'į' hanádziihí da nít'éé'; shizaad dahak'ijį' naałtin nít'éé'.

²³Níłtsą́ biba' nidzíiztą́ nahalingo shiba' nidaháaztą́ą łeh nít'éé'; níłtsą́ nidayólí nahalingo yídin ádaanéehgo k'adę́ę dashidiits'į́įh łeh nít'éé'.

²⁴Doo dashijoodlą́ą́góó t'óó hach'į' yishdloh łeh nít'éé'; shił hózhǫ́ neeshningo doo shąąh nidahwiiłkaad da nít'éé'.

²⁵Dajíkáah dooleełgóó há nidahidish'aahgo agháago naat'áaniigi át'éego dah sédáa łeh nít'éé'; aláahgo naat'áanii bisiláo yitahgi kééhat'į́ nahalingo kééhasht'į́į́ nít'éé'; yínííł danilį́įgo atínídadindleehii hayi'iyoołníihii nahonishłingo kééhasht'į́į́ nít'éé'.