Read Navajo JOB 3 Bible Online

JOB 3 - Navajo bible

JOB 3

¹Kódzaadóó bik'ijį' Job bi'dizhchínígíí yiyéédzíí'.

²Áádóó Job ádííniid,

³Háni' jį́ biyi' shi'dizhchíinii bił yóó'ahaghááh; éí bitł'éé', Diné ła' bó'ootsą́, ha'nínígíí doo bééhániih da doo.

⁴Éí jínígíí háni' bił chahałheeł le'; éí wódahdę́ę́' Diyin God yaa ákonoozįįh lágo, bik'i doodlaad lágo;

⁵Jį́ biyi' shi'dizhchínígíí háni' chahałheeł índa anoonééł bichaha'oh biishį́į́h; háni' k'os bik'iilzhood; háni' chahałheeł bik'ee ił yée'ii yileeh.

⁶Éí bitł'éé' háni' chahałheeł bik'iildóóh; éí nináháhááhgóó yoołkáałii bitahgi bił óolta' lágo índa náhidizíídgóó bitah oolts'ííd lágo.

⁷Jó, éí bitł'éé' doo bí'ootsą́ą da le'; éí bitł'éédą́ą́' t'áadoo diné bił dahózhóní le'.

⁸Liiváíyathan yił hadahodínóołchał yiniyé hasht'e'ádadiilyaii éí jínígíí hóyée'go yá hadaadziih.

⁹K'adę́ę haiłkaahgo sǫ' haakahígíí bíni' bi ł chahoołheeł; háni' hwiidool'įįłígíí nayólí, nidi t'ááká bee hool'įįh yíila', áádóó háni' doo bik'ijį' ha'doo'áał da,

¹⁰háálá shimá biishch'id t'áadoo déidiiłtsood da índa shich'į' nahwii'náanii t'áadoo shits'ąą néidees'į́į' da.

¹¹Ha'át'éegoshą' t' óó shi'dizhchį́ yę́ędą́ą́' t'áadoo dasétsą́ą da? Ha'át'éegoshą' t'óó háítłizh yę́ędą́ą́' shii' sizíinii t'áadoo shii' haalwod da?

¹²Ha'át'íishą' biniyé agod bita'dę́ę́' hashi'dooltį́? Índa ha'át'íishą' biniyé abe' yíłt'óód?

¹³Dasétsą́ągo la' yóó'áshi'diilyaago doo íits'a'í da doo nít'éé'; dasétsą́ą́jígo la' hanáshyį́įh doo nít'éé';

¹⁴nihokáá'góó aláahgo naat'áanii danilį́ yę́ę áádóó diné na'ak'íyádaałti' yę́ę éí kin hadaas'áago áńdahoodlaa yę́ę,

¹⁵doodaii' naat'áanii danilíinii óola bee dahólóonii dabighan góne' béésh łigaii hadeideesbįįd yę́ę la' bił háádaashyį́įh doo nít'éé'.

¹⁶Éí doodaii' awéé' t'óó atsą́ háá'éelgo yóó'ályaii t'áadoo deezghalii nahonishłin doo nít'éé'.

¹⁷Áadi diné doo yá'ádaashóonii yę́ę doo ach'į' nidahwiiłnáa da; áadi diné ch'ééh dadeeskaii yę́ę t'óó háádaalyį́į́h.

¹⁸Áadi lą́ą awáalyaaí danilíinii bide ádahósin yę́ę doo nídeididoots'į́į́łgóó t'óó ałk'i dah neisłá.

¹⁹Diné ayáhígo ádaat'é yę́ę áádóó ayóó ádaat'é yę́ę áadi łeeyi' shijéé', áádóó naalte' jílíinii hananit'a'í doo hwee ádíhólníih da.

²⁰Ha'át'íí lá biniyé diné ti'hooníihii bá adinídíingo ályaa lá índa ha'át'íí lá biniyé diné bił niiłch'iihii iiná baa deet'ą́ą́ lá?

²¹Éí dadzótsaah laanaa nízin, nidi doo daotsaah át'ée da índa yódí yinées'į́į'go yíka'ageedígíí bilááh át'éego aniné hát'į́;

²²éí t'áá íiyisí bił nidahoozhǫǫhgo yóó'ádabi'diilyaago bił dahózhǫ́ǫ doo.

²³Diné deeyáágóó bił ch'aa óolzinii Diyin God biná'ást'i'ii ha'át'íí biniyé bik'i diidíín?

²⁴Yínííł nishłį́įgo adeeshį́į́ł yę́ę t'óó atínídinishdleeh, áádóó tó ch'ínílį́ nahalingo dinish'ní.

²⁵Háálá ayóó át'éego bik'ee shił yée'ii shik'i hoole' áádóó binásdzidígíí shich'į' áánííł.

²⁶Doo shił hasht'ehodít'ée da áádóó doo hanáshyį́įh da índa doo dííníshyéel da, nidi shich'į' náhodii'nááh.