Read Navajo JOB 30 Bible Online

JOB 30 - Navajo bible

JOB 30

¹Nidi k'ad diné shikéédę́ę́' nidaakaii t'óó shá nidahałt'i'go shaa daadloh; dabizhé'é yę́ę éí łééchąą'í bił shidibé yaa ádahalyą́ą dooleełgi nidi doo baa jóshłíi da nít'éé'.

²T'áá aaníí, éí hastóí yee dabidziilii bąąh nást'įįdii haash yit'éego chonáánáosh'į́į doo?

³Badahojoobá'ígo áádóó dichin danilį́įgo nidahaasgango biniinaa hiłiijį́įhgo doo naagháhígóó ałnáádaajahgo honoojíidi ch'il behétł'óól dei'aał nít'éé'.

⁴Haza'aleeh hadeigéedgo índa ch'il naazkaadígíí behétł'óól hadeigéedgo dabich'iyą' nít'éé'.

⁵Diné bits'ą́ą́dóó ch'ídahoniiłkaad áádóó ani'įįhii bízhdílwoshígi át'éego hódadilwosh nít'éé'.

⁶Tsé danít'i'góó dabiníkoohgóó áádóó da'a'áángóó índa tsé daa'áángóó t'éiyá kéédahojit'į́į́ nít'éé'.

⁷Ch'iltahgóó hadahas'áa łeh índa ch'il hooshahii nitsaii biyaagóó ahínídeiikah nít'éé'.

⁸Diné doo dahóyáanii, t'áá aaníí doo béédaho'dílzinii ba'áłchíní dajílį́įgo t'áadoo biniyéhígóó nidajikai nít'éé'; éí nahjį' kódaho'diilyaa.

⁹Áko k'ad ákódabi'diilyaaígíí éí shaa nidadi'a'; t'áá aaníí t'áá ádzaagóó nidashózhi'.

¹⁰Shik'ee dadiniih; doo shit'áhíjį' ádaat'ée da, áádóó shinii' yik'ídadidoozhahgi doo yich'į' ni' danilį́į da.

¹¹Diyin God éí doo shitah hwiináágóó áádóó ádaa hojiinishbá'ígo áshiilaaígíí biniinaa doo shíká dáátiid da.

¹²Shinish'náádę́ę'go ániid nidaakaii ná'néehgo dideeshgoh biniyé shijátah nídadiltałgo yaa nínáádiikah; yee atída'ał'íinii shininádayiidlééh.

¹³Yishááłgóó nidahwiiłchxǫǫh; shich'į' nidahwiiłnáa dooígíí yíká da'íłkeed; t'áadoo yóweh bidóne'é da.

¹⁴Na'adzi'gi tó hak'i ch'ízníłhaal nahalingo shik'ijį' dah náníjah. Bik'e'íyée'ii bee shich'į' áhooníiłgo shik'ijį' nídiikai.

¹⁵Bik'eda'íyée'ii shik'ééhoodleeh; deeyolígíí nahalingo shikéé' nahaakai; k'os yóó'eelzhóód nahalingo bee ánísht'éii yę́ę háájí shį́į́ silį́į́'.

¹⁶Áko k'ad t'áá kódíjį' shii' sizíinii bił shá nihonít'i' nahalin; shich'į' nahwii'náago shíídíiską́.

¹⁷Tł'ée'go shits'in shił náhoniiłgah; doo shił honók'e' át'éégóó shił nahonigaah.

¹⁸T'áá íiyisí doo shitah hóóts'íídgóó shi'éé' shínídeidiiłjah; shizáníghą́ą́ gónaa shídiilkad nahalingo shik'i naazdon.

¹⁹Diyin God éí nahodits'ǫ' ashiyííłhan, áko łeezh dibahí índa łeeshch'iih nahonishłin sélį́į́'.

²⁰Nich'į' sodiszingo doo shich'į' ééhonísįįh da; néisdzįįhgo t'óó shiníníł'į́į łeh.

²¹Shí'íts'ih sínílį́į́'; níla' ayóó ábóodziilii bee atíshíł'į́.

²²Níyol nááshidiiłtéehgo shił yiyołgo ánáshiinil'įįh; ayóó át'éego níyolígíí yááshiiłgohgo nínáshidíł'oł.

²³Jó, díí shił bééhózin: dadeestsaałjį' yee', éí nihokáá' dine'é t'áá ałtso bá nihonít'i'ii bá haz'ą́ąjį' áajį' kóshidíílííł.

²⁴Azhą́ ła' hak'i hoołdáazgo, Shíká oołyeed, didooniił nidi, doo ła' bíká adidoolnihí da.

²⁵Diné bich'į' nahwii'náago bíyoołkáałiísh t'áadoo baa yícha da? Índa baa dahojoobá'ígíísh t'áadoo baa yínííł niséyáa da?

²⁶Yá'át'éehii bíká ánísht'éego jó, doo yá'át'éehii da shaa honíle'; adinídíín bíká ánísht'éego t'óó chahałheeł hazlį́į́'.

²⁷Shitsą́ habéézh nahalingo doo áhodiiszéeh da; ach'į' nahwii'ná bii' shíyoołkááł.

²⁸Jį́honaa'éí éí doo shiishį́į' da, nidi yínííł ánísht'é; áłah ílį́įgi néisdzįįhgo shíká i'doolwoł biniyé ná'ooshkąąh łeh.

²⁹Mą'ii bik'is sélį́į́', índa tsídiitsoh ástrich wolyéii bił naashdeeh.

³⁰Shikágí éí deijį́į'go nahgóó ahit'ood; kǫ' hózhdínił nahalingo shits'in daneezgai.

³¹Tsin tł'óół bąąh daneelzhee'go bee nida'a'néii bee naashnéego yínííł jílį́įgo atínízhdindlehígi íits'a' nádleeh, áádóó tsin bee í'dílzoołí bee naashnéhígíí atínáhodindleehgo hwiinéé' dadiits'a'ígi ánáánéits'a' łeh.