Read Navajo JOB 31 Bible Online

JOB 31 - Navajo bible

JOB 31

¹Shináá' t'éiyá bee nísh'į́į dooleełii nidiní'ą́, áko ha'át'éegoshą' ch'ikę́ę́h ła' bidáneeshníi doo?

²Diyin God yót'ááhdę́ę́' hólóonii ha'át'íí ach'į' niidoolééł? Aláahgo Ayóó'ábóodziilii agháníhóó'áadi hólóonii ha'át'íishą' aididoo'ááł?

³Da' diné doo yá'áshónígi áát'įįdígíísh doo atíbidi'doolníił da? Da' diné doo ákwii ádaat'íiniísh doo ayóó ábidi'doolníił da?

⁴Da' Diyin God éí yishááłgóósh doo yoo'į́į da, índa nihidishtaałígíísh doo t'áá ałtso yółta' da?

⁵Shina'adlo'go daats'í hinishnáá nít'éé', éí doodaii' tsxį́įłgo ina'ashło'go niséyáá ládą́ą́',

⁶háni'dii bee dah nídiidlohí doo bina'adlo'ii bee shééhodoozįįł, áko doo shina'adlo'góó Diyin God bił bééhodoozįįł.

⁷T'áá ákóne' ásht'į́įgo bits'á níyáago áádóó bidánáneeshnihii t'éí shíni' nilį́įgo yisháałgo, ádił ni'iidzííh ła' t'áá shii' hólǫ́ǫ́ ládą́ą́',

⁸háni'dii k'éédíshdléehgo náánáła' diné nídeidį́įh doo; t'áá aaníí shá nidanise'ii háni'dii hadahólts'ǫǫd.

⁹Asdzání shíni' áhoolaago, doodaii' bił kééhasht'íinii bich'é'étiindóó baa hííníshdáá nít'ée'go,

¹⁰háni'dii she'asdzą́ą́ náánáła' diné yá ak'áa doo, índa háni'dii náánáła' diné yił nídabiilkááh.

¹¹Jó, ákóhoodzaago t'áadoo hasohnáhodiiníbézhígóó ádił oodzíi' dooleeł; t'áá aaníí doo ákwii ádajíít'įįdígíí ándahwii'aahii atídahodoolííł.

¹²Háálá atí'oolníiłjį' kǫ' ałtso idi'doołk'ą́ąłii át'é; shee nihwiileehii ałtso shits'ą́ąjį' kódaalne' doo nít'éé'.

¹³Diné shá naal'a'í, doodaii' asdzání shá naal'a'í bi'diił'áhígíí biniinaa shik'éhá'áahgo bá baa nídéesht'įįłgi doo niizį́į́'góogo,

¹⁴áko Diyin God shá nihodoo'ááł biniyé nídiidzáago haa deeshnííł? Shaa honíle'goshą' ha'át'íí bidideeshniił?

¹⁵Da' doósh Diyin God áshiilaago iishch'id biyi' nishiníłtínígíí áhoolaa da? Da' doósh t'ááłá'ígíí t'áá áníidla t'áá ał'ąą nihimá biishch'id biyi'di ánihiilaa da?

¹⁶Baa dahojoobá'íii t'áadoo le'é deinízinii bich'į' baa nááchį'go, doodaii' asdzání bąąh áhásdįįdii yídin nilíinii t'áadoo bee bíká aashwodgóogo;

¹⁷éí doodaii' t'áá sáhí shich'iyą' yíyą́ą'go áłchíní bizhé'é ádinii t'áadoo ła' ba'níłtsoodgóogo;

¹⁸(jó, t'áá tsíłkéí nishłį́į́dę́ę́' bizhé'é nishłį́ nahalingo bił níyá, áádóó t'áá bimá bishchínídóó kǫ́ǫ́ dahonít'i', bidishníigo nísą́;)

¹⁹ła'da shinááł éé' yídin nilį́įgo daaztsą́ągo, doodaii' bahojoobá'íii bi'éé' ádingo yiiłtsą́ągo,

²⁰áádóó bahojoobá'íii t'áadoo éé' baa nínilgóó doo shich'į' ahééh niizį́į́'góogo índa shidibé bighaa' bee éé' ádaalyaaígíí t'áadoo yee ná'iidziilgóogo,

²¹áádóó dáń'dítį́įhgi ándahwii'aahii shik'is dajílį́įgo bąą áłchíní bizhé'é ádaadinii bide ádahwíínísin ládą́ą́';

²²háni'dii shigąąstsiin shiwos bąąh ni'diikęęs; háni'dii shigaan shich'oozlaa'gi k'édlaad.

²³Jó, Diyin God atí'éł'į́įgo t'áá íiyisí bik'ee shił yéé' nít'éé', áádóó ayóó át'éii nilį́įgo biniinaa t'áadoo bínéésh'ąąd da.

²⁴Óola bee shił chohoo'į́įgo, doodaii' óola yá'át'éehgo nídoolyį́į'ii, Naa jííníshłí, bidííniidgo,

²⁵áádóó t'áá íiyisí bidziilgo dah aashłéłígíí índa lą'í nishó'iisíłt'e'ígíí baa shił nihoozhǫǫhgo,

²⁶áádóó jį́honaa'éí adiníłdíingo índa ooljéé' nizhónígo hááyáago nééł'į́į'go;

²⁷t'áá nahont'inee shijéí yíni' áhoolaago shíla' séts'ǫsgo;

²⁸kót'éego doo ákwii áhóót'įįdígíí ałdó' át'éego ándahwii'aahii yaa nídadóot'įįłgo atídeidoolííł nít'éé'; kósdzaago éí, Diyin God yót'áahdi hólóonii doo shídéét'i' da, dííniid doo nít'éé'.

²⁹Da' diné shik'ee diniihii atílyaaígíísh bąą shił nihoozhǫǫh índa doo yá'át'éhígi ábi'diilyaagoósh baa ts'íigo lą́ą niizį́į́'?

³⁰Dooda, t'áá aaníí bi'dódziihgo daotsa' doo laanaa nisingo doo bee ádił iisiihgo haasdziih da.

³¹Shiníbaal si'ą́ą́dóó t'áá háiida, Hach'iyą' t'ah doo bee hwiih deidleeh da, doo niihí da?

³²Dé'éyóní doo ła' kintah atiingi biiską́ą da, nidi ch'aadeíkáahii bá shighan ąą íínísin nít'éé'.

³³Doo ákwii áát'įįdii shijéí bii' nídíł'į́į'go, Ádam ádzaa yę́ęgi át'éego bee haz'áanii k'íníti'ígíísh díníł'į́į'go,

³⁴ayóó ánéelą́ą́' áłah ílínígíí bik'ee shił yée'go dahooghandę́ę́' diné dah deíkáahii dashi'į́įgo tsídasideesyizígíí biniinaa t'óó dííníshhéél nít'éé', áádóó tł'óó'góó nidi t'áadoo ch'íníyáa da?

³⁵Dooládó' ła' shíists'ą́ą́' laanaa da! Jó, kǫ́ǫ́ ádaa hashne'go Aláahgo Ayóó'ábóodziilii shich'į' ééhoosįįh laanaa nisin, índa shi'ana'í nilíinii naaltsoos bikáa'gi ak'e'ółchíiłgo shaa chíhó'ááł laanaa nisin.

³⁶Ákódzaago shiwos dah deesh'ááł áádóó naat'á ch'ah hach'ah ájíléhígi át'éego shitsiinídeesht'ih nít'éé'.

³⁷Níyáádę́ę́' kónéelą́ą'di nidinishtáál, dishníigo bił hodeeshnih nít'éé'; naat'áanii nahalingo bit'ááh deeshááł nít'éé'.

³⁸Shikéyah shik'ee hááchago áádóó anák'eeshto' náálį́ nahalingo tó neets'ee'go danílínígíí shich'į' saad dahółǫ́ǫgo,

³⁹áádóó kéyahdóó neest'áanii béeso t'áadoo bik'é nanishłéhí yíyą́ą'go biniinaa bikéyah da'ílíinii daneeznáago áshłaago;

⁴⁰háni'dii tł'oh naadą́ą́' hadadínóosééł yę́ęgi ch'il deeníní hadanise' le', índa tł'oh naadą́ą́' bidee'í hadadínóosééł yę́ęgi tł'oh niłchxoní yilt'ąą'ída nidanise'. Kojį' lą́ą Job saad niiníłt'i'.