Read Navajo JOB 32 Bible Online

JOB 32 - Navajo bible

JOB 32

¹Áko Job t'áá ákogi ánísht'é nízinígíí bąą díí diné tált'éego t'áadoo hanáádaasdzíi' da.

²Ákohgo Ram ba'áłchíní ahoolchíiłii Baz nahós'a'dę́ę́' diné nilíinii Bárakel biye' Iiláíhu wolyéii báhóóchįįd. Job éí Diyin God yá'át'éehgo bá hazdoodzih yę́ęgi, jó, hóda t'áá ákogi ánísht'é jiníigo hadzoodzí'ígíí yik'ee báhóóchįįd.

³Job bik'isóó tált'éegoígíí ałdó' yich'į' báhóóchįįd, háálá áho'diilyaaígíí biniyéii t'áadoo bee hach'į' háádaasdzíi' da, nidi t'óó hak'ídaha'ááh.

⁴Áko diné tált'éego Job yił ahił dahalne'ígíí éí Iiláíhu yilą́ąjį' nidaakaígíí bąą t'ah índa Job bich'į' hadeesdzih jinízingo ahoolzhiizh.

⁵Áko díí diné tált'éego yee hadahidoodzihígíí bee ádaadingo éí Iiláíhu yaa ákoniizį́į'go yik'ee báhóóchįįd.

⁶Áko Baz nahós'a'dę́ę́' diné nilíinii Bárakel biye' Iiláíhu haadzíi'go ání, Shí t'áá íiyisí t'ah ániid naashá, ni éí náásínílį́į'go łą́ ninááhai; éí bąą shí ákót'éego baa nitsískees nidideeshniiłgo bee nił hodeeshnihígi binásdzid áádóó bik'ee shił yéé' nít'éé'.

⁷Áko łą́ biiskáanii índa łą́ binááhaii yáłti'go hódzą́ yee na'nitin doo nít'éé', dííniid.

⁸Nidi diné níłch'i bii' hólǫ́ áádóó Aláahgo Ayóó'ábóodziilii biyol ak'izhdi'yiitįįhgo áhósin.

⁹Diné ayóó ádaat'éii doo áłahjį' dahóyą́ą da, índa hadaastihii daats'í t'áá ákogi ádaat'éii doo yik'idadi'yiitįįh da.

¹⁰Éí bąą dashíísółts'ą́ą́'; shí ałdó' íinisinii bee nihił hodeeshnih.

¹¹Jó, saad bee hadahidoohdzihígíí nidasoołkáa'go índa bee hadahidoohdzihígíí bíká íínísts'ą́ą'go biniyé sédáá nít'éé'.

¹²T'áá aaníí, hazhó'ó nihíísísts'ą́ą́' nít'éé', áko jó, nihí ła' t'áadoo Job bíni' bá áhoołaa da, índa saad yee hahaasdzí'ígíí t'áadoo ła' bich'į' saad bee bighadinoht'ą́ą da.

¹³Bee hódzáanii bik'íniikai, doo dadidoohniił da. Diyin God yee' naa'ahoyííłhan; diné éí dooda.

¹⁴Job doo shik'ijį' saad ayiiznil da, áádóó aadę́ę́' bich'į' saad bee hadahisoohdzí'ígíí doo bee bich'į' hadeesdzih da.

¹⁵Áko bik'ee t'óó bił adahóóyóí áádóó t'áadoo hanáádaasdzíi' da, índa t'áadoo yánáádááłti' da.

¹⁶Hanáádadoodzihígíísh biba' ánísht'ée doo? (Jó, t'áadoo hanáádaasdzíí'góó t'óó naazį́ áádóó t'áadoo ánáádadoo'niidí da.)

¹⁷Shí ałdó' kót'éego hadeesdzih; shí íinisinígíí ałdó' baa hodeeshnih.

¹⁸Shí saad lą'í bee hahideesdzihii shee hólǫ́; níłch'i shii' sizíinii, Yáníłti', shiłní.

¹⁹Jó, shibid éí wáin bizis doo bii'dę́ę́' háách'i daígíí nahalin, índa wáin bizis ániidíii k'adę́ę diilchxoshígíí nahalin.

²⁰Shik'ééhodootah biniyé hadeesdzih; hadeesdzihgo énáhodeesįįł.

²¹Náánáła' diné bił hashne'go doo diné t'ááłá'íígíí bich'ijí nishłį́įgo hadeesdzih da, índa diné t'áadoo ádaat'éégóó dahayóí, doo dishníigo baa yáshti' da dooleeł.

²²Háálá t'óó áhá'níigo saad bee ąąh aldéehii bee yáti' dooleełígíí doo shił bééhózin da, doodaii' ákódíshníigo éí Áshiilaii nahjį' kóshidoolííł.