Read Navajo JOB 33 Bible Online

JOB 33 - Navajo bible

JOB 33

¹Éí bąą Job yinílyéii, shíísíníłts'ą́ą'go saad bee yádeeshtihígíí t'áá ałtso didííts'į́į́ł.

²Jó k'ad, ayá'niiłti'go shitsoo' shizéé' siláhígíí yáłti'.

³Shijéí bee ts'ídá t'áá ákogi át'éego nitsískeesgo saad bee yáshti' doo, índa t'áá bééhózínígo ił ééhózin bee hahaasdziih doo.

⁴Diyin God biNíłch'i Diyinii áshiilaa áádóó Aláahgo Ayóó'ábóodziilii biyol bee hinishná.

⁵Bíninil'ą́ą́ ládą́ą́' shich'į' ééhonísįįh ahíłlááh nidiníltaałgo aadę́ę́' saad ałkéé' niníníiłgo shinááł bee handziih.

⁶Jó, Diyin God bíí' nílínígi át'éego shí ałdó' bíí' nishłį́; shí ałdó' łeezh bee áshi'diilyaa.

⁷Jó, shiniinaa doo nił yéé' hodooleeł da, áádóó ándideeshniiłii bik'ee doo níni' yidoo'aał da.

⁸T'áá aaníí níísísts'ą́ą'go bee háínídzíí' áádóó saad bee hahínídzí'ígíí diséts'ą́ą́'; jó, ádíní,

⁹Bee haz'áanii doo k'íníti'góó yá'ánísht'ééh; shijéí bii' yá'áhoot'ééh, índa doo ákwii é'ét'éii shii' ádin.

¹⁰Jó, shik'ijį' nilį́įgo bá ashja'ósingo shaa héesdá; bi'ana'í nishłį́įgo shaa nitsíkees;

¹¹tsin bighá hoodzánígíí yiih náshidił'is áádóó yishááłgóó t'áá ałtso haisííd, dííníniid.

¹²Jó, kódííníniidígíí doo ákót'ée da, nich'į' hadeesdzih, Diyin God yee' diné ts'ídá yiláahgo át'é.

¹³Ha'át'íí biniyé ákót'éego bich'į' saad honíłǫ́. Jó, yaa naagháhígíí doo t'áá ałtso yee ádaa ch'íhwiit'aah da?

¹⁴Jó, Diyin God t'ááłáhídi haadzih, doodaii' naakidi haadzih, nidi diné doo haa ákoniizįįh da.

¹⁵Tł'ée'go nideiyeełgo bił ádahat'į́įgo áádóó bił anídeidinikáahgo bitsásk'eh yikáá' da'ałhoshgo,

¹⁶ákohgo lá índa diné da'íists'ą́ą'go ádeile' áádóó yee nidabidi'neestą́ą'ii bééhózingo ádeile'.

¹⁷Diné baa nijigháii bits'ázhdoogááł áádóó ádaa hoji'niihígíí doo ajít'ée da jidooleeł biniyé kódahale'.

¹⁸Kót'éego diné doo yóó'ábidi'doolnííłgóó índa diltłish doo bee bi'diilyéégóó áyósin.

¹⁹Diné wolyéii tsásk'eh yikáá' sitį́įgo ił hodiniih índa t'áá áłahjį' bits'in dadiniihígíí bee nábidi'niltsxis,

²⁰áko bááh índa ch'iyáán ałtaaskąądii ts'ídá doo yinízin da.

²¹T'áá íiyisí nizhníłgango hatsį' hąąh ásdįįd; hats'in t'áadoo bahat'aadí daní'á.

²²T'áá aaníí k'adę́ę yóó'aho'dilnééh índa k'adę́ę nida'ałtseedii biyaajį' hoł ahalzhíísh.

²³T'ááłáhídi mííl bitahdóó diyingo naal'a'í, ata' sizíinii éí há yá'át'éehii yee hoł hodoolnihii hólǫ́ǫgo

²⁴éí diyingo naal'a'í diné yaa jooba'go ání, Doo yóó'ábidi'doolníił da biniyé yisdáníłteeh; diné yá niná'doodléełii bik'íníyá.

²⁵Bits'íís ániid naaghá nídoodleeł; ániid naagháádą́ą́' át'é yę́ęgi át'éego bidziil nídoodleeł.

²⁶Áko índa Diyin God bich'į' diné sodilzin nídoodleeł, áádóó bił hach'oha'né nízhdoodleełgo Diyin God baa hoł hózhǫ́ǫgo bił ahizhníl'į́į doo; bit'áá ákogi át'éii bee yisdájííyáá nít'éé' yę́ę hach'į' kónéidoodlííł.

²⁷Diné yinááł ádidooniił, Ádił asésiih; t'áadoo é'él'į́įgi íít'įįd, nidi t'áadoo shaa nídélí da.

²⁸Doo yóó'áshidi'doolníił da biniyé yisdáshííłtį́, áko adinídíín yideestsééł.

²⁹Shoo, Diyin God díí t'áá ałtso kót'éego t'áá ahą́ą́h diné yinaalnish,

³⁰áko yóó'ábi'dilnééhdę́ę́' hááhodoołtéełgo iiná bee hool'in baa hózhóonii bee hoł ch'ídidoodlał baa ákoznízin doo.

³¹Job yinílyéii, hazhó'ó shíísíníłts'ą́ą́'; t'óó dííníłhéél, áko yáshti' doo.

³²T'áá ha'át'éegoda hadeesdzih, nínízingo aadę́ę́' bee shich'į' handziih, yáníłti', t'áá ákogi íínít'įįd nidideeshniił nisin.

³³Doo handziihgóó éí t'óó shííníłts'ą́ą́'; hazhó'ó dííníłhéelgo hódzą́ bínandínéeshtįįł.