Read Navajo JOB 34 Bible Online

JOB 34 - Navajo bible

JOB 34

¹Náá'áłdó' Iiláíhu ánáádoo'niidgo ání,

²Nihí hastóí hóyáanii danohłíinii, shizaad dayínółts'ą́ą́'; nihí nihił éédahoozinii ádíshnínígíí deísółts'ą́ą́'.

³Hazéé' bee ajilįhígi át'éego ajółts'ą́ą́' bee saad hoł nibééhwiizįįh.

⁴Haa'íyee' t'áá ákwii áhát'į́ nidadidiit'ááł, índa nihitahgóó yá'át'éehii hólónígíí nihił béédahózin doo.

⁵Jó, Job ájíní, T'áá ákogi ánísht'é, nidi Diyin God éí bee shá haz'áanii nahjį' niidiní'ą́.

⁶T'áá ákogi ánísht'éhígíí doo ákót'ée da, dishníigoósh shiyooch'íid doo? Azhą́ bee haz'áanii doo neheshtíih da nidi, tséstíín diníshdlį́į́'.

⁷Háí diné shį́įshą' Job nahojílin? Éí tó jidlánígi át'éego nahat'i' jidlą́,

⁸áádóó diné doo ákwii ádaaníiłii bił nijildeeh, índa diné doo yá'ádaashóonii bił jooldah.

⁹Jó, Job ájíní, T'áá hó Diyin God bee ádił hojílzhóonii ts'ídá t'áadoo haa doodiłí da.

¹⁰Éí bąą diné ak'idadi'yootįįhii dashíísółts'ą́ą́'; Diyin God yee' doo yá'áshóonii ts'ídá doo ííléeh da, índa Aláahgo Ayóó'ábóodziilii éí doo ákwii é'ét'éii ts'ídá doo ííléeh da.

¹¹Jó, diné ájooníłígíí bik'ehgo hach'į' niná'doodlééł, áádóó ájít'éii bik'ehgo áho'dool'įįdígíí nibééhwiizįįh.

¹²T'áá aaníí Diyin God nilíinii ts'ídá doo yá'áshóonii doo íidoolíił da, índa Aláahgo Ayóó'ábóodziilii éí t'áá ákogi át'éii ts'ídá doo łahgo ánáyoodlíił da.

¹³Háísh nahasdzáán bee bóhólníihgo ábiilaa? Doodaii' háísh nahasdzáán yaa áhályą́ągo ábiilaa?

¹⁴Diyin God éí kót'éego diné yaa tsídeezkéezgo áádóó t'áá bí biníłch'i índa biyol ách'į' kónáyiidlaago

¹⁵nídídzih nináneel'ą́ąjį' t'áá łahjį' dínóonéełgo diné jílíinii łeezh nízhdoodleeł nít'éé'.

¹⁶Bee ak'i'diitįįhii k'ad nee hólǫ́ǫgo ádíshnínígíí kǫ́ǫdí lą́ą yísíníłts'ą́ą́'; shizaad hazhó'ó yísíníłts'ą́ą́'.

¹⁷Da' t'áá ákogi át'éii jijoołáiísh hóhólníihgo hojoo'áał doo? Aláahgo t'áá ákogi át'éii nilíiniísh t'áá bá nihodíí'ááł?

¹⁸Éí aláahgo naat'áanii nilíinii ííłní, T'áadoo bą́ą́h nílíní da, índa naat'áanii danilíinii ííłní, Doo yá'ádanohshǫ́ǫ da.

¹⁹Éí naat'áanii dajílíinii doo aláahgo da'jílį́įgo haa nitsíkees da, índa diné bahojoobá'íii biláahgo diné ajit'íinii doo bił jílį́įgo haa nitsíkees da, háálá t'áá ádzíłtso Diyin God honaashnishii dajílį́.

²⁰T'áadoo hodina'í dazhniné. Tł'é'ííłnihgo diné bitah dahoditłidgo abídeiłkááh. T'áadoo bi'deelchídígóó diné ayóó át'éii danilíinii ádaadįįł.

²¹Diné ádajít'éii haisííd, índa dajíkááhgóó t'áá ałtso yiníł'į́.

²²Chahałheeł índa anoonééł bichaha'oh bii' diné doo ákwii ádajooníiłii t'áá hó nídazhdidoot'į́įłgi t'áá há ádin.

²³Ła'da Diyin God bidááhdóó haa náhódóot'įįłígíí éí Diyin God doo hach'į' ííshjání áyósin da.

²⁴Diyin God éí diné ayóó ádaat'éii t'áadoo baa hwiinít'íní niyiiłchxǫǫh, áádóó náánáła' yitsásk'ehjį' ayiinííł.

²⁵Éí bąą honaanish danilíinii bił bééhózingo biniinaa t'áá ła' óotł'éé' hak'eh hididleehgo áhoołdįįł.

²⁶Diné dabinááł diné doo yá'áshóonii ádajit'éego atííł'į́,

²⁷háálá bits'á dziiskai, índa bihonít'i'ii doo baa nitsídadzikees da,

²⁸áádóó honiinaa diné badahojoobá'íii Diyin God yich'į' nída'ookąąhgo bich'į' nidahwii'nánígíí bisodizin yá yidiizts'ą́ą́'.

²⁹Dine'é t'áá kéédahat'į́į́ nít'éé', doodaii' diné t'áá łah dilt'éhígo yich'į' áhodéeszée'go háísh bik'ijį' hadoodzih? Binii'jį' néidees'į́į'go háísh bidááhdóó nidoogááł?

³⁰Áko diné t'áá kééhat'į́į́ nít'éé' doo yiya'iidooloh da biniyé diné doo Diyin God k'ehgo ádaat'éii doo naat'áanii ábi'dilnéeh da.

³¹T'áá aaníí Diyin God kóbizhdííniidgo éí t'áá áko, Atíshi'diilyaa; doo ádił náá'deesih da.

³²Doo baa ákonisinígíí bínashiníłtin. Doo ákwii áát'įįdgóogo éí doo ánáádeesh'níił da.

³³Éí doo ninizį́į́'góogo nínízinígíísh bik'é nich'į' ni'doolééł? Shí éí doo ná nidideesh'áał da; ts'ídá yee' t'áá ni nididíí'ááł; éí bąą nił bééhózinígíí baa hodíílnih.

³⁴Diné ak'idi'yiitįįh bee dahólóonii índa diné dahóyáanii dashidiizts'ą́ą'ii ádashididooniił.

³⁵Job t'áadoo bił bééhózinii yaa yáłti' áádóó bizaad hódzą́ bąąh ádin.

³⁶Diné doo yá'áshóonii yáłti'ígíí nahalingo saad nináyii'níłígíí bąą Job t'áá nabíhodi'nitaahgo daotsa' laanaa nisin.

³⁷Naalteehígíí yee ádił asiihígíí yíyiinííł; nihitahdóó ahíkadgo Diyin God yik'ijį' nilį́įgo hayánídíníltih.