Read Navajo JOB 35 Bible Online

JOB 35 - Navajo bible

JOB 35

¹Náá'áłdó' Iiláíhu ánáádoo'niidgo ání,

²Díí bee hahínídzí'ígíísh t'áá ákódaat'é nínízin? T'áá ákogi ánísht'éii éí Diyin God biláahgo át'é, diníigoósh ádíní?

³Jó, ádíní, T'áadoo ádił asésiihgóó ha'át'íí bee nídidíílééł índa ádił asésiihgo biláahgo ha'át'íí shaa doodił?

⁴Áko ni lá áádóó nik'isóó danilíinii bił nihich'į' hahideesdzih.

⁵Shoo, yót'áahdi hiníláii níníł'į́ índa niláahdi k'os deílzhoodígíí níníł'į́.

⁶Ádił asínísiihgo haash yit'éego Diyin God bik'ijį' nílį́? Bee haz'áanii hítíihgo t'óó ahayóí yileehgo bee Diyin God haa nił'į́?

⁷T'áá ákogi ááníiłgo bee ha'át'íí Diyin God baa hínííł? Ha'át'íí éí nits'ą́ą́dóó néidiyiilé?

⁸Doo yá'áshǫ́ǫ́góó ááníłígíí t'áá éí bee diné t'áá nigi át'éii atíní ł'į́, áádóó t'áá ákogi ááníłígíí bee éí diné nilíinii bá í'iideeł.

⁹T'óó ahayóí bee ade áhólzinii biniinaa diné saał hahóół'á; Ayóó ádabóodziilii hach'į' nidahwiiłnánígíí bąą nihíká oohjeeh, daaní.

¹⁰Nidi Diyin God áshiilaii éí tł'ée'go sin eidii'aahii háájí lá ííyá? doo níní da.

¹¹Éí nihokáá'góó naaldlooshii danilíinii yiláahgo nanihinitin; tsídii wót'áahdi naaldeehii biláahgo dahoniidzą́ągo ádanihile'.

¹²Diné sodadilzin nidi doo yá'ádajíshóonii ádaa dahoji'niihígíí bąą bich'į' doo ééhoosįįh da.

¹³T'áadoo biniyéhígóó sohodizingo t'áá aaníí Diyin God doo yidiits'a' da, índa Aláahgo Ayóó'ábóodziilii doo yik'ítsídíłkees da.

¹⁴Azhą́, Doo yideestséeł da, diníi nidi, bidááhdóó nidíínááł; éí bąą baa dzíínílíigo hiníná.

¹⁵Díí k'ad hoolzhishígíí biyi' Diyin God báháchįįhgo doo até'éł'į́į dago áádóó bee haz'áanii doo yik'eh dahół'ínígíí doo yaa ákonízin dago biniinaa

¹⁶Job t'áadoo biniyéhígóó hayánídíníltih; t'áadoo bił bééhóziní saad t'óó ahayóí t'óó ałkéé' néidiłt'ih.