Read Navajo JOB 36 Bible Online

JOB 36 - Navajo bible

JOB 36

¹Áádóó Iiláíhu t'áá yááłtihgo ání,

²T'áá áłts'íísígo ha'íínílní; łahgo nił ííshją́ą́ ánááháshdlééh, áko Diyin God bá saad bee hahideesdzihígíí t'ahdii ła' shee hólǫ́.

³Doo nádiinághánídę́ę́' shił bééhoozinígíí éí k'ad baa hodeeshnihgo Áshiilaii t'áá ákogi át'éii nilį́įgo ííshjání ádeeshłííł.

⁴Háálá shizaad t'áá aaníí doo wooch'ííd ádaat'ée da; t'áá ałtsojį' bił ééhózinii kǫ́ǫ́ nihił hólǫ́.

⁵Jó, Diyin God ayóó át'éii nilį́, índa ła'da doo yi'į́į da; bidziilii índa hódzą́ yee ayóó át'é.

⁶Diné doo yá'ádaashóonii doo t'áá dahináago áyósin da, nidi diné badahojoobá'íii éí t'áá ákogi ádaat'éii yeidii'aah.

⁷Doo áá hoot'įįhgóó diné t'áá ákogi ádaaníiłii yik'i déez'į́į́'; aláahgo naat'áanii danilíinii bikáá'dóó nahat'áii yikáá' dah náhidinoobįįłii hool'áágóó yił dah naháaztą́ągo ayóó át'éii nidahaleeh.

⁸Áádóó béésh da'ahólzha'í bee dah dabi'diistł'ǫ́ǫgo índa ach'į' nahwii'ná bitł'óól yiih hekáahgo

⁹áadi índa baa nidajikaígíí áádóó bee haz'áanii k'ídajizti'ii bee ádaa daha'niihígíí yee hoł halne'.

¹⁰Índa bínahodí'nóoltįįłii dadzíists'ą́ą'go áhooł'įįh, áádóó, Doo ákwii ádaot'ínígíí bits'áhóhkááh, yiłniih.

¹¹Bik'eh dahojíł'į́įgo áádóó bá nidajil'a'go yá'át'éehgo ahódeidoołkááł, áádóó hoł dahoneenigo ałtso hwee nídahidoohah.

¹²Doo ak'eh dahojíł'į́į́góogo t'óó diltłish bee nidahodi'dootsił áádóó t'áadoo hoł béédahózinígóó dazhdínóonééł.

¹³Bijéí yee doo Diyin God yik'eh ádaat'éii éí t'óó báhádzidgo bee atí'oolnííł ade ádayooliił; Diyin God atíbiił'įįhgo doo yich'į' sodadilzin da łeh.

¹⁴T'áá ániid nidaakaigo daniné índa t'óó baa'ihígi áda'ahil'į́įgo nida'iiłdįįh.

¹⁵Badahojoobá'íii bich'į' nidahwii'náago yisdáyiinííł, áádóó bide ádahólzinígíí binahjį' da'íists'ą́ą'go áyósin.

¹⁶T'įįhdígo haz'ą́ ade áhósindę́ę́' hóteelgo haz'ą́; diné doo ade áhólzinjį' nił íí'áázh, áádóó nibikáá' adání bikáa'gi ch'iyáán bee áda'azįįdgo áyiilaa.

¹⁷Nidi diné doo yá'áshóonii bee baa náhódóot'įįłii bee ná bihoolyaa; aa hwiinít'į́ índa t'áá ákogi át'éii bik'ehgo nénálkáá'.

¹⁸T'óó báhádzidgo atídoolíłígíí bits'ąą ádaa áhólyą́, áko anoonééł doo yee nahjį' kóndoolíił da. T'óó ahayóí nik'é niilyáa nidi, doo bee yisdádíínáał da.

¹⁹Da' nit'ínígíísh t'áá íiyisí ná ílį́įgo yaa nitsíkees dooleeł? Nidaga', óola dooda, bee adziilii nidi t'áá ałtso doo ílį́į da.

²⁰Diné áádįįłgo ákót'éego tł'é'ígíí éí t'áadoo bídin nílíní.

²¹Ádaa áhólyą́; doo ákwii ánáánáo'nééh lágo; jó, ach'į' nahwii'ná bitsásk'ehgi doo ákwii át'éii nidííní'ą́ą́ nít'éé'.

²²Jó, Diyin God bibee adziilii yee ts'ídá aláahgo ayóó át'é; Diyin God na'nitinígi át'éego háísh ła' ákót'éego nazh'nitin?

²³Diyin God doo ła', Kónínééh, biłníní da. Áádóó doo ła', Doo ákwii át'éii íinilaa, biłníní da.

²⁴Shą́ą́', Diyin God binaanish bee diné baa dahaniihgo dahótálígíí éí bee Diyin God baa hóniih.

²⁵Nihokáá' dine'é t'áá ałtso Diyin God ááníłígíí deiníł'į́; doo bit'ááh jóya' át'éégóó deiníł'į́.

²⁶Jó, Diyin God ts'ídá aláahdi át'éii nilį́ áádóó át'éii doo t'áá át'é nihił bééhózin da, áádóó naalkaahgo ákwíí binááhaígíí hoł béédahodoozįįłgo doo bídajíighah da.

²⁷Háálá nihokáá'dóó siil dah nídiildohgo ííł'į́, áádóó t'áá éí siil níłtsą́ nináhádleehgo naałtingo ííł'į́.

²⁸K'os bits'ą́ą́dóó nihokáá' dine'é bik'ijį' lą'í nídahodiłtį́įhgo ííł'į́.

²⁹K'os nídiilkǫǫhígíí índa yót'áahdi adi'nínígíí ła'da doo yik'idiitįįh da.

³⁰Jó, t'áá bí binaagóó nida'dilch'ilgo ííł'į́ áádóó tónteel biyaadi haz'ánígíí bik'i ditą́ągo ííł'į́.

³¹Jó, diné yá nihwii'aah índa ch'iyáán t'óó ahayóí yeidiyii'aah.

³²Áádóó bíla' t'áá ałch'ishjí yee atsiniltł'ish anáyiiłta'go yídínóotahjį' yi'iiłnííh.

³³Da'di'níigo éí hoołtį́łígíí yaa halne', áádóó béégashii éí da'di'níigo hoołtį́łígíí yaa ákódanízin.