Read Navajo JOB 37 Bible Online

JOB 37 - Navajo bible

JOB 37

¹Áko da'di'nínígíí bik'ee shijéí dilyisgo nitseeltłi'.

²Hahadziihgo da'di'nínígíí áádóó hahadziihgo hodiits'a'ígíí ts'ídá hazhó'ó yísíníłts'ą́ą́'.

³Yót'áahdi da'níłts'ą́ą́'góó adahosiilts'įįhgo ánáyiil'įįh áádóó nihokáa'gi t'áá ałtsogóó atsiniltł'ish tanooshzhee'go ánáyiil'įįh.

⁴Áádóó bik'ijį' ayóó át'éego adi'níigo biinéé' bee anáhosiilts'į́į́h; biinéé' diits'į́įhgo éí atsiniltł'ish anídahata'ígíí doo ánéísįįh da.

⁵Diyin God biinéé' t'óó bik'e'ayóigo bee da'di'ní; ayóó át'éii áyoolíłígíí doo t'áá yíní át'éejį' nihił béédahózin da.

⁶Yas ííłní, Nahasdzáán bikáa'jį' díchííł. Ni'dizhoołígíí índa ayóó át'éego nahałtinígíí ííłní, Ni' t'ózhoł, índa, Bidziilgo nidahółtin.

⁷Diné t'ááłá'í nítínígo bindaanish ni' kónáyiil'įįh, áko honaanish nilíinii diné t'áá ałtso yaa ákodahiniizįįh.

⁸Áko índa nidaaldlooshii a'áán góne' anídahajeehgo áadi nídabeehah.

⁹Shádi'ááhdę́ę'go nááts'ó'oołdísii nídadilwo', áádóó náhookǫsdę́ę'go éí nídadiłk'as.

¹⁰Diyin God biyol bee tó nídaatį́į́h; be'ek'id naazyínígóó tó nídaatį́į́h.

¹¹Tósiil éí k'os diłhił yii' háidiłbį́į́h, índa k'os diłhił biyi' da'níłts'ą́ą́'góó atsiniltł'ish anídahata'go ííł'į́.

¹²K'os yich'į' hahadziihgo naanídeílzhoodgo áyósin, áko nahasdzáán nidahonees'ą́ą́góó dine'é kéédahat'į́į́góó t'áá ałtso bohoolnííł.

¹³Nihokáá' dine'é hasht'éédoolnííł biniyé, doodaii' bee nídahwiidootsoh biniyé, doodaii' nihokáá' dine'é yaa a'ááh nízin doo biniyé nídahodiłtį́įhgo áyósin.

¹⁴Shoo, Job, díí yísíníłts'ą́ą́', ge', t'óó bida'ayóigo Diyin God binaanish danilíinii baa nitsíníkees.

¹⁵Diyin God binaanish ła'yiyiilaaígíísh nił bééhózin, áádóó k'os diłhił biyi'dóó atsiniltł'ish anídahata'go inídíłdla'go ánáyiil'įįhígíísh nił bééhózin?

¹⁶K'os dah deílzhoodgo áyósinígíísh nił bééhózin? Ts'ídá t'áá yíní át'éegi bił ééhózinii éí t'óó bi'ayóigo binaanishígíísh nił bééhózin?

¹⁷Shádi'ááhdę́ę́' dich'ihgo nihokáá' hodéezyéelgo, éé' bee honeezílíii biih nánídáahii nílíinii,

¹⁸béésh nídoolyį́į'go bii' adéest'į́į́' bidziilgo ályaaígi át'éego Diyin God bił yá dah dííłbałígíísh bíninil'ą́?

¹⁹Bee bił dahodiilnihígíí bínanihiníłtin; jó, t'óó nihił daatł'ée'go biniinaa saad ałkéé' nidadii'niłgi doo bídaniil'ą́ą da.

²⁰Hadeesdziihígíísh bee bił hodoonih? Diné ła' áshídi'dooldįįłísh dínóozįįł?

²¹Áko ałtso iiyołdóó yóó'ahalzho'go yádiłhił biyi'dę́ę́' bee adinídíinii éí diné doo jinóoł'į́į́' át'ée da.

²²Óola biisdííłtóolii nahalingo náhookǫsdę́ę́' ayóó ánóolninii hahwiileeh; Diyin God éí t'óó bik'e'ayóigo binaagóó haz'ą́.

²³Aláahgo Ayóó'ábóodziilii doo bik'ídaniikáah da; ayóó át'éego ayóó ábóodziil áádóó doo haa dayit'éii át'é, índa t'áá ákogi át'éii t'óó ahayóígíí binahjį' doo ade áhósin da.

²⁴Éí bąą nihokáá' dine'é dabidósin; nihokáá' dine'é honisą́ danízinii doo bił nilį́į da.