Read Navajo JOB 38 Bible Online

JOB 38 - Navajo bible

JOB 38

¹Ákohgo nááts'ó'oołdísii biyi'dę́ę́' Bóhólníihii éí Job yich'į' haadzíi'go ání,

²Háíyee' saad doo bił bééhózingóó na'ak'íyáti' éí doo béédahózingóó áyoolííł?

³Diné ninísáanii nahalingo k'ad áká nílzis; nanídídéeshkiłgo bee shił hodíílnih.

⁴Nahasdzáán niłdzilgo áshłaa yę́ędą́ą́'shą' háadi nanináá nít'éé'? Bik'idi'nitą́ągo bee shił hólne'.

⁵Nił bééhózingo háí nahasdzáán yída'nééł'ąąd? Nahasdzáán áníłtso dooleełgi háí yí'nééł'ąąd?

⁶Ha'át'íí nahasdzáán bee niłdzilgo dah si'ą́? Éí doodaii' háí tsé bee naaná'ástł'inii niiní'ą́?

⁷Íídą́ą́' hayoołkááł sǫ' dahataałgo Diyin God bidiyingo nidaal'a'í t'áá íiyisí bił dahózhǫ́ǫgo dahóótáál.

⁸Nahasdzáán biishch'id bii'dę́ę́' tónteel deeshchoshgoshą' háí t'ą́ą́' áyósin dooleełgo bidáń'da'ditį́įhii yich'ą́ą́h dádeideeztą́?

⁹K'os éí tónteel bi'ée'go índa chahałheeł bik'ídeesdizgo áshłaago

¹⁰índa tónteel nidahaazyį́į dooleełjį' bá haasdzíi'go dáń'da'dilkał índa bich'ą́ą́h dah nída'atį́įhii ákǫ́ǫ́ nihínilgo

¹¹ábidííniid, Kónízahjį' nisooyį́į doo; bilááhgóó éí dooda, índa wołk'oołígíí éí kónízahjį' wołk'ooł doo.

¹²Job ni' dizhchį́į́dóó wóshdę́ę́', K'ad haidoołkááł, dííníniidísh? Índa hwiidool'įįłígíísh bił bééhózingo íinilaa?

¹³Áko nahasdzáán nidahonees'ą́ąjį' diné doo yá'ádaashóonii t'áá náhool'įįh bik'eh nahasdzáán bił néiga'go náábidii'nił doo.

¹⁴Hashtł'ish bik'ini'ít'ánígi át'éego índa éé' naashch'ąą' nahalingo nahasdzáán bikáá' hool'įįhgo ééhoozįįh.

¹⁵Diné doo yá'ádaashóonii bá adinídínígíí t'ą́ą́' kóolzin, áádóó bigaan yee ádaa dadzódlíhígíí bits'ą́ą́' dahaatííh.

¹⁶Tónteel bitł'áahdi tó hadaazlį́į́góósh nisíníyá? Índa tónteel bitł'áahdi doo dahoot'íní góyaásh nisíníyá?

¹⁷Da' aniné bidáń'dítį́hí t'áásh nił ííshją́ą́ ályaa? Áádóó aniné bichaha'oh bidáń'dítį́hí t'áásh yiniłtsą́?

¹⁸Nahasdzáán áníłtsooígíísh t'áá nił bééhoozin? Díí t'áá ałtso nił bééhózingo bee shił hólne'.

¹⁹Háadi lá adinídíín bighangóó atiin? Háadi lá chahałheeł bá haz'ą́?

²⁰Áko bá nahós'a'jį' daats'í ninádííjih, índa bighangóó atiinígíí daats'í nił bééhózin doo.

²¹Nił bééhózin lą́ą, háálá íídą́ą́' ni'dizhchį́ áádóó t'óó ahayóí niiską́!

²²Yas bá hooghan góne'ésh t'áá yah ííníyá? Éí doodaii' níló bá hooghanísh t'áá yiniłtsą́?

²³Éíyee' ach'į' nahwii'ná áádóó ałk'éé dajiijah índa anaa' náhádleeh biniyé áá sésįįd?

²⁴Ha'át'íí honít'i'iishą' bee ałts'á'diidlaad? Doodaii' ha'át'íí honít'i'iishą' bee ha'a'aahdę́ę́' níyol ni' bikáá'góó tanáyooghas?

²⁵Ayóó át'éego nidahałtingo háishą' tó yíląąd yá na'azgeed, doodaii' háishą' éí atsiniltł'ish anáháta'go bee da'di'níigo áyiilaa?

²⁶Áko kéyahgóó diné doo kéédahat'į́įgi nahałtin doo, áádóó honoojíígóó diné doo ła' kééhat'į́įgi nahałtin doo,

²⁷áádóó náhodiiniichii'go doo naagháhígóó haz'ánígi kéyah bił hózhǫ́ǫ doo, índa ákwii ch'il hadínóot'į́į́ł biniyé ákǫ́ǫ́ nídahodiłtį́į́h.

²⁸Níłtsą́ą́sh bizhé'é hólǫ́? Índa dahtoo' nidahidilch'ą́łígíísh háí bá bi'dizhchį́?

²⁹Háishą' biishch'id bii'dę́ę́' tin hazlį́į́' áádóó wódahdę́ę́' shooígíí éí háí bishchį́?

³⁰Tó éí tsé nahalingo yitł'is, áko tónteel bikáá'góó hatį́į́h.

³¹Dilyéhé t'áá ahídahidííłtł'óołgoósh bíninil'ą́? Doodaii' t'áá bá níhánígóó sǫ' náánáshjaa'ígíí éí ałch'į' kódabósinígíísh t'áá k'e'díí'ałgo bíninil'ą́?

³²T'áá ahééhwiidááh bik'eh sǫ' ałkéé' deíkááh íínísin doogoósh bíninil'ą́? Doodaii' náhookǫs índa t'áá bá níhánígóó sǫ' náánáshjaa'ígíísh ałkéé' deíkááh íínísin doogoósh bíninil'ą́?

³³Yót'ááh hiníláii bibik'eh hoogáałiísh nił bééhózin? Nihokáa'giísh t'áá éí bee bídahólnííh ádíílíiłgo bíninil'ą́?

³⁴K'os bich'į' yéego háínídzíi'goósh t'óó ahayóí nee nahodoołtį́į́ł?

³⁵Atsiniltł'ish anídahata' ádíílíiłgo, Kǫ́ǫ́ lá honiidlǫ́ ni, dandidooniiłgo ádíílíłígíísh bíninil'ą́?

³⁶Háí éí hódzą́ iih yiyíílá? Doodaii' háí éí ak'idi'yiitįįh ajéí yeidiní'ą́?

³⁷Háísh hóyą́ągo k'os yídóołtahgo yíneel'ą́? Háísh wódahdi tó abid yadeidiyooziłgo yíneel'ą́?

³⁸Łeezh dibahí nilk'įhgo nitł'iz yileehgo áádóó hashtł'ish t'áá íiyisí ahídadiiłgą́ąhgo bik'ijį' háísh tó abid yadeidiyooziłgo yíneel'ą́?

³⁹Náshdóítsoh bitsiijį' daditł'ooígíí yidoolghałii bá hadíílzhahgoósh bíninil'ą́? Doodaii' biyázhí nídabidínííłchałgoósh bíninil'ą́?

⁴⁰Éí bi'áán góne' shijée'go, doodaii' nidant'ingo bimá yiba' shijée'go nídabidínííłchałgoósh bíninil'ą́?

⁴¹Ch'iyáán ádinígíí biniinaa gáagii biyázhí naa nídeít'áahgo Diyin God yich'į' daachago háísh ya'doołtsoł?