Read Navajo JOB 39 Bible Online

JOB 39 - Navajo bible

JOB 39

¹Tsétah tł'ízí nida'iiłchíihgoósh nił bééhózin? Bįįhtsa'ii nida'iiłchíihgoósh hanisííd?

²Ida'niiltsąąhdóó díkwíí nídízi'go nida'iiłchíhígíísh nił bééhózin? Doodaii' ts'ídá ákwe'é hoolzhishgo da'doołchíłígíísh nił bééhózin?

³Da'doołchííł biniyé dahinteehgo biyázhí nidahwiileeh. Áajį' bik'i dahwiildóóh.

⁴Biyázhí bidziil nidahaleeh áádóó hootsogóó nidaakaigo nitsaaz nidahaleeh; t'áá áádóó dah dahidiikáahgo bimá doo yaa ninádahakáah da.

⁵Háí t'éiyá télii ałchinii doo bidahodiit'i'góó áyiilaa? Háí t'éí yideideezhchidgo t'áá bí nízinígóó nidaakaigo áyiilaa?

⁶Éí honoojítahgi bikéyah dooleeł biniyé baa diní'ą́, áádóó táháníí' hólǫ́ǫgi nidaakai dooleełgo áshłaa.

⁷Kin haal'áajį' doo hoo'į́į da; diné oołbąsii háádílwoshgo ts'ídá t'ah doo yidiits'į́įh da.

⁸Dziłdi dahootsogóó na'ałchozhgo háádiidááh; ch'il ániid hanoot'áanii t'éí haintáago na'ałchozh łeh.

⁹Béégashii ałchiniísh íinízingo t'áá bee nidíílnish? Doodaii' nibéégashii nída'ałchosh góne'ésh t'áá biidoołkáałgo át'é?

¹⁰Tó daneets'ee' doo biniyé bee hahodiyííłdlałgoósh bíninil'ą́? Doodaii' nidá'ák'ehgi nahaghazí yooshołgoósh ádíílíiłgo bíninil'ą́?

¹¹T'áá íiyisí bitsxe'ígíísh bee baa dzíínílíi doo? Doodaii' ninaanishísh baa didíí'ááł?

¹²Da' nitł'oh naadą́ą́' habíná'íł'isíjį' tł'oh naadą́ą́' t'áá ná niidooyéełgoósh baa dzíínílíigo át'é?

¹³Tsídii ástrich wolyéii bit'a' baa dzólníigo yíłbal. Bits'os ayóó ánóolninígíí ayóó'ó'ó'níinii yaa halne'.

¹⁴Háálá biyęęzhii t'áá ni'góó niyiiníiłgo nahasdzáán éí ayęęzhiígíí deineesdogo

¹⁵ła'da yik'i didooltałgo yidoołts'ił, doodaii' naaldlooshii ałchinii yik'i nidookahgi t'óó yaa náyoo'nah łeh.

¹⁶Doo bíí' danilį́į da nahalingo biyázhí t'áá na'níle'dii áyooł'įįł; azhą́ t'áadoo biniyéhígóó ałchíih nidi, doo bik'ee bił yée' da.

¹⁷Biniinaa át'éhígíí éí Diyin God hódzą́ t'áadoo beidiní'ą́ą da, índa ak'idi'yiitįįh dooleełgo t'áadoo ábiilaa da.

¹⁸Bit'a' de áyiił'įįhgo nídiilwo'go łį́į́' áádóó bił yilwołígíí t'óó yeidloh łeh.

¹⁹Łį́į́'ísh bidziilgo ádanile'? Bik'osísh ayóó ábóodziilgo ádanile'?

²⁰Nahachagiitsoh yááhiichahígi át'éegoósh łį́į́' dah náníljį́įhgo ádanile'? Í'díłtł'iidgo t'óó báhádzid łeh.

²¹Bidziilígíí bąą biinéigo honíts'aa' góyaa bik'étł'iin diits'a', áádóó atah nidoobah biniyé da'ahijigánígíí yidááh yilwo'.

²²Yéé' t'óó yeidlohgo doo náldzid da, índa diltłish nidi doo yik'ee nát'ą́ą́' hadoolwoł da.

²³Booshk'iizhdę́ę́' k'aayééł áádóó tsiidétáán índa tsin k'aabéésh bighą́ą́h dí'áago bik'i nizdidlaadgo ahídadínídahgo dadiits'a' łeh.

²⁴T'óó báhádzidgo índa t'óó bik'e'íyée'go ni' bidinínáágóó ahildóohgo yilwoł łeh; deenásts'aa' bidee' bee í'dílzoołí áníigo doo yaa ná'áhodílt'į́į́góó doo niiltłáad da.

²⁵Deenásts'aa' bidee' bee í'dílzoołí áńdí'niihgo, Háháa, ní nahalin łeh. Doo nádíinágháníjį' anaa' dandzinii yiłchin! Siláo binanit'a'í dadilwoshgo áádóó siláo ałt'ááh yijahgo yidiits'į́į́h.

²⁶Nibee hódzą'ásh bee ginítsoh nahashkáa'go naat'a', áádóó shádi'áahjigo ahet'ááh?

²⁷Da' ni handzihgoósh atsá dah diit'ahgo níléí wódahdi bit'oh áhooł'įįh?

²⁸Tséghą́ą'di kééhat'į́įgo áadi dah sidáa łeh; tsénít'i'ígíí bohoníłdzilgi tsédáa'gi kééhat'į́.

²⁹Áádę́ę́' yidoolghałii doo nádíinágháníjį' dayiiłtse'.

³⁰Biyázhí ałdó' dił hadayiits'ǫǫs łeh. Ha'át'íhída naaztseedgo atsá ákwii naagháa łeh.