Read Navajo JOB 4 Bible Online

JOB 4 - Navajo bible

JOB 4

¹Áko Tííman kin haal'áádóó Élifaz wolyéii ánááhodoo'niidgo ání,

²Eii nił nabik'íyádeiilti'goósh bik'ee nídidííltał? Nidi háísh t'áadoo hadoodzihgóó yíneel'ą́?

³Jó, diné lą'í nanínítą́ą'go dabidziilgo áńdeindlaa.

⁴Diné ni'iisíihii nizaad yee doo ni'iisíih da nít'éé'; diné bitah doo dahółdzilii dabidziilgo ádeinilaa.

⁵Nidi k'ad, ninaa hoolzhiizhgo doo ha'íínílníi da; yáadi shį́į́ nihodiiłt'i'go t'óó nide áhoot'é.

⁶Da' doósh Diyin God díínísinígíí bee baa dzíínílíi da? Da' doósh t'áá ákóne' ánít'éhígíí bee nił chohoo'į́į da?

⁷K'ad díí béénílniih, nánooshkąąh: háí diné shį́įshą' doo ádihodiilt'i'góó hool'áágóó ti'hoonííh, índa háadishą' diné doo bina'adlo'góó yá'át'éehgo yigáałii ábi'disdįįd?

⁸T'áá yiiłtsánígi át'éego doo ákwii é'ét'éii yił nidahwiiłdlaadii índa doo yá'áshóonii k'ideidiléii t'áá éí nídeiyizh.

⁹Diyin God hwiiyołgo bee ájoodįįł, índa hach'į' báháchį'ígíí biyol bee ahizhdik'ą́ą́h.

¹⁰Diné doo yá'ádaashóonii náshdóítsoh bitsiijį' ditł'ooii bii' nahodi'ni'ii nahalingo áádóó náshdóítsoh bitsiijį' ditł'ooii báhádzidígíí áníinii índa dabiyázhí dabiwoo' daheestǫ'go dadiiłheel.

¹¹Náshdóítsoh bitsiijį' ditł'ooii ch'ééh naashzhee'go t'óó dichin bidiyoołhééł áádóó náshdóítsa'ii bitsiijį' ditł'ooii biyázhí t'óó taidoolwoł.

¹²Hane' ła' t'áá nahont'inee bee shił hóone'; bee shijeeh anoot'ą́ągo diséts'ą́ą́'.

¹³Diné t'áá íiyisí da'iiłhaazhgo tł'ée'go shił ádzaaígíí baa nitséskeesgo

¹⁴shił yéé' hazlį́į́' áádóó dah náshtǫǫhgo shitah hodiisnáa'go shitah hoditłid.

¹⁵Ha'át'íí shį́į́ léi' bídíníshyęshgo shitáshtł'oh nídiijéé'.

¹⁶Éí ha'át'íí shį́į́ t'áá ákǫ́ǫ́ yiizį', nidi ga' ch'ééh bééhonisįįh; t'áadoo bahat'aadí kǫ́ǫ́ shidááhgóó sizį́, nidi ga' doo íits'a'í da, áko ła' hadzoodzíi'go ájíní,

¹⁷Diné dadootsaałiísh Diyin God yiláahgo t'áá ákogi át'ée doo? Diné ábiilaaísh ábiilaaígíí yiláahgo ba'át'e' ádingo hináa doo?

¹⁸T'áá bá nidaal'a'í nidi doo yaa dzólíi da; bidiyingo nidaal'a'í nidi nida'iisíihgo yik'éhá'ááh.

¹⁹Hashtł'ish bee ádabi'diilyaii yee dahináanii éí łeezh bits'ą́ą́dóó ályaii ch'osh ałchozhiigi át'éego łeeh béhégíiłii t'ah yówehgo doo yaa dzólíi da.

²⁰Abínídóó níléí e'e'áahjį' áho'dooldįįł; ła'da doo haa ákonízingóó hool'áágóó ájoodįįł.

²¹Bee dabidziilii nahjį' kódaal'įįhgo t'ah hódzą́ t'áágééd daniné.