Read Navajo JOB 41 Bible Online

JOB 41 - Navajo bible

JOB 41

¹Łóó' bee hahadleehiísh bee Liiváíyathan wolyéii hadííloh bíninil'ą́? Doodaii' tł'óółísh bee bitsoo' yaa ádíílíiłgo bíninil'ą́?

²Tł'óółísh bee bíchį́į́h bighádííłt'ihgo bíninil'ą́? Doodaii' béésh názhahiísh bee biyaats'iin dííshahgo bíninil'ą́?

³T'óó ahayóidiísh nániidookąął? Łínidilchíigoósh nich'į' yáłti' doo?

⁴Da' niłísh aha'didoot'ááł? Da' hool'áágóósh ná naal'a' doo biniyé nídidííłtééł?

⁵Tsídii bił naninéhígi át'éegoósh bił naninée doo? Asdzání ná nidaal'a'í nideilóoz doo biniyé bee naadlóoziísh bizéédííłt'ih?

⁶Dabizlohiísh yee áda'doosįįłgo dabidoolghał? Baa nida'iiniihii bich'į' nidahidoonihiísh biniyé ałtaidoolgish?

⁷Da' tsiidétáán bee bikágí baa anoolzhee'go ádíílíiłgoósh bíninil'ą́? Doodaii' łóó' bee hadah hadleehí deeshzhaaígíí bee bitsiits'iin baa anoolzhee'go ádíílíiłgoósh bíninil'ą́?

⁸Yiisxił; ahíínígą́'ígíí béénílniih; ts'ídá doo ákónáádíí'níił da.

⁹Jó, diné bił chohoo'į́įgo nitsíkeesii t'áadoo biniyéhí da yileeh; t'óó dziiłtséeh nidi, bik'ee hąąh nahaka'.

¹⁰Báhozhdoołchįįłgo doo ła' náznílyéesgo baa nízhdóot'įįł da; ákoshą' háí t'éí shidááhdóó yidoozįįłgo yíneel'ą́?

¹¹Háísh éí t'áadoo le'é sheiníláago bich'į' niná'deeshdlééh? Yá'ąąsh biyaagi t'áá át'é t'áá ha'át'íhída dahólóonii éí t'áá ałtso shí.

¹²Liiváíyathan bijáád áádóó ayóó ábóodziilígíí índa bits'íís nizhónígo hadiilyaaígíí doo t'óó bił dííníshhéélgóó baa hashne'.

¹³Bikágí éí háí yik'iidoozǫ́ǫsgo yíneel'ą́? Áádóó bikágí naaki ałk'i sikaadígíí éí háí béésh bee bigházhdoołgołgo bízhneel'ą́?

¹⁴Háishą' bizéé' ąą ázhdoolíiłgo bízhneel'ą́? Biwoo' jiníł'į́įgo t'óó báhádzid.

¹⁵Bííghą́ą́dę́ę́' éí naagé náásee ałk'i hadah haazkaadgo, áádóó ahídadiiljéé' nahalingo hadiit'i'go yee ádaadzódlí.

¹⁶T'áá íiyisí áhánígo ahininínilígíí bee doo yah íích'i da.

¹⁷Ahineestihgo diwolígíí bąą doo ałts'á jónííł át'ée da.

¹⁸Háts'íhyaa níigo inídídla'; bináá' éí naaniiníłkánígíí nahalin.

¹⁹Bizéé'dę́ę́' honooyééł hadahidinood áádóó tsííd hidiłdaas.

²⁰Teeł dook'ą́łígi át'éego áádóó tó yibézhígi át'éego bíníí'dę́ę́' łid hahíítį́įł łeh.

²¹Biyol éí tsííd dook'ą́łígíí nahalin índa bizéé'dę́ę́' kǫ' hadino' nahalin.

²²Bik'os t'áá íiyisí bitsxe', índa bik'ee bitah dahoditłidii bits'ą́ąjį' yóó'ahijeeh.

²³Bitéél gónaa bikágí daneelk'oolígíí doo hizhdóółnááł át'éégóó t'áá íiyisí ahineestidgo nitł'iz.

²⁴Tsé nitł'izígi át'éego índa tsé daashjée'gi át'éego bijéí nitł'iz.

²⁵Nídii'nahgo ayóó ádahóodziilii bik'ee nídadzildzííh; t'óó bił ádahadįįhgo t'áadoo ánáádao'ne' da łeh.

²⁶Azhą́ diltłish baa ajiłgéed nidi, doo baa iijíił da, índa tsiidétáán áádóó k'aa'da índa k'aabéésh tsin bighą́ą́h dí'áii doo ła' baa iijíił da.

²⁷Béésh nitł'izii éí tł'oh naadą́ą́' bitsǫz nahalingo yaa nitsíkees, índa béésh łitsoii éí tsin shih silį́į'ii nahalingo yaa nitsíkees.

²⁸K'aa' doo dah bidíníiłchéeh da; tsé bee dazhditł'į́hígíí éí tł'oh naadą́ą́' behégod nahalin.

²⁹Tsihał éí tł'oh naadą́ą́' behégod nahalingo yaa nitsíkees; tsiidétáán anáhálghą́ąhgo diits'a'ígíí t'óó yeidloh.

³⁰Ásaa'ts'iil sits'ilgo áádahashchxii'ígíigi át'éego bitéél hodeelzhah; tł'oh naadą́ą́' bik'i naalzhoodí nahalingo hashtł'ish yikáá' yi'nah łeh.

³¹Ásaa' bee abézhígi át'éego tónteel yiłbéézh; tónteel éí ak'ah yibéézh nahalingo ííł'į́.

³²Oołkǫ́ǫłgo éí bikéé'dę́ę́' táłkáá'góó adzoogaigo áyiił'įįh; éí ła'da yiyiiłtsą́ągo néigahgo yąąh tsídookos.

³³Doo bił yée' daígi át'éego nihokáá'góó naaldeehii doo ła' ákót'éhí da.

³⁴Ayóó ádaat'éii t'áá ałtso yik'i yaadéez'į́į́'; diné ádaa daha'niihii t'áá ałtso yinant'á.