Read Navajo JOB 42 Bible Online

JOB 42 - Navajo bible

JOB 42

¹Ákohgo Job éí Bóhólníihii ánéidoo'niidgo ání,

²T'áá ádeeshłííł nínízinígíí t'áá ałtso áálíiłgo bíninil'ą́ągo shił bééhózin índa nitsáhákees doo nits'ąąh nazhnóoł'į́į́' át'ée da.

³Háíyee' saad t'áadoo bił bééhóziní kót'éego níinii doo bééhózingóó áyoolííł? Éí bąą t'áadoo le'é shá ayóó ánoolningo doo shił bééhózinígíí áádóó doo bik'idiishtįįhígíí bee haasdzíí' lá.

⁴Shá didííts'į́łígíí baa nánooshkąąhgo hadeesdzih; nanídídéeshkił áádóó shił náhodíílnih.

⁵T'óó jaa'eego naa hodiists'a'go hoolzhiizh, nidi k'ad shináá' bee ninísh'į́;

⁶éí bąą t'óó shaa'ihgo índa łeezh dibahí áádóó łeeshch'iih ádééhésjáahgo Diyin God bich'į' łahgo át'éego tsíndíkééz.

⁷Kót'éego Bóhólníihii éí Job yich'į' hahaasdzíí'dóó bik'ijį' Bóhólníihii éí Tííman kin haal'áádóó diné Élifaz wolyéii ííłní, Ni índa nik'is nidilt'éego doo ákót'éégóó shá hadahisoohdzí'ígíí biniinaa t'óó báhádzidgo shibee atí'él'íinii bee nihich'į' bił tsííkééz, háálá shá naal'a'í Job éí t'áá ákogi át'éego shá hahasdzíi'gi át'éego t'áadoo shá hadasoohdzíi' da.

⁸Éí bąą dóola tsosts'idgo índa deenásts'aa' tsosts'idgo shá naal'a'í Job sidáhígóó dadínóohyoł; áadi shich'į' didlidgo nááhániihii ádá náádahidoołnih, áádóó shá naal'a'í Job éí nihá sodidoolzįįłgo bisodizin dínéesįįł, áko shich'į' doo ákǫ́ǫ́ ádaot'įįdii biniinaa doo atínihideeshłíił da. Jó, doo ákót'éégóó shá hadahisoohdzíí', nidi shá naal'a'í Job éí t'áá ákogi át'éego shá hahaasdzíí'.

⁹Áko Tííman kin haal'áádóó diné Élifaz wolyéii áádóó Shúwah dine'é Bíldad wolyéii índa Néíyama hoolyéédę́ę́' diné Zófar wolyéii dah diikaigo Bóhólníihii ábidííniidígi ádaadzaa; áadi Bóhólníihii éí Job bisodizin yá yidiizts'ą́ą́'.

¹⁰Áko Job bik'isóó danilíinii yá sodoolzingo Bóhólníihii hadaałt'é ánáhoodlaa áádóó t'áá ałtsoní yee hak'ináádzísdli'; áłtséédą́ą́' ajit'į́į́ nít'éé' yę́ę biláahgo naakidi ahą́ą́h nániidlá bíighahgo ajit'į́įgo áhoolaa.

¹¹Áko hánaaíké áádóó hatsilíké áádóó halahkéí danilíinii índa t'ah doo hąąh dahoo'aah yę́ędą́ą́' hwéédahósinii éí t'áá ałtso haa haaskaigo haghan góne' hoł da'ííyą́ą́', áádóó Bóhólníihii bíniik'ehgo doo ákǫ́ǫ́ áho'dool'įįdii biniinaa hak'édí daazlį́į́', áádóó hada'aho'ayoosne', áádóó t'ááłá'í nítínígo béeso índa yoostsah óola bee ályaii haa dayiiznil.

¹²Áádóó Job ániid naagháádą́ą́' Bóhólníihii bik'ijidlíí nít'éé' yę́ę bilááh át'éego náás silį́į'di Bóhólníihii bik'ináádzísdli': dį́į́'tsáadahdi mííl dibé há nanilkaad nít'éé', ghą́ą́'ask'idii éí hastą́ądi mííl nít'éé', béégashii ahąąh naazį́įgo bee nidahwiildlaadii éí t'ááłáhídi mííl índa téliitsa'ii éí t'ááłáhídi mííl.

¹³Áádóó biye'ké tsosts'id índa bitsi'ké táá' nááhásdlį́į́'.

¹⁴Bitsi' átséhígíí Jiimáíma yee yiyíízhi', naaki góne'ígíí éí Kezáíya yee yiyíízhi' áádóó táá' góne'ígíí éí Kéren-hápak yee yiyíízhi'.

¹⁵Áko éí kéyah t'áá náhwiist'ą́ą́ nít'éé' bikáá'góó Job bitsi'ké ayóó ádanóolninígi át'éego t'áadoo asdzání ła' ayóó ánáádanóolniní da, áko hazhé'é éí hánaaíké kéédahat'į́į́góó bikédaayahígíí łahjį' hwíí' dadooleeł biniyé há da'deezoh.

¹⁶Áádóó bik'ijį' Job t'ááłáhídi neeznádiindóó ba'aan dízdiin binínáánááhai, áko haye' danilíinii dadziiłtsą́ áádóó hanálíké ałdó' dadziiłtsą́; t'áá ákót'éego dį́įdi ahą́ą́h ná'ííchíinii dadziiłtsą́.

¹⁷Áádóó Job t'áá íiyisí haastihgo daaztsą́.