Read Navajo JOB 5 Bible Online

JOB 5 - Navajo bible

JOB 5

¹Ná'iinikąąh, ła'da daats'í nich'į' hadoodzih; háí diyingo naal'a'íshą' bich'į' sodidíílzįįł?

²Jó, diné doo áhályáanii hashké nídzinii bizéé' yit'įįh índa diné doo ak'idiitįįhii oołch'į́įdgo biiłhééh.

³Ch'il łeeh níísánígi át'éego diné doo hóyáanii náás ayoo łdiłgo yiiłtsą́, nidi t'áadoo hooyání kééhat'ínígi hóyée'jį' bá haasdzíí'.

⁴Biye'ké éí hasih haz'ą́ bits'ą́ądi doo deeghánídi dahólǫ́ǫgo dáń'dítį́įhgi bich'į' nidahwii'ná, áádóó t'áadoo yisdábóníłí da.

⁵Azneest'áanii diné dichin danilíinii hats'ą́ą́' deiyą́; azhą́ ch'il deeníní bitahdi náneest'ą́ą nidi, áádę́ę́' háádayii'níiłgo deiyą́ índa hanaalye'é aghada'ii'níiłii yaa nahodeeskai.

⁶Ade áhoot'é doo łeeshtahdóó haleeh da, índa ach'į' nahwii'ná doo łeeyi'dę́ę́' haniséeh da;

⁷tsííd yááhiiltaałígi át'éego ach'į' nahwii'ná biniyé diné bi'dichííh.

⁸Diyin God hásht'į́į doo áádóó biniyé ásht'íinii Diyin God baa dideesh'ááł nisin;

⁹ayóó ádaat'éii áádóó doo bééjólkaah ádaat'éii índa t'óó bik'ee ił adahayóii doo jóołta' ánéelą́ą́'góó áyoolííł;

¹⁰níłtsą́ nahasdzáán yaa néidi'ááh, índa kédaayahgóó tó yaa néidi'ááh,

¹¹áko a'ohgo ádaat'éii chánah ádeile', áádóó atinídadindleehii wódahgo sih haz'ą́ąjį' ahikáahgo ádaalne'.

¹²Diné binda'adlo'go indahagizii yąąh nahwiiłkaad, áko yindaalnishii doo bee bada'ídeeł da.

¹³Dahojíyáanii honda'adlo'ii yee nihwiiłnééh áádóó hondahagizii t'áadoo hodina'í baa tsístł'ah jiikááh.

¹⁴T'áá jį́įgo chahałheeł bił ałk'ą́ą́h jiikááh, ałné'é'áahgo éí tł'ée'go ájít'į́ nahalingo nidajildeeh.

¹⁵Diltłish deeníinii nahalingo bizaad dabizǫ́ǫzii índa atída'ał'íinii bits'ą́ąjį' badahojoobá'íii yisdáyiinííł.

¹⁶Áko diné badahojoobá'íii bił chodahoo'į́, áádóó doo t'áá ákwii át'éii t'áá éí bizéé' dáda'deeskaal.

¹⁷Jó, Diyin God éí diné hasht'enináyiidlósígíí bił hózhǫ́; éí bąą Aláahgo Ayóó'ábóodziilii ná'níłtsxisgo doo ji'į́į da,

¹⁸háálá hada'diłniih nidi ákǫ́ǫ́ yąąh áda'ale', tí'diił'įįh nidi bíla' ná'áłdziih.

¹⁹Hastą́ągo bee ach'į' nahwii'ná bits'ą́ąjį' t'áá aaníí yisdánídoołtééł, tsosts'idi aleeh góne'ígíí ałdó' doo naa nídóot'įįł da.

²⁰Dahodííchįįdgo aniné yits'ąą naa áhályą́ą doo; anaa' hazlį́į'go diltłish bibee adziilii yits'ąą naa áhályą́ą doo.

²¹Atsoo' bee atsxis nahalingo doo yá'át'ééhgóó yáti' bits'ąą nandi'nil'in doo índa atída'oolíiłii doo bik'ee niyanahalyiz da doo.

²²Ayóó át'éego atí'oolníiłgo índa dahodííchįįdgo t'óó beídloh doo, áádóó nihokáá'góó naaldlooshii báádahadzidii doo bééníldzid da doo.

²³Dá'ák'ehgóó tséhígíí doo nide át'ée da doo; nihokáá'góó naaldlooshii da'ałchinii doo naa nídaat'į́į da doo.

²⁴Níbaal bii' nighanígíí bee hasht'ehodít'éii át'éego nił bééhodoozįįł áádóó kééhót'ínígi t'áadoo yeinít'ínígóó náníníl'įįh doo.

²⁵Áádóó ałdó' díí nił bééhózin doo: na'áłchíní da'ahílchíihii t'óó ahayóí doo índa ch'il hááhinoot'į́łígi át'éego na'áłchíní yíl'áa doo.

²⁶Tł'oh naadą́ą́' ts'ídá ałtso neest'ánígi át'éego są́ bibadidíínáałgo yóó'ándi'doolnííł.

²⁷Shoo, díí nidasiilkáá', Job nílíinii, áko t'áá aaníí át'é; ná yá'át'éeh doo biniyé yísíníłts'ą́ą'go nił bééhodoozįįł.