Read Navajo JOB 6 Bible Online

JOB 6 - Navajo bible

JOB 6

¹Áádóó Job ánááhodoo'niidgo ání,

²Bik'ee yínííł ánísht'éii áádóó shide áhoodzaii bee dah ní'diidlohí bikáá' dahó'nííł laanaa!

³Áadi lá índa tónteel bibąąhgóó séí yíl'áhígíí biláahgo áníłdáas doo ni; díí lá biniinaa t'áá na'níle'dii hahásdzíi' ni.

⁴Háálá t'áá ałtsogóó Aláahgo Ayóó'ábóodziilii ahishiiłkáahgo k'aa' shinídaaz'á; k'aa' bits'ą́ą́dóó báhádzidgo agháanii shitah hólǫ́; Diyin God bits'ą́ą́dóó bik'eda'íyée'ii shik'ijį' yideest'i'.

⁵Télii ał chiniísh ałchozhgo áníi łeh? Béégashiísh ałchozhgo áníi łeh?

⁶Ch'iyáán doo haalniihiísh áshįįh t'áágééd doodį́į́ł? Doodaii' ayęęzhii dzists'ilgo tó háánahígíísh halniih łeh?

⁷Ch'iyáán kódaat'éii doo nisxin da; ch'iyáán kódaat'éii ná shiigha'.

⁸Bídin nishłínígíí shee hóle' laanaa, índa Diyin God bííníshkeedígíí sheidó'ááł laanaa!

⁹Diyin God bił hóshǫ́ǫgo t'óó shiyółhééł laanaa, áádóó k'ídólchíidgo áshółdįįh laanaa!

¹⁰Kót'éego lą́ą atíshi'dil'ínígíí bii' shik'ihata'go t'áá íiyisí shił hózhǫ́ǫ dooleeł, háálá Diyin nilíinii bizaad t'ah doo bits'ą́ą́jí haasdziih da.

¹¹Ha'át'íishą' bee shidziilgo shił chohoo'į́į doo? Haash yit'éego ni'deeshdįįł, áko t'áá náásgóó nááhinishnáa doo?

¹²Tsé dabidziilii nahalingoósh shidziil? Da' shits'íísísh béésh łitsoii bee ályaa?

¹³Bee ádíká anídeeshwołiísh shii' ádin? Hódzą́ t'áá át'é shits'á deet'ą́.

¹⁴Ła' hak'is atíbi'dil'į́įgo hoł bahojoobá'í doo nít'éé', áko Aláahgo Ayóó'ábóodziilii dílzinii doo yóó'iididoo'áał da.

¹⁵Nidi dabikoohgóó tó ch'ídadziisxaalígi t'áá áko nídahaltsihígi át'éego shik'isóó danilíinii t'óó shinda'alo';

¹⁶éí nahaz'ą́ą́góó tin bee deijį́į́'; éí kódahoot'éégóó yas doo daat'į́į da;

¹⁷ch'ínáłdohgo ádaadįįh, t'áá íiyisí ch'ínáłdohgo háájí shį́į́ daaleeh.

¹⁸Nidahoneeshtł'iizhgóó t'áá áajį' doo béédahoozįįh dago ádin łeh.

¹⁹Tííma dine'é ch'aa deínéhígíí tó hádeidéez'į́į́' łeh; Shííba dine'é ch'aa deínéhígíí tó yik'ídadookahígíí nidayólíigo nidantáa łeh.

²⁰Tó nidayólíhígi daakahgo tó ádingo bichohoo'į́ ádaadįįh, áádóó t'óó bił dahaada łeh.

²¹Áko k'ad, éigi át'éego nihí shich'į' ákódaohdzaa; bee atíshi'dil'ínígíí danół'į́į'go shéédaołdzid.

²²Ła' sha'nohłé, doodaii', Woht'ínígíí ła' shá ninohłé, nihidishní haniih?

²³Éí doodaii', Ana'í nilíinii bílák'eedę́ę́' yisdáshółteeh, doodaii', Diné shich'į' nidahwiiłnáanii bich'į' shik'é niná'nóhdlé, nihidishní haniih?

²⁴Nidashinohtingo dííníshxéel dooleeł; asésiihígíí shił ííshją́ą́ ádaahłéehgo bik'idideeshtį́į́ł.

²⁵Saad t'áá ákogi ádaat'éii ayóo dabidziil, nidi shighada'doht'áhígíí ha'át'íí ła'yidoolííł?

²⁶Bik'e'íyée'ii bik'ee bąąh nahóókaadii bizaad níyolígi át'éego niyájiiłtéhígíí hasht'éédadiilnííłísh danohsin?

²⁷T'áá aaníí, áłchíní bizhé'é ádaadinii nidi nihíí' dadooleeł biniyé yááda'oołniih, índa nihik'is nilíinii nidi łídaohcháázh.

²⁸Éí bąą k'ad, nihił yá'ádaat'éehgo aadę́ę́' dashinół'į́; t'áá nihinii'jį' doo nihidínéesh'ah da.

²⁹Nánihooshkąąh, łahgo át'éego tsíńdadohkeesgo t'áadoo doo ákót'éégóó nida'ayohsíhí. T'áá aaníí łahgo át'éego tsíńdadohkeesgo t'ahdii yee' t'áá ákogi ánísht'é.

³⁰Doo ákǫ́ǫ́ yájíłti' daásh dashíínóhní? Ch'iyáán yishłįhígi át'éego doo yá'ádaat'éehiísh doo baa ákoznízin da, dashíínóhní?