Read Navajo JOB 7 Bible Online

JOB 7 - Navajo bible

JOB 7

¹Nihokáa'gi dine'ésh doo naalnishgo bee bá haz'ą́ą da? Bíyoołkáłígíísh ałdó' doo adeenáago naalnishígi át'ée da?

²Naalte' nilíinii chaha'oh t'áá íiyisí yídin nilínígi át'éego áádóó adeenáago naalnishí bich'į' nidoolyéełii nayólíhígíí nahalingo,

³haa shį́į́ nízádígóó t'áadoo dabiniyéhíii shaa deet'ą́ índa ti'hooshníihgo niyiiłkahígíí ałdó' shaa deet'ą́.

⁴Nishtéehgo, Hahgo lá nídideeshnah lá, dishníi łeh, nidi nízaadgóó iiłkáahgo hááhgóó shį́į́ ła' ałyóiijį' náheeshghałgo haiłkááh.

⁵Éé' dziztį́ nahalingo shits'íís éí ch'osh bik'é'ésxoł áádóó łeezh dibahí bee dáátł'is; shikáá' niná'ákǫs nidi t'áá ákǫ́ǫ́ náánáshch'ozh łeh.

⁶Atł'ohí atł'óogo bee adzooí tsxį́įłgo choyooł'ínígíí nahalingo shíyoołkááł, áko t'áá ákwíí jį́ t'áadoo bee ił chohoo'ínígóó i'ii'aah.

⁷Jó, béédaałniih, t'ááłáhídi ha'oodzolígi áníłtsogo hinishná; yá'át'éehii ts'ídá doo néideestséeł da.

⁸Shizhníł'íinii doo nááshiizhdoołtséeł da; t'áá dashinół'į́įgo doo shééhodoozįįł da.

⁹K'os ádįįhígi át'éego diné yóó'ábi'diilyaadę́ę́' doo háádoodáał da.

¹⁰Bighanjį' doo yah anídoodáał da, áádóó kééhat'ínígi baa dayoonah.

¹¹Éí bąą hadeesdzihígíí doo bich'į' baa nishchį' da doo; t'áá íiyisí shich'į' nahwii'nánígíí biyi'dóó hahideesdzih; shii' sizíinii bił niiłch'iihgo saad honishłǫ́ǫgo hahideesdzih.

¹²Tónteel nishłį́įgo, doodaii' tónteel bii'góó łóó' ayóó áníldíilii nishłį́įgoósh hashisíid dooleełii nináníłtééh?

¹³Shiyaateeł lą́ą bikáá'góó hoolzhólígi dínéeshtéeł ni, doodaii' shibik'i dah antéhí bikáá'góó hoolzhólígi shił hodínóok'eeł ni, dííniidgo

¹⁴bik'ee nídideeshgąshii baa nashiyíseeł, índa shik'iidoolchíiłii shił át'į́įgo ánáshiinil'įįh.

¹⁵T'óó dashi'diidlo'go dadeestsaałjígo nidideesh'ááł; iiná biláahgo aniné nisin.

¹⁶Hinishnánígíí jooshłxá, doo hool'áágóó hinishnáa da doo, t'áadoo shaa nánít'íní; t'áadoo biniyéhígóó yee' shíyoołkááł.

¹⁷Dinéshą' ha'át'íí át'éego ayóó át'éii nilį́įgo íínísin áádóó baa nitsíníkees

¹⁸áádóó t'áá ákwíí ábíní baa ninánítaah índa t'óó náhodi'naahgo bee bééhózin dooígíí bee naniłkaah?

¹⁹Haa nízáágóoshą' t'áadoo shits'ą́ąjį' hanighaałí shiníníł'į́į doo, índa shizhéé' iishneeh biná t'áadoo shaa nánít'íní doo?

²⁰Diné haisíidii nílíinii, ádił asésiihgo haash nishłééh? Ha'át'íísh biniyé shííníłt'óoh dooleełgo áshiinilaa, áko t'áá shí ádá hééł nísísdlį́į́'?

²¹Ha'át'éegoshą' bee haz'áanii k'éhééshtíihii doo shá k'éé'íłchǫǫh da, índa ha'át'éegoshą' doo ákwii áát'įįdii doo shá nahjį' kóníléeh da? K'ad yóó'áshi'diilyaago łeeyi' sétį́į doo, áko abínígo há shidíní'į́į' doo, nidi áníshdin doo.