Read Navajo JOB 8 Bible Online

JOB 8 - Navajo bible

JOB 8

¹Áko Shúwah dine'é Bíldad wolyéii ánááhodoo'niidgo ání,

²Haa nízáágóoshą' kót'éego yááłtih doo? Haa nízáágóoshą' ayóó át'éego níyol nahalingo yáníłti'?

³Da' Diyin God yee nihodiiz'áaniísh łahgo át'éego ánáyoodlííł? Da' Aláahgo Ayóó'ábóodziilii doo haada yit'éiísh łahgo át'éego ánáyoodlííł?

⁴Na'áłchíní éí Diyin God yich'į' ádił da'asiihgo bee haz'áanii k'ídeizti'go biniinaa yóó'ahodíí'ą́.

⁵Diyin God hánít'į́įgo áádóó Aláahgo Ayóó'ábóodziilii néinikąąhgo

⁶nichǫ́'ígíí nii' ádingo índa t'áadoo bee nik'íhót'ahígóó t'áá aaníí naa ákodínóozįįł áádóó t'áá ákogi ánít'į́įgo kééhót'į́į dooleełgi naa hodidoo'ááł.

⁷Áádóó t'óó dah adinilá yę́ędą́ą́' áłch'į́į́dí nít'éé' nidi, t'áá íiyisí bidziilgo dah ííléeł dooleeł.

⁸Nánooshkąąh, hoolzhiizhdę́ę́' da'ahílchíihii bína'ídíłkid, áko dabizhé'é yę́ę yídahooł'ą́'ígíí baa nitsíníkees.

⁹(Jó, adą́ą́dą́ą́' índa dahosiidlį́į́' nahalingo t'áadoo nihił béédahóziní da, háálá nihokáa'gi nihíyoołkáłígíí éí chaha'oh ahildóóh nahalin.)

¹⁰Yik'ida'diitánígíí yee yádaałti'go nidaninitingo yee nił dahalne' doo.

¹¹T'áá tó ádingiísh teeł nidanise' łeh? Tó ádingiísh lók'aa' nidanit'ą' łeh?

¹²T'ah doo dahagééshgóó danéesée nidi, ch'il náánáła' nidanise'ígíí t'áá yítséedi daniiłnah.

¹³Diyin God yaa dayoonahígíí t'áá ałtso ákót'éego bá dahonít'i', áko Diyin God doo yinízinii ił chohoo'į́ bee ádoodįįł.

¹⁴Bee bił chohoo'íinii k'ídla'. Na'ashjé'ii bitł'óól k'ídla'ígi át'įįh.

¹⁵Bikin yíniitééh nidi bikin naa anika'; hanáá'átł'į́į́h nidi doo bee nááhodi'naah da.

¹⁶Shą́ą́'góó nooséełgo áádóó bits'á iitł'ohígíí bidá'ák'ehgóó tanoosééh.

¹⁷Behétł'óól éí tsé ałk'i yadadiitł'ingóó tanoosééh, áádóó tsétahgi kééhat'į́į łeh.

¹⁸Éí bikéyahdóó nahjį' kóbi'diilyaago, Éí kéyah doo shídíínít'i'góó ts'ídá t'áadoo nééhosésįįd da, hałní nahalin doo.

¹⁹Jó, kót'éego éí bił hózhǫ́ǫgo yigááł nít'éé', nidi łeezh bits'ą́ą́dóó náánáła' danéeséeh doo.

²⁰Jó, diné t'áadoo bee bik'íhót'ahígóó naagháii éí Diyin God doo yóó'abididoo'áał da, índa doo yá'áshónígi ádaat'ínígíí Diyin God ts'ídá doo háká adoolwoł da.

²¹T'áá íiyisí nihoyíníihgo índa yáníłti'go nił nihoozhǫǫhgo áńdoolííł.

²²Áádóó nik'ee dazhdiniihii éí baa yáhásinii daha'ée' doo, índa diné doo yá'áshóonii biníbaal doo náánást'ą́ą da doo.