Read Navajo JOB 9 Bible Online

JOB 9 - Navajo bible

JOB 9

¹Áádóó Job ánáádoo'niidgo ání,

²Ákódaat'éhígíí t'áá aaníinii át'éego shił bééhózin, nidi diné dadootsaałiishą' haash yit'éego Diyin God yich'į' t'áá ákogi át'ée doo?

³Áádóó diné ła' Diyin God bił ałgha'disht'áah doo jinízingo t'ááłáhídi míildi bízneeztą́ą' nidi, t'ááłáhídi bich'į' t'ą́ą́' háázhdoodzihígíí doo bízhneel'ą́ą da.

⁴Diyin God t'áá íiyisí bijéí hóyą́ áádóó ayóó ábóodziil; háíyee' bich'į' áhozdizneestł'isgo bee náás adizhyeesdéél?

⁵Diyin God éí dził nahjį' kóyiił'įįhgo doo hoł béédahózin da; báháchįįhgo dził nídeidiyeenił.

⁶Éíyee' ni' náyiigha'go nahjį' kódeile', áádóó bíyah danii'áii daditsxiz łeh.

⁷Jį́honaa'éí yich'į' haadzihgo doo ha'a'aah da áádóó sǫ' yich'ą́ą́h niná'áłbał.

⁸T'áá bí t' éiyá yót'ááh hiníláii adahaas'áago áyiilaa áádóó tónteel yilk'oołígíí yikáá' tádíghááh.

⁹Diyin God éí Náhookǫs áádóó sǫ' dah naazhjaa'ígíí Oráíyan wolyéii áádóó Dilyéhé índa shádi'ááhjígo sǫ' eel'áhígíí áyiilaa.

¹⁰Ayóó ádaat'éii doo bik'izhdootą́ą́' ádaat'éii t'áá aaníí t'óó bida'ayóii doo jóołta' ánéelą́ą́' ádaat'éii yaa naaghá.

¹¹Shoo, shíighahgóó ch'ínádááh, nidi doo yiistséeh da áádóó t'áá náás yigáałgo doo baa ákoniisįįh da.

¹²Jó, t'áá nídideeshłééł nízin shį́į́ náyiilááh. Háísh bidínóołtł'ah? Háísh ábididooniił, Ha'át'íí lá baa naniná?

¹³Diyin God báhóóchįįdgo doo t'ą́ą́' hónéidoodlíił da; diné ádaa dahoji'niihgo áká anídajijahii Diyin God bidááhdóó yaa ádajít'é.

¹⁴Bił ałgha'disht'áah doo biniyé saad ałkéé' nidasínilgo nidi dooládó' bi'oh nidinishdle' da. Hait'éegoshą' Diyin God bich'į' t'ą́ą́' háádeesdzih?

¹⁵Azhą́ t'áá ákogi ánísht'ée nidi, t'áadoo bee bich'į' nát'ą́ą́' hanáosdziihí da, áádóó sheinít'íinii bich'į' ádaa ná'iideeshkąął.

¹⁶Bich'į' ádííniidgo áádóó shich'į' haadzíi'go, ákondi shíists'ą́ą́' nít'é'ígíí doo wooshdlą́ą da doo.

¹⁷Háálá níyoltsoh atíháł'į́ nahalingo nashé'éłjizh, áádóó t'áadoo biniinaanígóó t'óó ahayóígóó atíshoolííł.

¹⁸Nídísdzihígíí nidi shich'į' yaa nichį'go t'áá íiyisí shił niiłch'iihgo áshósin.

¹⁹Dziil beinísht'į́įgo, shoo, bíjígo ayóó ábóodziil. Doo haada yit'éii beinísht'į́įgo háíyee' ákohgo baa nídíít'įįł? shididooniił.

²⁰Azhą́ t'áadoo bee ádąąh dahosist'ání da nidi, ádíshnínígíí t'áá shí shik'éidoot'ih; azhá t'áadoo bee shik'íhót'ahí da nidi, doo ákwii ánísht'éhígíí bee shééhodoozįįł.

²¹T'áadoo bee shik'íhót'ahí da; doo ádił nitsínískees da doo, áko ádił niná'ásht'įįh.

²²T'áá ałtso aheełt'é; éí bąą ádíshní, T'áadoo bee bik'íhót'ahíii índa doo yá'ádaashóonii t'áá áłah atííł'į́.

²³T'áadoo hooyání diné bich'į' hodii'nááh yiniinaa daaztsą́ągo diné t'áadoo át'éhígóó naagháhígíí atíbi'diilyaii yá nahałt'i'.

²⁴Nahasdzáán éí diné doo yá'ádaashóonii baa deet'ą́; nihokáá'góó ándahwii'aahii dabinii' yik'íná'áłtih, áko bí doo át'į́į́góoshą' háí ákót'į́?

²⁵K'ad shíyoołkáłígíí éí naal'a'í tsį́įłgo yilwołígíí bilááh át'éego t'ahaa'go shíyoołkááł; yá'át'éehii t'áadoo dayiiłtséhí bił yóó'ahwiighááh.

²⁶Tsinaa'eeł tsxį́įłgo ahi'eełígíí nahalingo áádóó atsá éí yidoolghałii tsį́įłgo yił hidideełígíí nahalingo t'ahaa'go shíyoołkááł.

²⁷Baa saad shiiłhéhígíí t'óó beidiyeeshnahgo yínííł nishłį́ neeshninígíí nahjį' kódeeshłíiłgo, Shił hózhǫ́ǫ dooleeł, dííniidgo,

²⁸bik'ee ti'hooshníhígíí t'áá át'é béésísdzííd. T'áadoo íínít'įįdí da, doo shididííniiłígíí shił bééhózin.

²⁹T'áá íídą́ą́' shaa náhást'įįdgo ha'át'íísh biniyé t'áadoo biniyéhígóó naasdzil?

³⁰Yas too' bee tá'ádísgiz áádóó táláwosh bitsxe'ii bee shíla' chin ts'ídá ałtso bąąh néíł'éelgo;

³¹azhą́ ákósdzaa nidi, tó yígeed biih shidiyííłhą́ą́ł, áádóó shi'éé' nidi shaa'ih danízin doo.

³²Shí diné nishłínígi át'éego bí doo diné nilį́į da, áko aa dahwiinít'į́įgi ahidiit'áazhgo saad bich'į' nát'ą́ą́' ninádeesh'áłígíí doo sih da.

³³Nihita' yidoozįįłgo kojí yá'át'ééh nihididooniiłgo nihá niididoo'áałii nihee ádin.

³⁴Háni' bitsihał shits'éitįįh, índa t'óó bee báhádzidígíí shiyahodółhéés lágo,

³⁵áko índa doo bik'ee shił yéé'góó yáshti' doo, nidi shiyi'di doo ákóhoot'ée da.