Read Navajo PSALMS 102 Bible Online

PSALMS 102 - Navajo bible

PSALMS 102

¹Bóhólníihii nílíinii, shisodizin shá diits'į́į́h! Nánooshkąąhígíí bíni'dii didííts'į́į́ł!

²Shich'į' nahwii'náago t'áadoo shits'ą́ąjį' kónít'éhí! Shich'į' dah díníit'aah; nánooshkąąhgo t'áá tsį́łígo shich'į' ééhodíísįįł!

³Háálá shíyoołkáłígíí łid nahalingo yóó'aheldóóh, áádóó konk'ehgi kǫ' bee honiilgaígi át'éego shits'in daneezgai.

⁴Tł'oh yideezgo niiłna'ígíí nahalingo shijéí nááníłnahgo adeeshį́łígíí nidi baa náyoosh'nah.

⁵Yéego dish'nínígíí biniinaa shikágí éí shits'in bídadiiłjéé'.

⁶Naal'eełí bidaa' nineezgo yee łóó' haalzheehígíí honoojíidi dah sidáhígíí nahonishłin. Doo naagháhígi né'éshjaa' dah sidáhígíí nahonishłin.

⁷Ha'ídínísh'į́į'go kin bighą́ą'gi tsídiiłbáhí doo bił hats'íídgóó dah sidáhígíí nahonishłin.

⁸Shá bíighah shi'ana'í shá nidahałt'i'; shik'ijį' danilínígíí shízhi' yee da'ódziih.

⁹Háálá bááh jiyą́ nahalingo łeeshch'iih yíyą́ą́' áádóó yishdlánígíí shinák'eeshto' bił ałtahgo yishdlą́ą́';

¹⁰doo nił hóózhǫǫdgóó náhóóchįįdígíí biniinaa ákósdzaa. Háálá atis ánísht'éego áshíínísin nít'éé', nidi k'ad éí a'ohgo ánísht'éego áshiinilaa.

¹¹Shíyoołkáłígíí éí biká'ígi ii'aahgo chaha'oh nineez yileehígíí nahalin. Tł'oh niiłna'ígíí nahonishłin.

¹²Nidi ni, Bóhólníihii nílíinii, hool'áágóó honílǫ́ǫ doo, náás da'ahílchíihii t'áá ałtso néédaalniih doo.

¹³Dííldziłgo Záíyan haz'ą́ągi baa a'ááh díníízįįł, háálá bich'oho'níijį' ahoolzhiizh; jó, k'ad bee nihoot'ą́ąjį' ahoolzhiizh.

¹⁴Háálá ná nidaal'a'í Záíyandi tsé bee biná'ástł'inii bił ayóó ádanóolnin, áádóó bileezh dibahí nidi bił danilį́.

¹⁵Ał'ąą dine'é éí Bóhólníihii bízhi' deidísin doo, áádóó nihokáa'gi aláahgo naat'áanii t'áá ałtso ayóó ánít'éhígíí deidísin doo.

¹⁶Háálá Bóhólníihii éí Záíyan haz'ą́ągi hasht'ééhoodlaago yee ayóó át'éii bił bidi'dooltsééł.

¹⁷Té'é'į́ danilíinii dabisodizin bił nilį́į́ nít'éé', áádóó nídabookąąhígíí t'áadoo yiyíí'įįd da.

¹⁸Náás oochííł dooleełgóó díí bee bá ak'e'doochííł, áko diné nináádahidoochíłígíí éí Bóhólníihii yaa dahaniih doo.

¹⁹Jó, aghánáhóó'áadi bihodiyingo haz' ą́ą́dę́ę́' yaago déé'į́į́'. Yá'ąąshdę́ę́' Bóhólníihii nahasdzáán yinééł'į́į'go

²⁰awáalyaaí ti'dahooníihgo yidiits'a' áádóó dadínóonéełgo bá nidahwiist'áanii yéédeididoochił.

²¹Áko Záíyangi Bóhólníihii bízhi' yaa dahodoolnih, áádóó Jerúsalemgi bee baa ha'niihii yaa dahodoolnih.

²²Dadine'é áádóó nihokáá' bee bídahólníihgo bił nahaz'áanii Bóhólníihii yá nidaal'a' doo biniyé áłah silį́į'go yaa dahodoolnih.

²³T'ahdii tádísháahgo doo shidziilgóó áshiilaa; doo nízaadgóó hinishnáágóó áshiilaa.

²⁴Ádíshní, ShiDiyin God nílíinii, she'iina' ałníi'jį' ashíyííłką́ągo t'ah shííyisgo shił dah doó'aash lágo. Oochííłgóó t'áá ałtso nibéédahaháahii bitah honílǫ́.

²⁵T'áá shiidą́ą'dii nahasdzáán nee niłdzil, índa yót'ááh hiníláii éí níla' bee binishínílnishii át'é.

²⁶Éí ádadoodįįł, nidi ni t'éí honílǫ́; éí t'áá ałtso éé' nahalingo hadadootih. Éé' nahalingo ałnááhíí'nił, áko łahgo át'éego ádadoolnííł,

²⁷nidi ni t'éí t'ááłáhígi ánít'é, índa nee nináháháahii doo niit'éeh da.

²⁸Ná nidaal'a'í bada'áłchíní éí as' ahgóó kéédahat'į́į doo, áádóó éí náás da'ahílchíihii nidáahgi bidahoníłdzil doo.