Read Navajo PSALMS 103 Bible Online

PSALMS 103 - Navajo bible

PSALMS 103

¹Shii' sizíinii nílíinii, Bóhólníihii baa hóniih, áádóó t'áá ánóht'é shii' honohłóonii Bóhólníihii bízhi' diyinii bee yínízhíigo baa hóniih.

²Shii' sizíinii nílíinii, Bóhólníihii baa hóniih, áádóó yee naa joozba'ii éí t'ááká baa yóónééh.

³Doo ákwii íínít'įįdii t'áá át'é yóó'iidii'aah; naałniih t'áá ałtso bits'ąą hadaałt'é ánánoodlííł;

⁴í'ooldįįł bits'ą́ąjį' ne'iina' nááyiisnii'go jooba' áádóó aa a'ááh hasin nináhaazláago áyiilaa;

⁵yá'ádaat'éehii bee hwiih nílį́įgo ánósin, áko atsá táádítłeehgo ániidí nináhádleehígi át'éego ániid nanináago ánáni'doolnííł.

⁶Bóhólníihii éí diné bide ádahólzinígíí t'áá ałtso yaa áhályą́ índa t'áá ákogi át'éego yá ó'oolííł.

⁷Át'éii Mózes yił yééhoosįįd, áádóó áyoolíłígíí éí Ízrel dine'é yił yééhoosįįd.

⁸Bóhólníihii éí aa a'ááh nízin áádóó jooba', doo hah báháchįįh da; t'áá íiyisí bił hadlee'go aa a'ááh nízin.

⁹Doo t'áá áłahjį' nanihiditeeh da doo, índa doo hool'áágóó báháchį' da doo.

¹⁰Azhą́ ádił da'siilziih nidi, doo éí bik'ehgo nihainíst'įįd da; doo ákwii ádeiit'įįdę́ę doo bik'ehgo k'éénihidiidlaa da.

¹¹Háálá nahasdzáán índa yádiłhił bita'gi ánízádígi ánízahgo diné dabidísinii t'áá íiyisí bił hadlee'go yaa a'ááh nízin.

¹²Bee haz'áanii dahiiti'ii ha'a'aahdóó e'e'aah ánízáágóó nihits'éidiní'ą́.

¹³T'áá azhé'é ba'áłchíní yaa a'ááh nízinígi át'éego Bóhólníihii dabidísinii yaa a'ááh nízin.

¹⁴Háálá ániit'éhígíí bił bééhózin; łeezh niidlį́įgo yénálniih.

¹⁵Diné éiyá hóyoołkáłígíí tł'oh łitsooí nahalin; t'áá bóhólníihgi ch'ilátah hózhóón nooséełii nahalingo jinoosééł.

¹⁶Jó, bich'į' diyołgo t'áá áko ádįįh, áádóó íí'á yę́ęgi doo bééhoozįįh da.

¹⁷Nidi Bóhólníihii aa a'ááh nízinii éí dabidósinii hool'áádę́ę́' índa hool'áágóó yee yił hólǫ́. Bit'áá ákogi át'éii éí áłchíní áádóó banááda'áłchíní,

¹⁸éí bibee aha'deet'áanii índa bibik'eh ó'oo'níiłii yéédaalniihgo yida'ał'íinii hool'áádę́ę́' índa hool'áágóó yił hólǫ́.

¹⁹Bóhólníihii éí yót'ááh hiníláii bitahgi bibikáá'dóó nahat'áii hasht'eyiilaa, áko t'áá ałtsoní bee bóhólníihgo yinant'á.

²⁰Diyingo naal'a'í ayóó ádanihóodziilii nohłíinii, bizaad deísółts'ą́ą'go yee has'áanii bik'eh dahonoł'íinii, Bóhólníihii baa dahohniih!

²¹Dah deínóhnéehgo bá naal'a'í danohłíinii, íinízinii bida'oł'íinii t'áá ánółtso, Bóhólníihii baa dahohniih!

²²Bee bóhólníihgo nahaz'ą́ą́dę́ę́' Bóhólníihii nihinaashnishii t'áá ánółtso, Bóhólníihii baa dahohniih. Shii' sizíinii nílíinii, Bóhólníihii baa hóniih!