Read Navajo PSALMS 104 Bible Online

PSALMS 104 - Navajo bible

PSALMS 104

¹Shii' sizíinii nílíinii, Bóhólníihii baa hóniih! Bóhólníihii shiDiyin God nílíinii, t'áá íiyisí ayóó ánít'é; ił ílį́ áádóó ayóó é'ét'éii bee hadíínít'é!

²Éé' ák'ídzísti' nahalingo ák'idi'nildíingo ádíí'nílzin; níbaal nahalingo yá ahééhiníkaadgo íinilaa;

³nikin wódahdi ts'ídá aláahdi haz'ánígíí bitsé siláii táłkáá'dóó dah sínílá; k'os deílzhoodii éí nitsinaabąąs bijáád naakiígíí ádanile'; níyol bit'a' bikáá' naniná.

⁴Nidiyingo nidaal'a'í níłch'i danilį́įgo índa ná nidaal'a'í kǫ' dah nídadino'ígíí danilį́įgo ánáádlííł.

⁵Nahasdzáán nee niłdzil, áko hool'áágóó doo hididoo'náał da.

⁶Éé' ts'ídá ditáanii ák'ídzísti' nahalingo tónteel bik'i dilkǫǫhgo íinilaa. Dził naaznilii biláahgo tó da'néés'ąąd.

⁷Díínítehgo tó yaa'aná'nool'ąąd; ne'ii'ni' diists'ą́ą'go tsxį́įłgo anída'neeshhaazh.

⁸Dził naaznilgóó báátis adadziisxaalgo dził bąąh nidaasdzisdę́ę́' hadahidiina' áádóó bá háínídzí'ídi deiye'.

⁹Tó doo nahasdzáán bił náádidoolkǫǫł da biniyé bich'ą́ą́h adínízoh, áko doo bilááhgóó anáázdoołhał da.

¹⁰Deíldzisgóó tó hadaazlį́į́dóó danílį́įgo áyósin, áko dah daask'idígíí bita'góó danílį́.

¹¹Naaldlooshii nináneel'ą́ąjį' ákwii da'adlą́. Télii da'ałchinii áajį' tó yee hwiih nídaadleeh.

¹²Tábąąhgóó tsin deíl'áago ákwii tsídii ádaaní áádóó bit'oh ádahale'.

¹³Níléí wódahdi hólónídę́ę́' dził naaznilígíí nínéíłtłoh; binaanish bits'ą́ą́dóó hólóonii yee nahasdzáán hwiih nilį́.

¹⁴Béégashii bá ch'il hááhinoot'į́į́ł áádóó diné éí k'éédeididléehii yąąhdóó da'ayą́ą doo biniyé k'éédeididléehii bá hááhinoot'į́įłgo áyósin.

¹⁵Áádóó diné éí wáin bee bijéí bił hózhǫ́ǫgo áyósin áádóó ak'ah bee binii' bik'izdiidíingo índa ch'iyáán bee bidziilgo áyósin.

¹⁶Bóhólníihii bitsin naazkaadii éí Lébanan kéyahgi gadtsoh naazkaadii k'ideideezláhígíí bił dahoditłéé'.

¹⁷Ákwii tsídii bit'oh ádahale'. Tsídii jáásnézí éí ch'ó bílátahdi dabit'oh.

¹⁸Dził aghánídahaz'áágóó tsétah tł'ízí bá nahaz'ą́. Dlǫ́'ii nahalinígíí éí tsé yine' anídanichééh.

¹⁹Ahééhwiidááh biniyé ooljéé' áyiilaa. Jį́honaa'éí anádáahgo baa náhwiilzhíshígíí t'áá bí bił bééhózin.

²⁰Chanáháłhiłgo ánéinil'įįh, áko tł'éé' łeh. Ákohgo tsintahdę́ę́' naaldlooshii dahashkéii ch'éédaakah.

²¹Náshdóí yáázh bitsiijį' daditł'ooígíí yéego ádaaní áádóó Diyin God sha'doołtsoł danízingo deidoolghałii hadaalzheeh.

²²Ha'a'áahgo a'ánídaakahgo ákóyaa danjah.

²³Abínídóó e'e'áahjį' diné nidoolnish yiniyé nídahidii'néehgo dah hidilníísh.

²⁴Bóhólníihii nílíinii, dooládó' binishínílnishii lą'í ał'ąą ádaat'ée da! Baa honíyą́ągo t'áá ałtso ádeinilaa. Nahasdzáán bii' nit'íinii hadeezbin.

²⁵Níléidi tónteel ayóó áníłtéelgo siyį́. Biyi' dahináanii ádaałts'ísígíí índa ayóó ádaat'éii doo jóołta' ánéelą́ą́'góó yii' naaldeeh.

²⁶Bikáá'góó tsinaa'eełtsoh nídadi'oł. Ákǫ́ǫ́ táyi'góó łóó'tsoh Liiváíyathan wolyéii nída'diłkǫ́ǫhgo nidaanéego íinilaa.

²⁷Baa náhwiilzhíishgo díí t'áá ałtso shazh'doołtsoł danízingo nich'į' dadéez'į́į́'.

²⁸Baná'íłtso'ígíí nínádayiidlah. Níla' ąą ánéinil'įįhgo yá'át'éehii ba'iyíłtsódígíí yee hwiih danilį́.

²⁹Ninii' bits'ąą nínádíł'į́įhgo bich'į' nidahwii'náa łeh. Biyol nahjį' kódanile'go daniné, áko łeezh ninádahadleeh.

³⁰NiNíłch'i Diyinii anił'aahgo éí yee nidahwiileeh, áádóó nahasdzáán bikáá'góó ániidíígíí háádant'į́į́h.

³¹Bóhólníihii yee ayóó át'éii hool'áágóó hólǫ́ǫ le'; Bóhólníihii yinaashnishii yaa bił nihoozhǫǫh le'.

³²Nahasdzáán yiníł'įįhgo ditłid łeh; dził naaznilígíí yidilchi'go biyi'dę́ę́' łid ha'ajoł!

³³Ni'níłdįįd bijį́įjį' Bóhólníihii bich'į' hashtaał doo. Hinishná bijį́įjį' shiDiyin God bich'į' hashtaałgo baa hashniih doo.

³⁴Bóhólníihii baa nitséskeesígíí bił hóshǫ́ǫ le'. Shí éí Bóhólníihii bee shił hózhǫ́ǫ doo.

³⁵Nahasdzáán bikáa'gi bąąhági ádaaníiłii bíni'dii ádabi'dildįįh, áádóó diné doo yá'ádaashóonii ádaadin le'! Shii' sizíinii nílíinii, Bóhólníihii baa hóniih! Bóhólníihii baa dahohniih!