Read Navajo PSALMS 105 Bible Online

PSALMS 105 - Navajo bible

PSALMS 105

¹Haa'íshą' Bóhólníihii bich'į' ahééh danohsin! Bízhi' dayínóhshíigo bich'į' sodadołzin! Diné bitahgóó yaa naayáhígíí baa dahołne'!

²Bich'į' dahohtaał! Baa dahohniihgo bich' į' dahohtaał! T'óó bik'eda'ayóigo áát'įįdii t'áá ałtso baa dahołne'!

³Bízhi' diyinii bee baa dahohniih le'! Bóhólníihii há daat'íinii bijéí bił nidahoozhǫǫh le'!

⁴Bóhólníihii índa bibee adziil hádaoht'į́! Bóhólníihii t'áá áłahjį' hádaoht'į́!

⁵T'óó bik'eda'ayóigo áálíiłii áádóó t'óó bik'eda'ayóigo át'éii índa yee nihodiiz'áanii béédaałniih!

⁶Bóhólníihii yá naal'a'í nilíinii Éíbraham bits'ą́ą́dóó yichíiłii danohłíinii, Jéíkab bada'áłchíní nídii'nilii danohłíinii, béédaałniih!

⁷Éí Bóhólníihii nihiDiyin God nilį́. Nahasdzáán bikáá'góó t'áá níłtéél nít'éé' nihodii'aah.

⁸Bibee aha'deet'áanii, t'áá éí miildi ałk'i ná'oochííłgóó yich'į' saad yee haadzíi'ii hool'áágóó yénálniih.

⁹Éí Éíbraham yił aha'deet'ą́ áádóó Áízak yich'į' ádee hadoodzíí'

¹⁰índa bee nihot'áanii dooleeł biniyé bohoníłdzilgo Jéíkab baa deet'ą́, áko hool'áágóó bee aha'deet'áanii át'éego Ízrel baa deet'ą́.

¹¹Kóníigo haadzíí', Kéínan kéyah nihá bits'á ní'ą́ągo nihíí' dooleeł biniyé nihaa dideesh'ááł.

¹²Diné t'áá dókólt'éhígo, t'áá aaníí t'áá dókójílt'éhí yee' éí kéyahdi dé'éyóní dajílį́įgo tázhdínéehgo

¹³ał'ąą dine'é ła'ałyóí baa níjí'néehgo ał'ąą dine'é bee bídahólníihgo bił dah nahaz'ą́ą́góó tázhdínéehgo

¹⁴diné doo ła' atíbidi'doolníłígíí biniyé yich'ą́ą́h déesnii' nít'éé'; t'áá aaníí bidine'é yiniinaa aláahgo naat'áanii danilíinii yich'ahashkéé nít'éé',

¹⁵kóníigo, Ak'ah bik'i yadaadziidgo deísį́į'ii t'áadoo baa nídaaht'íní! Shá dahalne'ii atídaohłééh lágo!

¹⁶Éí kéyahgi dahodidoochįįł, dííniid áádóó bits'ą́ą́dóó ch'iyáán náhoodleełgo yee dahinánígíí t'áá ałtso nahjį' kóyiilaa.

¹⁷Diné léi' hatsijį' ayííł'a'; éí Jóseph naalte' dooleełgo nahaaznii'ii

¹⁸hakee' éí béésh da'ahólzha'í yee hadeideesnih. Béésh da'ahólzha'í yee dah dahwiiztł'ǫ́.

¹⁹Bee hadzoodzíi'ii bohoolyaajį' Bóhólníihii bizaad nahóneeztą́ą́'.

²⁰Aláahgo naat'áanii háká i'ííł'a'go ch'ééhoníłt'e'. Diné binanit'a'í nilíinii ch'ééhoníłt'e'.

²¹Bighangi hóhólníihgo áhoolaa índa bíí' nilíinii t'áá ałtso binazh'nit'áago áhoolaa.

²²Áko naat'áanii danilíinii t'áá hózhnízinígi át'éego bee hóhólníih doo, índa diné yá aląąjį' naazíinii hódzą́ bee nazhnitin doo.

²³Áádóó ałdó' Ííjip kéyahdi Ízrel dine'é yíkai. Ham bikéyahdi Jéíkab bada'áłchíní dabighan nít'éé'.

²⁴Áádóó bidine'é t'áá íiyisí k'ee'ąą noot'į́įłgo áyiilaa, índa bida'ana'í yiláahgo ádabóodziilgo áyiilaa.

²⁵Bóhólníihii éí hodine'é bi'ana'í bijéí yee bik'ee dadiniihgo áádóó Bóhólníihii há nidaal'a'í yinda'alo'go ájiilaa.

²⁶Bá naal'a'í Mózes índa Éran ałdó' néidiiłtį́įgo t'áá áłah ayííł'a'.

²⁷Éí Ham bikéyahdi Bóhólníihii bibee éédahózinii índa t'óó bibik'eda'ayóii yit'íní áyiilaa.

²⁸Chahałheełgo áyiilaa, áko éí kéyahgi chahóółhéél. Bóhólníihii yee hahadziihii doo yich'į' naalteeh da.

²⁹Ííjip dine'é dabito' diłgo áyiilaa, áko dabiłóó' dayííghą́ą́'.

³⁰Bikéyah bikáá'góó ch'ał nihinéést'e', binanit'a'í nitéhí góne' nidi.

³¹Haadzíi'go bikéyah t'áá níłtéél nít'éé' tsé'édǫ́'ii bił dah nída'asoł áádóó yaa' ałdó' hazlį́į́'.

³²Bee nahodoołtį́į́ł yę́ęgi nílóda haidiní'ą́ągo níló bee nááłtą́ áádóó bikéyah bikáá'góó ii'ni' dahodiiłtłah.

³³Bich'il na'atł'o'ii índa fig deíl'áhígíí atíyiilaa, áádóó bikéyah bikáa'gi t'áá níłtéél nít'éé' tsin naazkaadii niyiizti'.

³⁴Haadzíi'go nahachagiitsoh níłnii', áádóó ch'osh ditł'ooí doo jóołta' ánéelą́ą́'góó níłnii'.

³⁵Éí hakéyahgi nanise' t'áá ałtso índa nidazhniłt'ą'ígíí ałtso yaa nahodeeskai.

³⁶Hakéyahgi alą́ąjį' há nidahaazhchínígíí éí bee dahadziil dooleeł nít'éé' yę́ę ałdó' ałtso hats'ą́ą́' neistseed.

³⁷Áko Ízrel dine'é béésh łigaii áádóó óola deíjáahgo ch'íiní'eezh; hatahdóó t'áá ałtso dabidziilgo ch'íníná.

³⁸Nahgóó dashdiináago Ííjip dine'é bił dahóózhǫǫd, háálá haniinaa Ííjip dine'é nídaasdzííd.

³⁹Hak'igi k'os yildohgo ánáyiil'įįh nít'éé', áádóó tł'ée'go kǫ' há bee hool'ingo ánáyiil'įįh nít'éé'.

⁴⁰Hóda'dííkeedgo tsídii dééłdánii wolyéii haa néinísą́. Áádóó yá'ąąshdę́ę́' bááh bee hwiih dajílį́įgo áhoolaa.

⁴¹Tsé ąą áyiilaago tó hadzííłhaal. Honoojíí góyaa toohgi át'éego danílį́ silį́į́'.

⁴²Háálá bá naal'a'í Éíbraham yich'į' diyingo yee nihoní'áanii yénáálnii'.

⁴³Áko bidine'é bił dahózhǫ́ǫgo ch'íiní'eezh; néidiinilii bił dahózhǫ́ǫgo dahataałgo ch'íiní'eezh.

⁴⁴Ał'ąą dine'é bikéyah haidiní'ą́ áádóó yindaashnishii hwíí' daazlį́į́'.

⁴⁵Áko yee nihwiiz'áanii áádóó bibee haz'áanii bik'eh dahojíł'į́. Bóhólníihii baa dahohniih!