Read Navajo PSALMS 106 Bible Online

PSALMS 106 - Navajo bible

PSALMS 106

¹Bóhólníihii baa dahohniih! Haa'íshą' Bóhólníihii bich'į' ahééh danohsin, háálá bí éí yá'át'ééh. Bóhólníihii aa a'ááh nízingo ahóyéel'á!

²Ła'daásh Bóhólníihii ayóó át'éii yaa naayáhígíí yee hadoodzihgo yíneel'ą́, índa ła'daásh bee baa ha'niihii t'áá ałtso yee yaa haniihgo yíneel'ą́?

³Doo haada yit'éégóó dahináanii, t'áá áłahjį' t'áá ákogi ádaaníiłii éí bik'idahojidlí!

⁴Bóhólníihii nílíinii, nidine'é bee bich'oni'nínígíí bee shéénílniihgo shí ałdó' yisdáshíłteeh.

⁵Áko bits'éínínilii náásgóó yá'át'éehgo dahináago yideestsééł. Áko nidine'é bił dahózhǫ́ǫgo baa shi ł nihoozhǫǫh doo, índa níí' danilíinii bitahdóó naa hashniih doo.

⁶Danihizhé'é yę́ęgi át'éego nihí ałdó' ádił nida'ayeelzíí'. Doo ákǫ́ǫ́ ádeiit'įįd da. Doo yá'áshónígi ádeiit'įįd.

⁷Ííjip kéyahdi danihizhé'é yę́ę kéédahat'į́ yę́ędą́ą́' t'óó bik'eda'ayóigo í'iinilaaígíí t'áadoo yik'ida'diitą́ą da. Aa a'ááh nínízinii t'óó ahayóígíí t'áadoo yéédáálnii' da. Nidi Tónteel Łichíí' wolyéego siyínígi Diyin God yich'į' nidaastee'.

⁸Azhą́ ákódzaa nidi, bee bidziilii ayóó át'éii bééhózínígo áyósin doo biniyé bízhi' binahjį' yisdáyíínil.

⁹Tónteel Łichíí' wolyéego siyínígíí yideeztehgo nááltsei. Áádóó halgaigóó hojoo'ish nahalingo cháshk'eh ha'naa nihoní'eezh.

¹⁰Áko hak'ee dadiniihii bits'ą́ąjį' yisdáhóónil índa ana'í bílák'eedę́ę́' nááhwiisnii'.

¹¹Áádóó bida'ana'í tó bik'i diilkǫ'; t'ááłá'í nidi t'áadoo ła' yidzíi' da.

¹²Áko índa hazaad dayoosdląądgo haa dahaniihgo hach'į' dahóótáál.

¹³Nidi t'áadoo hodíína'í hanaanish yaa dayooznah. Kót'éego náábididoo'niiłígíí doo yiba' ádaat'ée da nít'éé'.

¹⁴Honoojíidi t'áá íiyisí adádanoosníí', áádóó halgaidi Diyin God nayídaneeztą́ą́'.

¹⁵Hódayííkeedígíí baazhdiní'ą́, nidi bii' naazíinii t'óó dabííts'iiní.

¹⁶Ákohgo dah oonéłígíí Mózes dayoołch'į́į́d nít'éé' áádóó Bóhólníihii bidiyį́į́' Éran wolyéii ałdó' dayoołch'į́į́d nít'éé'.

¹⁷Ni' ąą ádzaago Déíthan ayííłna', Abáíram áádóó yił yinééł yę́ę ałdó' ałtso bik'i dahoozhoozh.

¹⁸Áko dah joonéłígi kǫ' hadadíínóodgo doo yá'ádajíshóonii yę́ę adahizdeezk'ą́ą́'.

¹⁹Dził Hórebgi óola doolyį́į'go béégashii yáázh yééda'iidlaago yich'į' nidahasá.

²⁰Áko biDiyin God ayóó át'éii éí béégashii ałchozhii be'alyaago yił ałnádeiiznil.

²¹Diyin God yisdábíínilii, éí Ííjip kéyahdi ayóó ádaat'éii yaa naayáii yaa dayooznah,

²²Ham bikéyahgi t'óó bik'eda'ayóigo í'iilaii índa Tónteel Łichíí' hoolyéegi bik'eda'íyé'ígi át'éego í'iilaii yaa dayooznah.

²³Éí bąą, Áhodeeshdįįł, dííniid; doo ázhdoołdįįłígíí áádóó t'óó báhádzidgo bee atíjíł'íinii nahjį' kózhdoolíłígíí biniyé Mózes hach'ą́ą́h ííyá.

²⁴Ákohgo kéyah hózhónígíí dayíí'įįdgo hazaad doo dayoodlą́ą da nít'éé'.

²⁵Dabiníbaal góne' saad dahal'į́įgo Bóhólníihii áníinii doo dayíists'ą́ą' da nít'éé'.

²⁶Éí bąą hach'į' yadidiilnii'go hwee ádee hadoodzíi'go áhodííniid, Honoojíidi dadínóohnééł,

²⁷áádóó niha'áłchíní náás ahoolchíiłii ał'ąą dine'é bitahgóó kéyah ał'ąą naaznilgóó tahodínéeshkał.

²⁸Ákohgo Píyordóó e'elyaii Béíyal wolyéii yich'į' nidahasáago daneeznáanii bich'į' náádahaaznii'ii dayííyą́ą́'.

²⁹Yaa naaskaígíí biniinaa Bóhólníihii yádahóółchįįd, áko naałniih bitah níłnii'.

³⁰Ákohgo Fíniyas yiizį'go yá nihwiiz'ą́ągo naałniih áhodiilzee'.

³¹Ákohgo éí oochííłgóó áádóó hool'áágóó t'áá ákogi ádziidzaago há bił éélta'.

³²Náá'ákóne'é tó bíká saad hólǫ́ǫgi ánááhóót'įįdígíí biniinaa Bóhólníihii hach'į' báhóóchįįd; éí ákóhóót'įįdígíí Mózes bá nantł'a silį́į́',

³³háálá Mózes yik'ee bił niiłch'iihgo ádayiilaa, áko t'áá na'níle'dii saad yee hahaasdzíí'.

³⁴Ał'ąą dine'é hanaagóó kéédahat'ínígíí t'áá ałtso nidadoołtsxił, Bóhólníihii áhodííniidii éí t'áadoo ádadziidzaa da.

³⁵Nidi ał'ąą dine'é bił ałtaa dajildeehgo éí yaa nidaakaígíí baa nidajikaigo bídahojiił'ą́ą́'.

³⁶E'elyaii yich'į' nidahałáhígíí bich'į' nidahojiłáago éí biniinaa łoh biih jííyá nahalingo azajookai.

³⁷T'áá aaníí, biye'ké índa bitsi'ké níłch'i bida'iiníziinii yich'į' náádayiisnii'.

³⁸Biye'ké áádóó bitsi'ké nideistseedígíí t'áadoo yee ádidahodiilt'i'í da nidi, dabidił danílį́įgo ádayiilaa; éí Kéínan kéyahdi eda'alyaii yich'į' náádayiisnii'. Áko diłígíí bee kéyah t'óó baa'ih silį́į́'.

³⁹Kót'éego yaa nidaakaígíí bee t'óó baa'ih daazlį́į́'. Ákódaat'į́įgo ałjiłniigi ádaadzaa.

⁴⁰Áko índa Bóhólníihii bidine'é yich'į' báhóóchįįd. Bíí' danilíinii t'óó yaa'ih niizį́į́'.

⁴¹Ał'ąą dine'é yaa hodiní'ą́, áko hak'ee dadiniihígíí hondant'áá nít'éé'.

⁴²Hoda'ana'í ałdó' hade ádahósingo biyaa jizhjaa'go áho'diilyaa.

⁴³Lą'ídi yisdáhóónil, nidi nidahoji'áhígíí bee bich'į' nidajilteeh nít'éé', áko doo ákwii ádajíít'įįdii bee hadahojoobá'ígo ádaho'diilyaa.

⁴⁴Azhą́ ákódzaa lá nidi, nídahookąąhgo jidiizts'ą́ą'go bich'į' nidahwii' nánígíí baa ákozniizį́į́'.

⁴⁵Áádóó bibee aha'deet'áanii há yénáálnii'go aa a'ááh nízinii t'óó ahayóígíí bik'ehgo łahgo át'éego haa tsíńdeezkééz.

⁴⁶Dahasnáanii t'áá ałtso haa a'ááh danízingo áyiilaa.

⁴⁷Bóhólníihii nihiDiyin God nílíinii, yisdánihínííł. Ał'ąą dine'é bitahdę́ę́' áłah ánánihídlééh, áko nízhi' diyinii bee danííníijíigo nich'į' ahééh daniidzin doo áádóó nihił dahózhǫ́ǫgo naa dahwii'niih doo.

⁴⁸Hool'áádę́ę́' áádóó ahóyéel'áágóó Bóhólníihii, Ízrel dine'é biDiyin God nilíinii baa ha'niih le'! Áádóó diné t'áá ałtso, T'áá ákót'ée doo, daaníi le'! Bóhólníihii baa dahohniih!