Read Navajo PSALMS 109 Bible Online

PSALMS 109 - Navajo bible

PSALMS 109

¹Diyin God naa hashniihii, t'áadoo t'óó áhodínílzé'í!

²Háálá t'áá íiyisí doo yá'ádaashóonii índa binda'adlo'ii shide ádeinízingo wooch'ííd yee shaa nidahalne'.

³Ak'e'diniih saad yił shináshzhiizh, áádóó t'áadoo biniinaanígóó shik'iijéé'.

⁴Ayóó'óósh'nínígíí bidiníná t'óó shik'i dahodii'ą́, nidi bá sodiszin.

⁵Áko yá'át'éehii bidiníná doo yá'át'éehii yee k'éédashidiidlaa, índa ayóó'óósh'nínígíí bidiníná shik'ee dadeeznih.

⁶Diné doo yá'áshóonii honiyé niníłteeh. Ak'i hodii'aahii bíni'dii honish'náájí sizį́į le'.

⁷Haa hwiiníst'įįdgo háni'dii há nihoot'aah; háni'dii hasodizin ádi ł ni'iidzííh yileeh!

⁸T'áá díkwíí yiską́ąjį' nijigháa le'. Áádóó bee hóhólníhígi náánáła' hatsásk'ehjį' anáádoodááł!

⁹Ha'áłchíní bizhé'é ádinii danilį́į le'! Hwe'asdzą́ą́ éí bąąh áhásdįįdii nilį́į le'!

¹⁰Ha'áłchíní da'dókeedgo na'ałjidí danilį́į le'! Dabikints'iil dah naazhjaa'dóó nízaadi nidaakaigo da'dókeed le'!

¹¹Háni'dii hwee hólóonii t'áá ałtso hąąh hayííł'áhígíí hagha yó'nííł. Binjishnishii dé'éyóní hagha dayó'nííł!

¹²Háni'dii doo ła' haa a'ááh nízin da doo índa háni'dii ha'áłchíní bąąh ájísdįįdígíí doo ła'da jooba' da doo!

¹³Ha'áłchíní dooleeł nít'éé' yę́ę bíni'dii áldįįh; bíni'dii akéédę́ę́' hanínáánoot'áanii bízhi' k'éé'élchxǫǫh!

¹⁴Háni'dii Bóhólníihii éí hazhé'é doo ákwii ádáát'įįdii yénálniih, áádóó hamá ádił ni'iisíi'ii doo k'éé'doolchxǫǫł da!

¹⁵Éí t'áá áłahjį' Bóhólníihii bidáahgi hólǫ́ǫ le'! Áko nahasdzáán bikáá'dóó doo hwéédahaniih da doo biniyé doo hwéédahaniihgóó áyósin doo!

¹⁶Háálá éí diné aa a'ááh hasin doo yee énálniih da nít'éé', nidi diné bahojoobá'íii áádóó hojooba' has'áanii índa bijéí yínííł danilíinii nizdoołtsiłgo atíjíł'į́į́ nít'éé'.

¹⁷Ódziih bił ayóó áhoot'éé nít'éé', áko nábi'dódziih! Ła'da yik'iizhdoodliiłígíí doo yaa bił hózhǫ́ǫ́góó doo ła'da hak'i néizhdoodliił da!

¹⁸Ódziih éí éé' nahalingo yee hadít'éé nít'éé', áko tó nahalingo bits'íístah shidoogish, áádóó ak'ah nahalingo bits'in biih shidoogish!

¹⁹Éé' ák'ínéíltihígíí nahalin le', áádóó t'áá áłahjį' sis nahalingo binázt'i' le'!

²⁰Shik'i dahodii'aahii áádóó nichǫ́'ígo shaa yádaałti'ii bíni'dii ákót'éego Bóhólníihii díí yee k'ééhodidoodlííł!

²¹Diyin God Bóhólníihii nílíinii, nízhi' binahjį' shaa atínít'į́. Yisdáshíłteeh, háálá aa a'ááh nínízinii éí yá'át'ééh!

²²Háálá shahojoobá'í áádóó hojooba' hoséł'ą́, índa shijéí tídiilyaa.

²³I'íí'ą́ągo chaha'oh iildóhígíí nahonishłingo ááshdįįł; nahachagiitsoh níyol yáábiiłhą́hígíí nahonishłin.

²⁴Doo ashą́ą́góó bąą shigodta' gónaa doo niłdzil da. Áádóó shííts'iinígo shik'ah yę́ę ásdįįd.

²⁵T'óó bá nahat'i'ii nishłį́. Nídashiníl'įįhgo bitsiits'iin deiłne'.

²⁶Bóhólníihii shiDiyin God nílíinii, shíká anilyeed! Aa a'ááh nínízinii bik'ehgo yisdáshíłteeh!

²⁷Díí nigaan bee baa nisíníyáhígíí bił béédahodoozįįł; ni Bóhólníihii éí ákónít'į́!

²⁸Da'ódziih nidi bíni'dii ni éí ak'ijiinídliih! Dashóbáahgo t' óó baa yáhásinígi ádabi'dólne', nidi ná naal'a'í nishłíinii t'áá íiyisí shił nihoozhǫǫh le'!

²⁹Shik'i dahodii'aahii doo ił ídlį́į́jí éé'ígíí yii' naazhjée' le'! Beeldléí nahalingo baa yádahasinii ák'ínídeiltih le'!

³⁰Bóhólníihii bich'į' chánahgo ahééh nisin doo; t'áá aaníí, diné t'óó ahayóí bitahgóó baa hashniih doo.

³¹Háálá diné bahojoobá'íii bidi'yoolyéełjį' bee ha'oodzíi'ii bits'ą́ą́dóó yisdéidoołtééł biniyé yinish'náájí sizį́.