Read Navajo PSALMS 112 Bible Online

PSALMS 112 - Navajo bible

PSALMS 112

¹Bóhólníihii baa dahohniih! Bóhólníihii yidísinii índa bibik'eh ó'oo'níiłii t'áá íiyisí yaa bił nihoozhǫǫhii éí bik'ihojidlí!

²Bits'ą́ą́dóó oochíiłii éí kéyah bikáá'góó ayóó át'ée doo; t'áá ákogi ádaat'éii ba'áłchíní éí bik'ihozhdoodliił.

³Binaalye'é índa yódí éí bighan góne' hólǫ́ǫ doo, áádóó bit'áá ákogi é'ét'éii ahóyéel'áágóó hólǫ́ǫ doo.

⁴Diné t'áá ákogi át'éii chahałheełgóó adinídíín bá náhoodleeł. Éí jooba' áádóó bił hadlee'go aa a'ááh nízin índa t'áá ákogi áánííł.

⁵Diné bił hadlee'ii áádóó a'iiníiłii éí yá'át'éhígi áánííł. Binaanish nilíinii doo haada yit'éégóó yá'át'éehgo áyoolííł.

⁶Hool'áágóó doo łahgo áńdoo'níił da; t'áá ákogi ááníiłii hool'áágóó bééhániih doo.

⁷Doo yá'át'ééhgóó hane'ii doo bik'ee bił yée' da; Bóhólníihii yaa dzólíigo bijéí bohoníłdzil.

⁸Bi'ana'í danilíinii baa honónééł laanaa nízinii ákódaalyaajį' bik'ee doo bił yée' da doo áádóó bijéí bidziil ályaa.

⁹Bił hadlee'go na'aznii'; diné badahojoobá'íii yitaa'aznii'. Bit'áá ákogi é'ét'éii éí hool' áágóó hólǫ́ǫ doo; be'adziil baa ha'niihgo náás kódoolnííł.

¹⁰Diné doo yá'áshóonii éí yiyiiłtséehgo báháchįįh; biwoo' ahíidiłk'ashgo doo bééhodoozįįł da. Diné doo yá'áshóonii laanaa nízinii t'áadoo nádleehí da.