Read Navajo PSALMS 115 Bible Online

PSALMS 115 - Navajo bible

PSALMS 115

¹Nihich'į' éí dooda, Bóhólníihii nílíinii, nihich'į' éí dooda, nidi aa a'ááh nínízinii áádóó nit'áá aaníinii biniinaa nízhi' bee ni'dójíigo naa ha'niih le'!

²Ha'át'íísh biniinaa ał'ąą dine'é ádaaní, BiDiyin Godshą' k'ad háájí silį́į́'?

³NihiDiyin God yee' yót'ááh hiníláadi hólǫ́; t'áá ádeeshłííł nízinígíí áyoolííł.

⁴Bi'eda'alyaii éí béésh ł igaii índa óola, éí diné bíla' yee ádayiilaii ádaat'é.

⁵Éí bizéé' dahólǫ́ǫ nidi, doo yee yádaałti' da. Bináá' dahólǫ́ǫ nidi, doo yee da'oo'į́į da.

⁶Bijaa' dahólǫ́ǫ nidi, doo yee da'diits'a' da. Bíchį́į́h dahólǫ́ǫ nidi, doo yee da'ałchin da.

⁷Bíla' dahólǫ́ǫ nidi, doo yee nida'ach'id da. Bikee' dahólǫ́ǫ nidi, doo yee nidaakai da, áádóó azooł dah dijoolígíí dahólǫ́ǫ nidi, doo yee yádaałti' da.

⁸Díí ádajoolíłígíí t'áá éí nidahojílin, áádóó eda'alyaii yaa dadzólíhígíí t'áá ałtso ałdó' t'áá ákódaat'é.

⁹Ízrel dine'é nohłíinii, Bóhólníihii baa dadzíínóhłí! Éí yíká análwo'ii áádóó yinaage' nilį́.

¹⁰Éran dine'é nohłíinii, Bóhólníihii baa dadzíínóhłí! Éí yíká análwo'ii áádóó yinaage' nilį́.

¹¹Nihí Bóhólníihii dadíínóhsinii, Bóhólníihii baa dadzíínóhłí! Éí yíká análwo'ii áádóó yinaage' nilį́.

¹²Bóhólníihii éí nihénálniih nít'éé'; ak'izhdoodliił; Ízrel dine'é yik'izhdoodliił; Éran dine'é yik'izhdoodliił.

¹³A'ohgo ádaat'éii índa ayóó ádaat'éii Bóhólníihii deidósinii yik'izhdoodliił.

¹⁴Niha'áłchíní t'áá bił Bóhólníihii k'ee'ąą nihidínółt'įįhgo da'dooht'įįł!

¹⁵Bóhólníihii éí yádiłhił índa nahasdzáán áyiilaii nihik'ijidlíi le'.

¹⁶Yá'ąąsh bił hiníláii éí Bóhólníihii bí, nidi nahasdzáán éí dadine'é bada'áłchíní yeidiní'ą́.

¹⁷Daneeznáanii éí Bóhólníihii doo yaa dahaniih da; hodéezyéél góyaa nidahaleehígíí ałdó' dooda.

¹⁸Nidi nihí kodóó ahóyéel'áágóó Bóhólníihii baa dahwii'niih doo. Bóhólníihii baa dahohniih!