Read Navajo PSALMS 116 Bible Online

PSALMS 116 - Navajo bible

PSALMS 116

¹Bóhólníihii ayóó'óósh'ní, háálá bich'į' yáshti'ígíí áádóó yíníshkeedígíí shá yidiizts'ą́ą́'.

²Shich'į' dah díníit'ą́ągo shíists'ą́ą́'; éí bąą ni'níłdįįd bijį́įjį' náoshkąąhgo bich'į' sodiszin doo.

³Anoonééł bitł'óól shináhineeshzhee'; hool'áágóó ti'hoo'níihdi bik'e'íyée'ii shidiniiltsood nít'éé'; ach'į' nahwii'ná índa yínííł bik'ee ti'hwiisénii'.

⁴Áko índa Bóhólníihii bízhi' bee yíníshíigo náoshkąąhgo bich'į' sodiszin; Bóhólníihii nílíinii, nánooshkąąh; shii' sizíinii yisdáníłteeh!

⁵Bóhólníihii éí jooba' áádóó t'áá ákogi át'é; t'áá aaníí, nihiDiyin God aa a'ááh nízinii nilį́.

⁶Bóhólníihii éí doo dahóyáanii yaa áhályą́; t'áá báada a'ohgo ánísht'é sélį́į'go yisdáshííłtį́.

⁷Shii' sizíinii nílíinii, háánílyį́įh dooleełgóó nánídleeh, háálá Bóhólníihii éí t'óó ahayóígóó yá'át'éehii ná yaa naayá.

⁸Jó, anoonééł bits'ą́ąjį' shii' sizíinii yisdéíníłtį́, doo yishchagóó áshiinilaa, áádóó shaa áhólyą́ągo doo dishgeehgóó áshíínísin nít'éé'.

⁹Bóhólníihii binááł dahináanii bitahdi yisháał doo.

¹⁰T'áá íiyisí shich'į' nahwii'ná, dishníi nidi baa jííníshłí.

¹¹Tsį́įłgo haasdzíi'go ádííniid, Nihokáá' dine'é t'áá ałtso dabiyooch'íidii danilį́.

¹²Bóhólníihii t'áá ałtsoní shaa yiiznilii ha'át'íishą' bee bich'į' k'éédideesh'nííł?

¹³Bee yisdá'iildééhjí bee adlání ádá shóideesht'eełgo shił hózhǫ́ǫgo Bóhólníihii bízhi' bee yíníshíigo bich'į' sodideeszįįł.

¹⁴Bóhólníihii bidine'é t'áá ałtso binááł Bóhólníihii bich'į' ádee hadeesdzíi'ii k'ad bi'deeshłííł.

¹⁵Bóhólníihii binááł bidiyį́į́' daninéego agháago ílį́įgo yaa nitsíkees.

¹⁶Bóhólníihii nílíinii, t'áá aaníí ná naal'a'í nishłį́; ná naal'a'í biyáázh nishłį́įgo ná naal'a'í nishłį́. Bee dah dashi'diistł'óonii shá k'eda'síní'ah.

¹⁷Ahééh hasingo nááhániihii nich'į' nááhideeshnih áádóó Bóhólníihii bízhi' yíníshíigo sodideeszįįł.

¹⁸Bóhólníihii bidine'é t'áá ałtso binááł Bóhólníihii bich'į' ádee hadeesdzíi'ii k'ad bi'deeshłííł.

¹⁹Jerúsalem nílíinii, nitahgi Bóhólníihii bikin bii' sohodizin binaagi nahaz'ánígi bi'deeshłííł. Bóhólníihii baa dahohniih!