Read Navajo PSALMS 119 Bible Online

PSALMS 119 - Navajo bible

PSALMS 119

¹T'áadoo bee bik'ídahót'ahígóó deíkáahii éí bik'idahojidlí, Bóhólníihii bibee haz'áanii yik'ehgo deíkáahii éí ákódaat'é!

²Yee hahaasdzíi'ii yik'eh dahół'íinii índa bijéí t'áá át'é yee háká ádaat'íinii éí bik'idahojidlí.

³Doo ádił da'iilzííhgóó Bóhólníihii bik'eh áhoot'éégóó deíkááh!

⁴Nibik'ehgo iináanii bee nihá hwiinił'a'go haleebee deíníikáah dooleeł.

⁵Bee nihoyíní'áanii baa honisą́ągo shidziilgo áshi'dólne' laanaa!

⁶Ákohgo nibik'eh ó'oo'níiłii t'áá át'é shił nilį́įgo doo t'óó shaa yáhásingo áshidi'doolníił da.

⁷T'áá ákogi át'éego bee nihodiyíní'áanii bóhooł'ą́ą'go shijéí t'áá ákogi át'éego naa hashniih doo.

⁸Bee nihoyíní'áanii bik'eh honish'į́į doo. Ts'ídá t'ááká yóó'ashidóó'ááł lágo!

⁹Haash yit'éego diné ániid naagháii yigááłgóó doo yá'ádaashóonii ádąąh yit'į́į doo? Nizaad bik'ehgo ádaa áhályą́ągo lą́ą.

¹⁰Shijéí t'áá át'é bee hánísht'į́į́ nít'éé'. Nibik'eh ó'oo'níiłii bits'ą́ąjį' dah doosha' lágo!

¹¹Doo nich'į' ádił ni'iisíih da doo biniyé nizaad shijéí bii' nídé ł'į́į́'.

¹²Bóhólníihii nílíinii, naa ha'niih le'! Bee nihoyíní'áanii bínashiníłtin!

¹³Bik'eh hoogáałii bee hahídziihii t'áá ałtso baa hweeshne'.

¹⁴Jit'íinii nináneel'ą́ąjį' baa hoł hózhónígíí nahalingo bee hahínídzí'ígíí bik'ehgo joogáałii éí baa shił nihoozhǫǫh.

¹⁵Nibik'ehgo iináanii nabik'ítséskees doo, áádóó ánít'éii shił nilį́į doo.

¹⁶Bee nihoyíní'áanii baa shił nihoozhǫǫh doo. Nizaad doo beidiyeeshnah da.

¹⁷Ná naal'a'í nishłíinii shich'į' nił hadlee'go shaa jiiníba', áko hinishnáago nizaad bik'eh honish'į́į doo.

¹⁸Nibee haz'áanii biyi'dóó t'óó bik'eda'ayóii baa ákonisin doo biniyé shináá' ąą ánílééh.

¹⁹Nahasdzáán bikáá'góó dé'éyóní nishłį́; nibik'eh ó'oo'níiłii shits'ąą nídóół'įįh yíila'!

²⁰T'áá áłahjį' shii' sizíinii nibik'eh hoogáałii yídin nilį́įgo yínííł bił naashá.

²¹Ádaa dahoji'niihii éí hóyée'go há hada'iisdzíi'ii dahodííníteh. Jó, éí nibik'eh ó'oo'níiłii bits'ádziiskai.

²²Yee shá nidahałt'i'ii índa yee dashi'íinii shits'ą́ąjį' kónílééh, háálá bee hahíínídzíi'ii bik'eh honish'į́.

²³Azhą́ naat'áanii danilíinii t'óó nichǫ́'ígo shaa yádaałti' nidi, ná naal'a'í nishłíinii bee nihoyíní'áanii yéego nabik'ítséskees.

²⁴Bee hahíínídzíi'ii baa shił nihoozhǫǫh; éí kót'éego dashiłníinii ádaat'é.

²⁵Shii' sizíinii doo náádoo'nééh át'éégóó ni'jį' nihidíníit'ą́. Nizaad bee háínídzíi'ii bik'ehgo náshiiłnaah!

²⁶Yishááłgóó baa hweeshne'go shich'į' ééhosínísįįd. Bee nihoyíní'áanii bínashiníłtin!

²⁷Nibik'ehgo iináájí bik'idi'yiishtįįhgo áshíínísin. Áko t'óó bik'eda'ayóii ááníiłii baa yáshti' dooleeł.

²⁸Shii' sizíinii yínííł yéego yik'ee yicha. Nizaad bik'ehgo shidziilgo ánáshídlééh!

²⁹Na'adlo' bee ayi' honít'i'ii shits'ádiní'aah, áádóó nibee haz'áanii bee shaa jiiníbaah!

³⁰T'áá aaníí áhoot'ééjí nidiní'ą́. Bik'eh hoogáałii shilą́ąjį' hólǫ́ǫgo íínísin!

³¹Bee hahíínídzíi'ii bí'ádiistsood. Bóhólníihii nílíinii, t'ááká t'óó baa yáhásinígi áshóóle' lágo!

³²Nibik'eh ó'oo'níiłii bik'ehgo yishwoł doo, háálá t'áá ałtsojį' hózhǫ́ yéego shił ahojoobá'ígo nitsískees áshílééh!

³³Bóhólníihii nílíinii, bee nihoyíní'áanii bínashiníłtin, áko ashíyííłką́ bijį́įjį' bik'eh honish'į́į doo.

³⁴Nibee haz'áanii bik'eh honish'į́į doo biniyé ak'idi'yiishtįįhgo áshílééh; t'áá aaníí, shijéí t'áá át'é bee bik'eh honish'į́į doo.

³⁵Nibik'eh ó'oo'níiłii bik'ehgo shiyííłááł, háálá éí baa shił nihoozhǫǫh.

³⁶Bee hahíínídzíi'ii shijéí yídin nilį́įgo íínísin, adánoolníi dooleełígíí éí dooda!

³⁷T'áadoo biniyéhígóó danilíinii bits'ą́ąjį' dínísh'į́įgo áshíínísin, áádóó náshiiłnaahgo nik'ehgo áhoot'ééjí shiyííłáał dooleeł.

³⁸Nizaad bee háínídzíi'ii éí bee ni'dólzinii át'éego ná naal'a'í bich'į' bidziilgo ánílééh.

³⁹Yee shá nidahałt'i'ii binásdzidígíí shá nahjį' kónílééh, háálá nibik'eh hoogáa łii yá'ádaat'ééh.

⁴⁰Jó, nibik'ehgo iináanii bídin nishłį́. Nit'áá ákogi é'ét'é bee náshiiłnaah!

⁴¹Bóhólníihii nílíinii, shaa a'ááh niizįįh! Éí nibee yisdá'iildéehii nizaad bik'ehgo shaa diní'aah.

⁴²Ákohgo shá nahałt'i'ii bich'į' bee hááhásdziih doo, háálá nizaad baa jííníshłí.

⁴³Áádóó saad t'áá aaníinii t'áá ałtso shizéé'dóó haólééł lágo, háálá nibik'eh hoogáałii binahjį' shił chohoo'į́.

⁴⁴Áko nibee haz'áanii t'áá áłahjį' bik'eh honish'į́įgo hool'áágóó ahóyéel'áa doo.

⁴⁵Áádóó doo shihodiit'i'góó yisháał doo, háálá nibik'ehgo iináanii shił bééhodoozįįłgo hásht'į́.

⁴⁶Áádóó ałdó' bee hahíínídzíi'ii aláahgo naat'áanii danilíinii binááł bee yáshti' doo, áádóó doo baa yánísin da doo,

⁴⁷áko nibik'eh ó'oo'níiłii ayóó'óósh'ní; éí baa shił nihoozhǫǫh doo.

⁴⁸Áádóó ałdó' nibik'eh ó'oo'níiłii ayóó'óósh'nínígíí bíká dah dideesh'nih, áádóó índa bee nihoyíní'áanii nabik'ítséskees doo.

⁴⁹Ná naal'a'í nishłíinii nizaad bee shich'į' háínídzí'ígíí binahjį' shił chohoo'į́įgo áshiinilaaígíí shá béénílniih.

⁵⁰Shich'į' nidahwiiłnáago éí bee ha'ííníshní, háálá nizaad bee náhiish'na'go hinishná.

⁵¹Diné ádaa daha'niihii t'áá niná'deet'įįjį' t'óó shaa daadloh, nidi nibee haz'áanii doo bits'áosha' át'ée da.

⁵²Bóhólníihii nílíinii, t'áá ałk'idą́ą́' nibik'eh hoogáałii bénáshniihgo bee ha'ííníshní.

⁵³Diné doo yá'ádaashóonii nibee haz'áanii yóó'anídeidi'áahgo bik'ee shił náhoochih.

⁵⁴T'óó kónígháníjį' kééhasht'į́įgi bee nihoyíní'áanii dashiyiin nít'éé'.

⁵⁵Bóhólníihii nílíinii, tł'ée'go nízhi' bénáshniih, áádóó nibee haz'áanii bik'eh honish'į́.

⁵⁶Díí shíí' nilį́: nibik'ehgo iináanii bik'eh honish'į́.

⁵⁷Bóhólníihii éí shíí' nilį́. Nizaad bik'eh honish'į́į doo, dííniid.

⁵⁸Shich'oníníi dooleeł biniyé shijéí t'áá át'é bee nánooshkąąh; nizaad bik'ehgo shaa jiiníbaah.

⁵⁹Bee ánísht'éii baa nitséskeesgo bee háínídzíi'ii bich'į' dah nídiisdzá.

⁶⁰T'áadoo át'ah hwiindziní nibik'eh ó'oo'níiłii bik'eh hosíł'įįd.

⁶¹Diné doo yá'ádaashóonii shináshzhiizh, nidi nibee haz'áanii doo beisénah da.

⁶²T'áá ákogi át'éego nibik'eh hoogáałii biniinaa tł'é'ííłnihgo náádiish'nahgo ahéhee' nándish'niih doo.

⁶³Dandósinii áádóó nibik'ehgo iináanii yik'eh dahół'íinii t'áá ałtso bik' is nishłį́.

⁶⁴Bóhólníihii nílíinii, nahasdzáán t'áá át'éé nít'éé' aa a'ááh nínízinii bił hólǫ́; bee nihoyíní'áanii bínashiníłtin.

⁶⁵Bóhólníihii nílíinii, ná naal'a'í nishłíinii nizaad bik'ehgo yá'át'éhígi áshiinilaa.

⁶⁶Yá'át'éehii nihidit'aahígíí áádóó ił ééhózin bínashiníłtin, háálá nibik'eh ó'oo'níiłii wooshdlą́.

⁶⁷T'ah doo shich'į' nahwii'naah yę́ędą́ą́' yóó'ííyáá nít'éé', nidi k'ad nizaad bik'eh honish'į́.

⁶⁸Yá'át'éehii nílį́ áádóó yá'át'éehii baa naniná; bee nihoyíní'áanii bínashiníłtin.

⁶⁹Diné ádaa dadzódlíii wooch'ííd shá ádayiilaa, nidi shijéí t'áá át'é bee nibik'ehgo iináanii bik'eh honish'į́į doo.

⁷⁰Bijéí ak'ah bik'ídaasti'go doo ádidahól'áa da, nidi shí éí nibee haz'áanii baa shił nihoozhǫǫh.

⁷¹Bee nihoyíní'áanii bóhwiideesh'áłígíí biniyé shich'į' nahwii'náá nít'é'ígíí shá yá'át'ééh.

⁷²Óola áádóó béésh łigaii daashíínéelą́ą'di miildi ánéelą́'ígíí biláahgo bee hosíníł'áanii bee hahídziihígíí shił yá'át'ééh.

⁷³Níla' bee áshiinilaago hasht'eshiinilaa; nibik'eh ó'oo'níiłii bóhwiideesh'áłígíí biniyé ak'idi'yiishtįįhgo áshílééh.

⁷⁴Dandósinii dashiiłtsą́ągo bił dahózhǫ́ǫ doo, háálá nizaad bee shił chohoo'į́.

⁷⁵Bóhólníihii nílíinii, t'áá ákogi át'éego nihodiyí'aahgo áádóó na'ahódlíigo shich'į' nahoyíníłnáa'go shił bééhózin.

⁷⁶Ná naal'a'í nishłíinii nánooshkąąhgo nizaad bik'ehgo aa a'ááh nínízinígíí bee ha'ííníshníi le'.

⁷⁷Hinishnáa doo biniyé shaa a'ááh niizįįh, háálá nibee haz'áanii baa shił nihoozhǫǫh.

⁷⁸Bíni'dii diné ádaa dadzódlíii t'óó baa yáhásinígi ádabi'dólnééh, háálá t'áadoo biniinaanígóó binda'adlo'go bíighahí yee shaa nidahasne', ákondi shí éiyá nibik'ehgo iináanii nabik'ítséskees.

⁷⁹Dandósinii áádóó bee hahíínídzíi'ii bił béédahózinii bíni' shaa hakááh.

⁸⁰Doo t'óó shaa yáhásinígi áshidi'doolníił da biniyé bee nihoyíní'áanii binahjį' shijéí t'áadoo bee bik'íhót'ahí da le'.

⁸¹Shii' sizíinii éí nibee yisdá'iildéehii yídin nilį́; nizaad éí bee shił chohoo'į́.

⁸²Nizaad bíká dísh'į́į'go shináá' ch'ééh nídít'ashgo ádíshní, Hahgoshą' ha'ííníshníigo áshidíílííł?

⁸³Háálá tó abid éí łid bii'jį' nahííłtsoozígíí nahonishłin sélį́į́', ákondi bee nihoyíní'áanii doo baa yisénah da.

⁸⁴Haa nízahgóoshą' ná naal'a'í hináa doo? Atídashi ł'íiniishą' hahgo baa nídíít'įįł?

⁸⁵Diné ádaa dadzódlíii nibee haz'áanii doo yik'eh dahół'íinii díkwíigo shį́į́ shá hadahwiiznil.

⁸⁶Nibik'eh ó'oo'níiłii t'áá ałtso bada'ahódlí. T'áadoo biniinaanígóó shi'ana'í atídashił'į́; shíká anilyeed!

⁸⁷Nahasdzáán bikáa'gi k'adę́ę áníshdingo ádashilééh, nidi nibik'ehgo iináanii t'ah doo yóó'adish'aah da.

⁸⁸Aa a'ááh nínízinii bik'ehgo náshiiłnaah, áko bee hahíínídzíi'ii bik'eh honish'į́į doo.

⁸⁹Bóhólníihii nílíinii, yá'ąąshdi hool'áágóó nizaad hasht'e'niilyá.

⁹⁰Na'ahódlíii éí oochííłgóó t'áá ałtso bá hólǫ́; nahasdzáán bohoníłdzilgo íinilaago si'ą́.

⁹¹Nibik'eh hoogáałii bik'ehgo díí jį́įdi bee hahodít'é, háálá t'áá ałtsoní ná naal'a'í danilį́.

⁹²Nibee haz'áanii doo baa shił nihoozhǫǫhgóogo éí shich'į' nahwii'náago dasétsą́ą doo nít'éé'.

⁹³Nibik'ehgo iináanii ts'ídá doo baa yidiyeeshnah da, háálá éí binahjį' náshiiniłna'.

⁹⁴Níí' nishłį́, yisdáshíłteeh, háálá nibik'ehgo iináanii bíká ásht'į́į́ nít'éé'.

⁹⁵Diné doo yá'ádaashóonii dashidiyoołhééł biniyé shaa héeshjéé', nidi bee hahíínídzíi'ii hazhó'ó baa nitséskees dooleeł.

⁹⁶Hadaałt'éii t'áá ałtso bá nidahwiizt'i'go yiiłtsą́, nidi nibik'eh ó'oo'níiłii éí doo bá nihonít'i' da.

⁹⁷Dooládó' nibee haz'áanii ayóó'óósh'níi da! Shá bíighah nabik'ítséskeesgo shee e'e'ááh.

⁹⁸Shi'ana'í danilíinii biláahgo nibik'eh ó'oo'níiłii honisą́ągo áshósin, háálá hool'áágóó shił hólǫ́.

⁹⁹Nidashinitinii t'áá ałtso biláahgo shił ééhózin, háálá bee hahíínídzíi'ii éí nabik'ítséskeesii ádaat'é.

¹⁰⁰Hadaastihii nidi biláahgo shił ééhózin, háálá nibik'ehgo iináanii bik'eh honish'į́.

¹⁰¹Nizaad bik'eh honish'į́į doo biniyé doo yá'át'ééhgóó ádahoot'éii t'áá ałtso doo bikék'eh disháah da.

¹⁰²Nibik'eh hoogáałii doo bits'ánísháah da, háálá nashinínítą́ą́'.

¹⁰³Dooládó' nizaad łikango néishłįh da; tsés'ná bitł'izh bilááh át'éego nizaadígíí shił ayóó áhálniih!

¹⁰⁴Nibik'ehgo iináanii bee shił ni'ééhwiizįįh; éí bąą na'adlo'go áhooníłígíí t'áá ałtso jooshłxá.

¹⁰⁵Shilą́ąjį' bee hool'iní bee adoodlał nahalingo nizaad bik'ehgo nihidishtaał, áko yishááłgóó bee shá adinídíín.

¹⁰⁶Ádee hadeesdzíi'ii bi'deeshłííł: éí t'áá ákogi át'éego nibik'eh hoogáałii bik'eh honish'į́į doo.

¹⁰⁷T'áá íiyisí shich'į' nahwii'ná; Bóhólníihii nílíinii, nizaad bik'ehgo náshiiłnaah!

¹⁰⁸Bóhólníihii nílíinii, t'áá shí íinisingo shizaad nich'į' nááháshniihii shá niizįįh, áádóó nibik'eh hoogáałii bínashiníłtin.

¹⁰⁹T'áá áłahjį' she'iina' shílák'ee siláago shá báhádzid, nidi nibee haz'áanii doo baa yooshnéeh da.

¹¹⁰Diné doo yá'ádaashóonii łoh shá nideiz'ą́, nidi nibik'ehgo iináanii doo bits'ą́ą́' yóó'iisháah da.

¹¹¹Bee hahíínídzíi'ii hool'áágóó shíí' daazlį́į́', háálá éí shijéí bee bił nihoozhǫǫh.

¹¹²T'áá nihoolzhiizhjį' bee nihoyíní'áanii t'áá áłahjį' shijéí bee bik'eh honish'į́įgo íishłaa.

¹¹³Naaki nilį́įgo nitsídaakeesii jooshłxá, nidi nibee haz'áanii ayóó'óósh'ní.

¹¹⁴Nine' ahinishchéehii áádóó shinaage' nílį́; nizaad bee shił chohoo'į́.

¹¹⁵Doo yá'át'ééh ádaahníiłii, shits'ánóhkááh, áko shiDiyin God bibik'eh ó'oo'níiłii bik'eh honish'į́į doo.

¹¹⁶Hinishnáa doo biniyé nizaad bik'ehgo chánah áshíínísin, áádóó bee shił chohoo'ínígíí doo baa yánísin da le'!

¹¹⁷Deesdzih biniyé chánah áshíínísin, áko bee nihoyíní'áanii áłahjį' shił nilį́į doo!

¹¹⁸Bee nihoyíní'áanii yits'ą́ą́' yóó'adahakáahii t'áá ałtso yóó'ahidííní'ą́, háálá binda'adlo'ii éí t'áadoo nánídlíní da.

¹¹⁹Nahasdzáán bikáá'góó diné doo yá'ádaashóonii t'áá ałtso ąąh hahidiłhį́hígi át'éego nahjį' kóníł'į́; éí bąą hahíínídzíi'ii ayóó'óósh'ní.

¹²⁰Nik'ee shił yé'ígíí bąą shitah hoditłid, áádóó bee nihodiyíní'áanii binásdzid.

¹²¹T'áá ákogi é'ét'é índa doo haada yit'éii ásdzaa; shide ádahósinii doo bich'į' shi'dííłnih da.

¹²²Ná naal'a'í nishłíinii yá'át'éehii shá dooleeł biniyé shá sínízį́; ádaa dadzódlíii t'áadoo shide ádahósingo bá hosíníł'ání.

¹²³Nibee yisdá'iildéehii índa nizaad t'áá ákogi át'éii bíká dísh'į́į'go shináá' nídíníłnah.

¹²⁴Aa a' ááh nínízinii bik'ehgo ná naal'a'í nishłíinii shaa áhólyą́ áádóó bee nihoyíní'áanii bínashiníłtin.

¹²⁵Ná naal'a'í nishłį́; bee hahíínídzíi'ii shił bééhodoozįįł biniyé ak'idi'yiishtįįhgo áshílééh!

¹²⁶Bóhólníihii nílíinii, k'ad ádííníłígíí baa hoolzhiizh, háálá nibee haz'áanii t'áadoo nánídlínígóó ádayiilaa.

¹²⁷Éí bąą nibik'eh ó'oo'níiłii óola biláahgo, t'áá aaníí, óola agháago yá'át'éehii nidi biláahgo ayóó'óósh'ní.

¹²⁸Éí bąą nibik'ehgo iináanii t'áá ałtso t'áá ákogi ádaat'é nisin; na'adlo'go áhooníłígíí t'áá ałtso jooshłxá.

¹²⁹Bee hahíínídzíi'ii ayóó ádanóolnin; éí bąą shii' sizíinii yik'eh hół'į́.

¹³⁰Nizaad ííshjání ííł'ínígíí bee i'diidlaad; diné doo dahóyáanii ak'idadi'yiitįįhgo ádanile'.

¹³¹Yéego hasdah nisingo nibik'eh ó'oo'níiłii bídin nishłį́.

¹³²Nízhi' ayóó'ádayó'níinii baa jiiníba'ígi át'éego shí ałdó' shik'i nighaałgo shaa jiiníbaah.

¹³³Nizaad bik'ehgo yisháałgo áshílééh, áádóó doo ákwii é'ét'é t'áadoo shee ádíhólníhí doo.

¹³⁴Shide ádahósinii bits'ą́ąjį' hááshíłteeh, áko nibik'ehgo iináanii bik'eh honish'į́į doo.

¹³⁵Ná naal'a'í nishłíinii ninii' bee shik'i di'niłdíín, áádóó bee nihoyíní'áanii bínashiníłtin.

¹³⁶Tó nílį́ nahalingo shinák'eeshto' náálį́, háálá diné éí nibee haz'áanii doo yik'eh dahół'į́į da.

¹³⁷Bóhólníihii nílíinii, ts'ídá t'áá ákogi ánít'é, áádóó bee nihodiyíní'áanii t'áá ákogi ádaat'é.

¹³⁸Bee hahíínídzíi'ii bee ádaa hólne'ii éí t'áá ákogi ádaat'é áádóó t'áá íiyisí bada'ahódlí.

¹³⁹Nizaad baa hą́ą́h nisingo bíneeshdlínígíí t'áá áshidoołdįįłgo shide át'é, háálá shi'ana'í danilíinii nizaad yaa dayooznah.

¹⁴⁰Nizaad t'áá íiyisí niłtólí yee'; éí bąą ná naal'a'í nizaad ayóó'áyó'ní.

¹⁴¹Doo ayóó ánísht'ée da áádóó dashi'į́, nidi nibik'ehgo iináanii doo baa yooshnéeh da.

¹⁴²Nit'áá ákogi é'ét'éii éí hool'áágóó t'áá ákogi át'é, áádóó nibee haz'áanii éí t'áá aaníinii át'é.

¹⁴³Shide áhoodzaago yínííł shik'iildoh, nidi nibik'eh ó'oo'níiłii bee shił hózhóonii át'é.

¹⁴⁴Bee hahíínídzíi'ii ahóyéel'áágóó t'áá ákogi ádaat'é; ak'idi'yiishtįįhgo áshílééh, áko hinishnáa doo.

¹⁴⁵Bóhólníihii nílíinii, shijéí t'áá át'é bee chánahgo nániisiskan. Shich'į' ééhonísįįh! Bee nihoyíní'áanii bik'eh honish'į́į doo.

¹⁴⁶Chánahgo nich'į' sodiszin; yisdáshíłteeh, áko bee hahíínídzíi'ii bik'eh honish'į́į doo.

¹⁴⁷T'ah yikáíhdą́ą́' náádiish'nahgo shíká i'doolwoł biniyé ná'ooshkąąhgo sonídíszįįh. Nizaad bee shił chohoo'į́.

¹⁴⁸Nizaad nabik'ítséskees doo biniyé tł'éé' bíighah dínísh'į́į'go yiłkááh.

¹⁴⁹Aa a'ááh nínízinii bik'ehgo shiinéé' shá diits'į́į́h; Bóhólníihii nílíinii, bee nihodiyíní'áanii bik'ehgo náshiiłnaah.

¹⁵⁰Doo yá'ádaashóonii yikék'ehjí deíkáahii shit'ááh nájah. Nibee haz'áanii doo deeghánígóó yits'ákai.

¹⁵¹Nidi, Bóhólníihii nílíinii, kǫ́ǫ́ honílǫ́, áádóó nibik'eh ó'oo'níiłii t'áá ałtso t'áá aaníinii ádaat'é.

¹⁵²Bee hahíínídzíi'ii t'áá ałk'idą́ą́' díí shił bééhózin: hool'áágóó bidahoníłdzilgo íinilaa.

¹⁵³Bee shich'į' nahwii'náanii baa ákoniizįįhgo yisdáshíł teeh, háálá nibee haz'áanii doo baa yooshnéeh da.

¹⁵⁴Áyáłti'ii nílį́įgo shá yáníłti' áádóó yisdáshíłteeh; nizaad bik'ehgo náshiiłnaah!

¹⁵⁵Diné doo yá'ádaashóonii bits'ą́ądi doo nádiinághánídi bee yisdá'iildéehii hólǫ́, háálá bee nihoyíní'áanii doo hádaat'į́į da.

¹⁵⁶Bóhólníihii nílíinii, aa a'ááh nínízinígíí ayóó ádaat'é; nibik'eh hoogáałii bik'ehgo náshiiłnaah.

¹⁵⁷Atídashił'íinii índa shi'ana'í danilíinii éí t'óó ahayóí, nidi bee hahíínídzíi'ii doo bits'áosha' át'ée da.

¹⁵⁸Nináda'dii'aahii nísh'į́įgo dayí'įįd, háálá nizaad doo yik'eh dahół'į́į da.

¹⁵⁹Nibik'ehgo iináanii t'áá íiyisí ayóó'óósh'nínígíí baa nitsíníkees! Bóhólníihii nílíinii, aa a'ááh nínízinii bik'ehgo náshiiłnaah.

¹⁶⁰Nizaad t'áá át'é éí t'áá aaníí, áádóó t'áá ákogi át'éego nibik'eh hoogáałii t'áá át'é hool'áágóó hólǫ́.

¹⁶¹T'áadoo biniinaanígóó naat'áanii danilíinii atídashííł'įįd, nidi shijéí bee nizaad dinisin.

¹⁶²Naalye'é daas'náanii ła' bik'ízhníyá nahalingo nizaad t'áá íiyisí baa shił hózhǫ́.

¹⁶³T'áá ádzaagóó hane'ii jooshłxáago t'óó baa'ih nisin, nidi nibee haz'áanii éí ayóó'óósh'ní.

¹⁶⁴T'áá ákogi át'éego nibik'eh hoogáałii biniinaa tsosts'idi naa náhásh'nihgo aná'át'ááh.

¹⁶⁵Nibee haz'áanii ayóó'ádayó'níinii éí t'áá íiyisí hasht'edadít'é, áko t'ááłá'í nidi doo azadabidínóo'ahí da.

¹⁶⁶Bóhólníihii nílíinii, nibee yisdá'iildéehii bíká shił chohoo'į́, áádóó nibik'eh ó'oo'níiłii bi'iishłaa.

¹⁶⁷Shii' sizíinii éí bee hahíínídzíi'ii yik'eh hóół'įįd, áádóó t'áá íiyisí ayóó'óósh'ní.

¹⁶⁸Nibik'ehgo iináanii áádóó bee hahíínídzíi'ii bik'eh hinishná, háálá bee ánísht'éii t'áá ałtso níníł'į́.

¹⁶⁹Bóhólníihii nílíinii, háni'dii chánahgo sodiszinígíí nidáahjį' ahosiilts'įįh; nizaad bik'ehgo ak'idi'yiishtįįhgo áshíínísin!

¹⁷⁰Háni'dii ná'ooshkąąhígíí nidáahjį' ahosiilts'įįh; nizaad bik'ehgo yisdáshíłteeh.

¹⁷¹Bíni'dii naa hashniih doo, háálá bee nihoyíní'áanii bínashiníníłtą́ą́'.

¹⁷²Bíni'dii nizaad baa hashne' doo, háálá nibik'eh ó'oo'níiłii t'áá át'é t'áá ákogi ádaat'é.

¹⁷³Háni'dii níla' bee shíká adíílwoł biniyé hasht'e' íínísin, háálá nibik'ehgo iináanii nidiní'ą́.

¹⁷⁴Bóhólníihii nílíinii, nibee yisdá'iildéehii bídin nishłį́, áádóó nibee haz'áanii baa shił nihoozhǫǫh.

¹⁷⁵Naa hashniih doo biniyé háni'dii hinishná, áádóó nibik' eh hoogáałii háni'dii shíká iilyeed.

¹⁷⁶Dibé yóó'ííyáhígíí nahalingo yóó'ííyá; ná naal'a'í nishłíinii hashinítá, háálá nibik'eh ó'oo'níiłii doo baa yooshnéeh da.