Read Navajo PSALMS 132 Bible Online

PSALMS 132 - Navajo bible

PSALMS 132

¹Bóhólníihii nílíinii, David atíbi'dil'íinii t'áá ałtso béénílniih.

²Íídą́ą́' Bóhólníihii yich'į' ádee hadoodzíi'ii Jéíkab biDiyin God Ayóó'át'éii yich'į' ádee hadoodzíi'go ání,

³T'áá aaníí shighan góne' doo yah adeesháał da índa shitsásk'eh doo biih deesh'nah da,

⁴doo iideeshhosh da, doo nidi dínéeshch'ił da,

⁵Bóhólníihii bá haz'ą́ą dooleełgi, éí Jéíkab biDiyin God Ayóó'át'éii kééhat'į́į dooleełgi bik'íníyáajį' índa ákódeeshnííł.

⁶Jó, Éfratah nahós'a'di baa hosidiits'ą́ą́'; tsin yíl'áhígíí bíighahgóó dahootsogi bik'íniikai.

⁷Haa'íshą' kééhat'ínígi yah adiikah; bibikáá' dah adées'eezí si'ą́ągi nidahodiidlaał!

⁸Bóhólníihii nílíinii, díldzííł, háánílyį́įh dooleełgóó tsits'aa' dílzinii nidziil bee bééhózinii bił dínááh.

⁹Háni'dii nináá'iiłniihii t'áá ákogi át'éii yee hadadít'ée le', áádóó nidiyį́į́' danilíinii bił dahózhǫ́ǫgo nídididla' le'.

¹⁰Ná naal'a'í David biniinaa ak'ah bik'i yeiniziidgo yínísį́į'ii nits'ą́ąjį' doo habidínííłniił da.

¹¹Bóhólníihii t'áá aaníí áníigo índa doo yits'ą́ąjį' áńdoo'nííłgóó David yich'į' yee ádee hadoodzíí', Nits'ą́ą́dóó da'ahílchíihii ła', bikáá'dóó nahó'áii yikáá' dah náhidinoobįįłgo ádeeshłííł.

¹²Na'áłchíní éí shibee aha'deet'áanii índa bee hahásdzíi'ii bee nidadínéeshtįįłígíí yik'eh dahół'į́įgo banááda'áłchíní ałdó' bikáá'dóó nahó'áii hool'áágóó yikáá' dah náhidinoobįįł doo.

¹³Háálá Bóhólníihii éí Záíyangi náhodii'ą́; ákwii kééhat'į́į doo biniyé yiniizį́į́'.

¹⁴Kwe'é hool'áágóó hanáshyį́įh doo, kwe'é kééhasht'į́į doo, háálá éí bídin nishłį́į́ nít'éé'.

¹⁵Záíyandi bikiin dajiináanii t'óó ahayóí bee hak'ijishdlíi doo; bidine'é baa dahojoobá'íii ch'iyáán yee hwiih danilį́įgo ádeeshłííł.

¹⁶Ákwe'é nááda'iiłniihii bee yisdá'iildéehii bee hadadideeshłííł, áádóó ákwe'é bidiyį́į́' danilíinii bił dahózhǫ́ǫgo nídididla' doo.

¹⁷Ákwii David dziil bá hooleełgo ádeeshłííł; ak'ah bik'i yaadziidgo yísį́į'ii bá bee hool'iní ła' hasht'eishłaa.

¹⁸Hwe'ana'í danilíinii yáhásin bee hadadideeshłííł, nidi naat'á ch'ah hak'i dí'ánígíí bee bééhózingo hóhólníhígíí náás yit'ih doo.