Read Navajo PSALMS 135 Bible Online

PSALMS 135 - Navajo bible

PSALMS 135

¹Bóhólníihii baa dahohniih. Bóhólníihii bízhi' baa dahohniih; Bóhólníihii bá naal'a'í danohłíinii, Bóhólníihii baa dahohniih!

²Nihí Bóhólníihii bikin bii' sohodizin góne' nihiDiyin God bikin binaagi haz'ánígi nisoozíinii,

³Bóhólníihii baa dahohniih, háálá Bóhólníihii yá'át'éehii nilį́; bízhi' bee dayínóhshíigo baa dahohniihgo dahohtaał, háálá ayóó ánóolnin!

⁴Háálá Bóhólníihii éí Jéíkab dine'é, t'áá éí Ízrel dine'é, t'áá hó hadine'é dooleeł biniyé ádá néidii'nil.

⁵Háálá Bóhólníihii ayóó át'éii nilį́įgo shił bééhózin, áádóó nihiDiyin God éí diyin dabidi'níinii t'áá ałtso yiláahgo át'é.

⁶Yá'ąąshdi, nahasdzáán bikáa'gi, tónteel bikáá'góó índa táłtł'ááhgóó Bóhólníihii t'áá ádeeshłííł nízinígíí áyiilaa.

⁷Nidahonees'ą́ą́dę́ę́' t'áá bí k'os hadahalzhoodgo ííł'į́, nahałtin doogo atsiniltł'ish anídahata'go ííł'į́ áádóó biyódí bił haz'ą́ą́dóó níyolgo ííł'į́.

⁸Bí lą́ą Ííjip kéyahdi diné áłtsé nidahaazhchíinii índa naaldloosh áłtsé nidahaazhchíinii íísdįįd ni'.

⁹Éí, Ííjip dine'é nohłíinii, nihitahgi Féro áádóó bá nidaal'a'í bik'ijį' bee éédahózinii índa t'óó bik'eda'ayóii áyiilaa ni'.

¹⁰Éí ał'ąą dine'é t'óó ahayóí índa aláahgo naat'áanii ayóó ádaat'éii íísdįįd ni'.

¹¹Sáíhan éí Ámor dine'é binanit'a'í nilį́į́ nít'éé' yę́ę, áádóó Ag éí Béíshan dine'é binanit'a'í nilį́į́ nít'éé' yę́ę, índa Kéínan kéyahgi bee ídahólnííh nít'éé' yę́ę t'áá ałtso t'áá yił áhásdįįd ni'.

¹²Áko dabikéyah éí Ízrel hadine'é bíí' dooleełgo baazhdiní'ą́.

¹³Bóhólníihii nílíinii, nízhi' hool'áágóó hólǫ́. Bóhólníihii nílíinii, náás oochííłgóó t'áá ałtso bee nééhániih.

¹⁴Háálá Bóhólníihii bidine'é doo haada yit'éégóó yá hadoodzih, áádóó bá nidaal'a'í łahgo át'éego yaa tsíndookosgo yaa a'ááh dínóozįįł.

¹⁵Ał'ąą dine'é bi'eda'alyaii éí béésh łigaii índa óola bee ádaalyaa; éí diné bíla' yee ádayiilaii ádaat'é.

¹⁶Éí bizéé' dahólǫ́ǫ nidi doo yee yádaałti' da. Bináá' dahólǫ́ǫ nidi doo yee da'oo'į́į da.

¹⁷Bijaa' dahólǫ́ǫ nidi doo yee da'diits'a' da. Bizéé' dahólǫ́ǫ nidi yee nídadidzihii ádaadin.

¹⁸Díí ádajoolíłígíí t'áá éí nidahojílin; t'áá aaníí, bi'eda'alyaii yaa dadzólíhígíí t'áá ałtso ałdó' t'áá ákódaat'é.

¹⁹Ízrel dine'é danohłíinii, Bóhólníihii baa dahohniih! Éran dine'é danohłíinii, Bóhólníihii baa dahohniih!

²⁰Líívai dine'é danohłíinii, Bóhólníihii baa dahohniih! Bóhólníihii dadíínóhsinii, Bóhólníihii baa dahohniih!

²¹Bóhólníihii éí Záíyandóó Jerúsalemgi kééhat'íinii baa ha'niih! Bóhólníihii baa dahohniih!