Read Navajo PSALMS 139 Bible Online

PSALMS 139 - Navajo bible

PSALMS 139

¹Bóhólníihii nílíinii, hashíínísid áádóó shééhonísin!

²Náníshdaah áádóó náádiish'nahgo nił bééhózin; nízaadę́ę́' honílǫ́ǫ nidi baa nitsískeesii bik'idi'yítįįh.

³Hidishááhgóó índa náníshtééhgóó t'áá át'é nił bééhózin, áádóó ánísht'éii t'áá ałtso nił bééhózin.

⁴Bóhólníihii nílíinii, saad t'ááłá'í nidi t'ah doo bee haasdziihgóó t'áá át'é nił bééhózin.

⁵Shikéédę́ę́' índa shitsijį' honílǫ́, índa she'iina' bee nóhólníihgo shik'i dah díílnih.

⁶Dooládó' ákót'éego ił ééhózin doo bit'áhíjį' nitsískeesii ayóó ánóolnin da; éí bi'oh nitsískosii át'é, áko shóideesht'eełgi doo bíneesh'ą́ą da.

⁷NiNíłch'i bits'ą́ąjigo háajigoshą' dah dideeshááł? Éí doodaii', honílónígíishą' háajigo bits'ą́ą́' dah dideeshwoł?

⁸Yádiłhił biyi'góó ííyáa nidi áadi honílǫ́! Ch'į́įdiitahdi nétį́į nidi áadi honílǫ́!

⁹Tónteel nineel'ą́ąjį' yikáíh bił t'áá ahąąh dah diisht'a'go ákwe'é kééhasht'į́į nidi,

¹⁰ákwe'é níla' bee nashílóoz doo áádóó níla' nish'náájí shótą' doo.

¹¹Chahałheeł ts'ídá shik'iidooldoh, áádóó shinaagóó adinídínígíí chahodoołhił, dííniidgo,

¹²T'áá aaníí, chahałheeł nidi doo nits'ąą náshididooł'į́įł da. Tł'éé' éí jį́įgo hool'inígíí nahalin, háálá chahałheeł éí adinídíín t'áá bił aheełt'éego níníł'į́.

¹³Háálá shimá biishch'id bii'di ahą́ą́h shidínínil; shiyi'di dahólóonii nidi hasht'edeinilaa.

¹⁴Bits'ąą hasti'go áádóó t'óó bik'e'ayóigo áshiinilaaígíí bąą naa hashniih doo. Áálíiłii ayóó ádanóolnin! Éí shii' sizíinii t'áá íiyisí bił bééhózin.

¹⁵Nahasdzáán biyi'di t'áá nahonit'inee shits'íís shá hadilnééh yę́ędą́ą́' nił bééhózingo doo nits'ąą nanil'in da nít'éé'.

¹⁶Bee áshi'diilyaii t'ah doo hasht'eilnééhdą́ą́' yiniłtsą́; t'ah doo hashi'dilnééhdą́ą́' nidi shíyooł káał dooleełii ałdó' ninaaltsoos bik'inéhéesdzoh.

¹⁷Diyin God nílíinii, nintsíkees danilíinii dooládó' ílį́įgo baa nitsískees da! Dooládó' ayóó ánéelą́ą' da!

¹⁸Éí bi'ííníiłta'go séí bilááh ánéelą́ą́'; ch'ééhésdzíidgo t'ahdii nił honishłǫ́ǫ łeh.

¹⁹Diyin God nílíinii, diné doo yá'ádaashóonii t'áá aaníí nidííłtsił. Éí bąą diné nidaołtseedgo bidił dahidinééh ádaohłe'go nihił dahoneełninii, shits'ánóhkááh.

²⁰Éí diné doo daats'íídgóó nichxǫ́'ógo nik'ijį' yádaałti'; ni'ana'í danilíinii nízhi' doo ílį́į́góó yee hadahadziih!

²¹Bóhólníihii nílíinii, nik'ee dadiniihii t'áá íiyisí bik'ee dinishniih. Áádóó nich'į' nídahidiikáahii bił ni'nish'įįh.

²²T'áá niná'deet'įįdjį' bik'ee dadinishniih; shi'ana'í danilį́įgo baa nitséskees.

²³Diyin God nílíinii, nashíłkaahígíí bee shijéí át'éii nił bééhoozį́į́'! Shínítáahgo shintsíkees át'éii nił bééhoozį́į́'!

²⁴Doo yá'áshóonii daats'í ła' shiyi'di hólǫ́ǫgo nił bééhodoozįįł, áádóó hool'áágóó áhoot'éégóó shá yínááł!