Read Navajo PSALMS 143 Bible Online

PSALMS 143 - Navajo bible

PSALMS 143

¹Bóhólníihii nílíinii, shisodizin shá diits'į́į́h; nánooshkąąhígíí shá yíníłts'ą́ą́'! Na'ahódlíhígíí índa t'áá ákogi ánít'éii bee shich'į' ééhonísįįh!

²Ná naal'a'í nishłíinii doo shá nihodíí'áał da, háálá nidááhdóó diné hináanii doo ła'da ts'ídá t'áá ákogi át'éego bá hadíídzih da.

³Háálá shi'ana'í atíshíł'į́; łeeh shíná'áłjish; t'áá shiidą́ą'dii daneeznáanii nahalingo chahałheełgi honishłǫ́ǫgo áshósin.

⁴Éí bąą shii' sizíinii doo bidziil da nádleeh; shijéí bide áhoodzaa.

⁵Ałk'idą́ą́' áhóót'įįdii bénáshniih; ninaanish t'áá ałtso nabik'ítséskees; níla' bee binishínílnishii hazhó'ó baa nitséskees.

⁶Nich'į' dah nídiishnih; kéyah dibáá' nilínígi át'éego shii' sizíinii dibáá' nilį́ nahalingo nídin nilį́. Síilah.

⁷Bóhólníihii nílíinii, tsį́įłgo shich'į' ééhonísįįh! Shii' sizíinii doo bidziil da nádleeh! Ch'į́įdiitah góyaa ahikáahii doo bitah deeshłeeł da biniyé doo shits'ą́ąjį' adíníít'áał da.

⁸T'ah abínídą́ą́' aa a'ááh nínízinii baa hane'go háni'dii diists'a'go áshílééh, háálá ni naa jííníshłí. Yishááł dooleełgóó bínashiníłtin, háálá shii' sizíinii nich'į' cho'ooł'į́įgo níká déez'į́į́'.

⁹Bóhólníihii nílíinii, shi'ana'í danilíinii bits'ą́ąjį' yisdáshíłteeh! Náshididííł'į́į́ł biniyé nich'į' nídiishwod!

¹⁰Íinínízinii baa naasháa dooleełgo bínashiníłtin, háálá shiDiyin God nílį́! NiNíłch'i éí yá'át'éehii nilį́; bíni'dii kéyah k'íhoneezláajį' shił adíí'ash!

¹¹Bóhólníihii nílíinii, nízhi' binahjį' náshiiłnaah! T'áá ákogi ánít'éhígíí binahjį' shii' sizíinii bich'į' nahwii'nánígíí bii'dóó yisdáníłteeh!

¹²Áádóó aa a'ááh nínízinii bik'ehgo shida'ana'í naniłtseed, áádóó atídashił'íinii t'áá ałtso áníłdįįh, háálá ná naal'a'í nishłį́.