Read Navajo PSALMS 20 Bible Online

PSALMS 20 - Navajo bible

PSALMS 20

¹Ach'į' nahwii'ná bii' nínéidiilkáahgo Bóhólníihii nich'į' énáhoosįįh le'! Jéíkab biDiyin God bízhi' choiníł'į́įgo nich'ą́ą́h nahale' doo!

²Bikin bii' sohodizindę́ę́' níká oolyeed, índa Záíyandę́ę́' nidziilgo ánóle'!

³Nááhíłniihígíí t'áá át'é ná yénálniih le', índa didlidgo nááhíłniihii ałdó' ná néiniidzįįh le'! Síilah.

⁴Nijéí yídin nilíinii bik'ehgo neidó'ááł, índa ninahat'a' t'áá ałtso ná bohoolníiłgo áyósin le'!

⁵Ak'eh dínídlį́'ígíí t'áá íiyisí baa nihił nidahoozhǫǫh doo, áádóó nihiDiyin God bízhi' binahjį' nihidah na'at'a'í dah dadii'nił! Yíníkeedígíí t'áá ałtso éí Bóhólníihii ná yi'ósin le'!

⁶K'ad shił bééhózingo Bóhólníihii t'áá bí ak'ah yik'i yayiiziidgo yiyíísį́į'ii yisdáyiił teeh; bigaan nish'náájí yee ayóó át'éego ak'eh didlį́įgo yá'ąąsh hodiyingo haz'ą́ą́dę́ę́' yich'į' ééhodoosįįł.

⁷Ła' tsindaabąąs bijáád naakiígíí t'éí yada'ólí, índa ła' éí łį́į́' t'éí yada'ólí, nidi nihí éí Bóhólníihii nihiDiyin God bízhi' baa dadzííníidlí.

⁸Éí chą́ą́h hidínídéehgo naa'ahindééh, nidi nihí nídahidiikaigo nidasiidzį́.

⁹Bóhólníihii nílíinii, aláahgo naat'áanii yisdáníłteeh. Baa nídaniikąąhgo nihich'į' ééhodíísįįł.