Read Navajo PSALMS 21 Bible Online

PSALMS 21 - Navajo bible

PSALMS 21

¹Bóhólníihii nílíinii, nibee adziil binahjį' aláahgo naat'áanii t'áá íiyisí bił hózhǫ́ǫ doo, áko nibee yisdá'iildéehii ayóó át'éego yaa bił nihoozhǫǫh doo!

²Bijéí yídin nilíinii baa dííní'ą́, áádóó yókeedii t'áadoo bits'ąą t'ą́ą́' íinilaa da. Síilah.

³Jó, hózhǫ́ǫ́jí bee ak'ihojidlíii bił bidááh nánídááh; óola ílíinii bee naat'á ch'ah ályaago bik'éédí'ááh.

⁴Iiná níyííkeedgo baa dííní'ą́; hool'áágóó ahóyéel'áágóó bíyoołkáał doogo bá íinilaa.

⁵Yisdáhíłteehígíí bąą ayóó át'é silį́į́'; bee ił ídlíinii índa bee ayóó é'ét'éii baa hidí'aah.

⁶Jó, hool'áágóó agháago bik'ihojidlíigo íínísin; hoł honílónígíí bąą t'áá íiyisí hoł hózhǫ́ǫgo áhwíínísin.

⁷Háálá aláahgo naat'áanii éí Bóhólníihii yaa dzólí; Aláahgo Ayóó'át'éii ayóó'ó'ó'níigo aa a'ááh nízinii bee doo nahjį' kóbidi'doolníił da.

⁸Ni'ana'í danilíinii t'áá át'é bídínííl'ąął; ayóó ánóodziilgo bee diné danjoołáii bik'eh didíídleeł.

⁹Náhóóchįįdgo łe'jishbéézh nahalingo áhodííłdįįł. Bóhólníihii hashké nídzingo hodooldił, áádóó kǫ' yee ahodidoołk'ą́ą́ł.

¹⁰Nahasdzáán bits'ą́ąjį' ba'áłchíní ádííłdįįł, áko bits'ą́ą́dóó nidahaazhchínígíí éí diné bitahgóó nidaakaii ałdó' ádííłdįįł.

¹¹Doo yá'át'éehii yee nik'i dahodidoo'ááł yiniyé nindaha'ą́; nindahazgizgo nindahaz'ą́. Ákódadooníłígíí ts'ídá doo yídaneel'ą́ą da.

¹²Háálá t'ą́ą́' anáhidínííłkał; ne'ałtį́į́' hasht'eniléehgo k'aa' bee bik'ijį' adzidiyííłkah.

¹³Bóhólníihii nílíinii, nidziilígíí bee ayóó át'éii nílį́į le'! Dahwiitaałgo nidziil baa dahwii'niih doo.