Read Navajo PSALMS 25 Bible Online

PSALMS 25 - Navajo bible

PSALMS 25

¹Bóhólníihii nílíinii, shii' sizíinii nídin nilį́įgo nich'į' sodiszin.

²ShiDiyin God nílíinii, naa jííníshłí; t'ááká t'óó baa yáhásinígi ádashóle' lágo; shi'ana'í danilíinii doo shik'eh dadidlį́į da le'.

³T'áá aaníí niba' ádaat'éhígíí doo ła' t'óó baa yáhásinígi ábi'dil'į́į da le', nidi t'áadoo biniinaanígóó shindahaz'áanii ádaa yádahiniizįįh le'.

⁴Bóhólníihii nílíinii, nik'ehgo ádahoot'éii shił bééhonísįįh; nik'ehgo da'nítiinii bínashiníłtin.

⁵Nit'áá aaníinii bii'góó shił yí'ash, áádóó nashinítin, háálá Diyin God bee yisdááyáii nílį́; t'áá áłahjį' niba' ánísht'é.

⁶Bóhólníihii nílíinii, aa a'ááh nínízinii áádóó ayóó'í'ííní'níigo jiiníba'ígíí bee shéénílniih, háálá t'áá shiidą́ą'di hólǫ́.

⁷Ániid naasháádą́ą́' ádił ni'iyésíi'ii índa bee haz'áanii híti'ii t'áadoo béénílniihí. Bóhólníihii nílíinii, yá'ánít'éhígíí binahjį' aa a'ááh nínízinii bik'ehgo shéénílniih!

⁸Bóhólníihii nilíinii éí yá'át'ééh áádóó t'áá aaníí góne' át'éii nilį́; éí bąą bąąhági ádaaníiłii yá'át'ééh honít'i'ii yee neinitin.

⁹A'ohgo ádaat'éii yá'áhoot'ééhgóó yoo'ish, áádóó a'ohgo ádaat'éii hohonít'i'ii bínabizhniłtin.

¹⁰Bóhólníihii bibee aha'deet'áanii índa yee hahaasdzíi'ii yida'ał'ínígíí éí aa a'ááh hasin áádóó t'áá aaníinii bee da'nítiingóó deíkááh.

¹¹Bóhólníihii nílíinii, doo ákwii áát'įįdii nízhi' binahjį' yóó'adí'aah, háálá ayóó ánéelą́ą́'.

¹²Háí diné shį́įshą' Bóhólníihii yidísinii nilį́? Éí diné joogááł dooleełgóó nizhdiní'ą́ągo ákǫ́ǫ́ Bóhólníihii nahonitin doo.

¹³Hwii' sizíinii t'áadoo yídin nilínígóó hináa doo, áádóó kéyah aa deet'ánígíí ha'áłchíní daabíí' dooleeł.

¹⁴Bóhólníihii deidósinii éí Bóhólníihii yił ahídadínéelná; bibee aha'deet'áanii bił béédahózingo áyósin.

¹⁵T'áá áłahjį' Bóhólníihii bich'į' dínísh'į́į́', háálá łoh biyi'dę́ę́' hááshididooł'is.

¹⁶Shich'į' naanánídáahgo shaa jiiníbaah, háálá t'áá sáhí naashá áádóó atíshi'dil'į́.

¹⁷Yínííł ánísht'éhígíí shijéí bide ádzaa; tsístł'asíyáhígíí bii'dóó hááshíłteeh.

¹⁸Atíshi'dil'ínígíí áádóó ti'hooshníhígíí hazhó'ó shá baa nitsíníkees, áádóó ádił ni'iisíhígíí ałtso shá yóó'adí'aah.

¹⁹Shi'ana'í t'óó ahayóígíí áádóó diné doo ił nida'íłdįįhii doo dashíłdinígíí baa nitsíníkees.

²⁰Shii' sizíinii baa áhólyą́, áádóó yisdáshíłteeh; t'óó baa yáhásinígi áshi'dólne' lágo, háálá naa jííníshłí.

²¹Doo shina'adlo'ii áádóó t'áá ákóne' ánísht'éii bee yisdziih le', háálá niba' ánísht'é.

²²Diyin God nílíinii, Ízrel dine'é bich'į' nidahwii'náanii t'áá át'é bik'éniná'nídléego háání'nííł.