Read Navajo PSALMS 27 Bible Online

PSALMS 27 - Navajo bible

PSALMS 27

¹Bóhólníihii éí shá adinídíín áádóó bee yisdááyáii nilį́; háishą' bik'ee ádíyanahasyiz doo? Bóhólníihii adziil yee shaa áhályą́ągo hinishná; háishą' binásdzid doo?

²Doo yá'ádaashóonii, shi'ana'í danilíinii índa shidadiilkaalii, éí naaldlooshii nidahalingo dashidoolghał biniyé shaatįįh yínáago dadeezgo'go naa'aníídee'.

³Azhą́ t'óó ahayóí shik'iidoojah biniyé shinaagóó niheeznáa nidi, shijéí doo bee nitsináshtłi' da doo; azhą́ shik'i dah adishjée' nidi, Bóhólníihii baa jííníshłíi doo.

⁴Ts'ídá t'ááłá'í t'éí Bóhólníihii bííkeed: éí íiyisí hásht'į́įgo Bóhólníihii yee ayóó ánóolninii haasíidgo bikin bii' sohodizin biyi' na'ídíshkid doo biniyé bii' kééhasht'į́įgo shíyoołkáał dooleeł.

⁵Háálá ach'į' nahwii'ná biyi' shíídíiską́ągo biníbaal biyi' góne' nínáshidił'į́įh doo; biníbaal biyi' doo hoot'į́įdi shinées'į́į' doo; tséghą́ą'jį' hashidoołtééł.

⁶K'ad lá índa shida'ana'í bik'eh dishdlį́įgo de áshidi'doolnííł, áádóó biníbaal bii' hodílzinii biyi' shił hózhǫ́ǫgo Bóhólníihii bich'į' náá'iishniih doo; t'áá aaníí, Bóhólníihii baa hashniihgo bich'į' hashtaał doo.

⁷Bóhólníihii nílíinii, t'áá íiyisí nánooshkąąhgo shíísíníłts'ą́ą́', shaa jiiníbaah, shich'į' ééhonísįįh!

⁸Háshidíní'į́į́', shidííníniidgo shijéí áníłní, Bóhólníihii nílíinii, hándésh'į́į́'.

⁹T'áadoo shits'ąą na'ádiníl'iní. Ninaal'a'í nishłíinii náháchį'go doo nahgóó shi'dííłnih da; jó, shíká anánílwo' nít'éé'. ShiDiyin God bee yisdááyáii nílíinii, doo t'óó shi'dííłnih da, doo yóó'ashididíí'áał da!

¹⁰Azhą́ shizhé'é áádóó shimá yóó'ashidíí'ą́ą nidi, Bóhólníihii náshididoołtééł.

¹¹Bóhólníihii nílíinii, nik'ehgo áhoot'éii bínashiníłtin; shi'ana'í biniinaa k'íhoneezláágóó shiyííłááł.

¹²Shida'ana'í doo baa shididíí'áał da, háálá t'áá ádzaagóó aa nidahalne'ii shich'į' ádéé dahooldzíidgo shik'ijį' náhidiikááh.

¹³Dahináanii bitahdi Bóhólníihii bee ajooba' yideestsééł nisingo t'áadoo yisisdląądgóó shichoo'į' ásdįįd doo nít'éé'!

¹⁴Bóhólníihii biba' ánít'ée le'; chánah nílį́į le', áko nijéí bidziilgo íidoolííł; t'áá aaníí, Bóhólníihii biba' ánít'ée le'!