Read Navajo PSALMS 33 Bible Online

PSALMS 33 - Navajo bible

PSALMS 33

¹T'áá ákogi ádaahníiłii, Bóhólníihii bee nihił nidahoozhǫǫh! T'áá ákogi ádaat'éii naa dahaniihgo beełt'é.

²Tsin tł'óół naakits'áadah bąąh daneelzhee'go bee nida'a'néii bee Bóhólníihii baa dahohniih, tsin tł'óół neeznáá bąąh daneelzhee'go bee bá nidaahnéego dahohtaał!

³Sin ániidíii bee bich'į' dahohtaał; daohchįįhgo ayóó íits'a'go bee nidaahné.

⁴Háálá Bóhólníihii bizaad éí t'áá ákogi át'é, áádóó binaanish t'áá át'é yaa naagháhígíí bada'ahódlí.

⁵T'áá ákogi át'éii índa doo haada yit'éii ayóó'áyó'ní; nahasdzáán éí Bóhólníihii bibee aa a'ááh hasinii bił si'ą́.

⁶Bóhólníihii t'óó haadzíi'go yádiłhił hazlį́į́', índa hayol bee hadziidziihgo yádiłhił biyi'di dahiníláii t'áá át'é dahazlį́į́'.

⁷Tó ałt'anehegeehgo ałk'iditą́ągo áyiilaa; kin biyi' hasht'e'na'aznilígi át'éego tónteel ayóó íídéetą́'ígíí beełt'éego hasht'éyiilaa.

⁸Nahasdzáán bikáa'gi diné t'áá ałtso Bóhólníihii deidísin le', nahasdzáán bikáa'gi kéédahat'íinii t'áá ałtso hats'ąą daasti' le'!

⁹Háálá t'óó hadzoodzíi'go bohoolyaa, áádóó hadzoodzíi'go nahasdzáán niilts'id.

¹⁰Bóhólníihii éí ał'ąą dine'é yindaha'áhígíí t'áadoo náádleełígóó áyósin; ał'ąą dine'é nidahagizgo nitsídaakeesii doo idééłníígóó áyósin.

¹¹Bóhólníihii binahat'a' hool'áágóó hólǫ́; t'áá ałtso oochííłgóó ni'níchį́ bijį́įjį' bijéí biyi'dóó yee yaa nitsíkeesii hool'áágóó hólǫ́.

¹²Ła' dine'é éí Bóhólníihii bidiyin ádayósinii éí bik'idahojidlí, áádóó bíí' danilį́į doo biniyé náyiizláa'ii éí ałdó' bik'idahojidlí!

¹³Yá'ąąshdę́ę́' Bóhólníihii déez'į́į́'; diné t'áá ałtso yinéł'į́;

¹⁴dah sidáádę́ę́' nihokáa'gi kéédahat'íinii t'áá ałtso yinéł'į́,

¹⁵hó lą́ą éí t'áá ałtso dabijéí ádajile', áádóó yaa nidaakaígíí t'áá ałtso baa nitsídzíkees.

¹⁶Aláahgo naat'áanii bisiláo ayóó ánéelą́'ígíí éí doo yee yisdádoogáał da; diné naabaahii t'áá bí ayóó ábóodziilígíí doo yee yisdágháah da.

¹⁷Łį́į́' bee na'abaahii bee yisdáhóót'i'ígíí t'áadoo nánídlíní da, índa łį́į́' ayóo dilwo' nidi, doo ła' yisdáhodoołtéeł da.

¹⁸Shoo, Bóhólníihii deidísinii índa yee aa a'ááh nízinii bee bił chodahoo'íinii éí Bóhólníihii binéł'į́,

¹⁹áko anoonééł bits'ąą bii' naazíinii yisdéídiyoonił áádóó nídahodichįįhgo dahináago áyósin doo.

²⁰Nihii' naazíinii Bóhólníihii yiba' ádaat'é; nihíká análwo'ii índa nihinaage' nilį́.

²¹Áko nihijéí bił nidahoozhǫǫh, háálá bízhi' diyinii baa dadzííníidlí.

²²Bóhólníihii nílíinii, nee nihił chodahoo'ínígíí bik'ehgo nihaa a'ááh nínízinígíí nihik'igi hólǫ́ǫ le'.