Read Navajo PSALMS 37 Bible Online

PSALMS 37 - Navajo bible

PSALMS 37

¹Doo yá'át'ééhgóó ádaaníiłii biniinaa t'áadoo bik'ee ádił náhodílchiłí, doo ákǫ́ǫ́ ádaat'íinii t'áadoo yiníłch'į́dí.

²Háálá éí t'áá hahígo tł'oh bidi'doolzhih nahalingo áádóó ch'il dit'ódí dadínóołnah nahalingo ádooldįįł.

³Bóhólníihii baa dzíínílíigo yá'át'éehgo áánííł; kéyahgi kééhót'į́į doo, áádóó ba'ahódlíigo na'altso' doo.

⁴Áádóó ałdó' Bóhólníihii baa nił nihoozhǫǫh, áko nijéí bee bídin nílíinii neidiyii'aah doo.

⁵Díníyáágóó Bóhólníihii baa diní'aah, áádóó ałdó' baa dzíínílí, áko t'áadoo le'é ná yi'oolíił doo.

⁶T'áá ákogi ánít'éhígíí bee adoodlał nahalingo áyoolíił doo, áádóó ałné'é'áahgo adinídínígíí nahalingo t'áá ákogi ááníłígíí ná bééhózingo áyósin doo.

⁷Bóhólníihii bee háánílyį́į́h, áádóó ha'íínílníigo binahjį' áhodíínílzée'go biba' sínídá; diné t'áá ałtsoní boosánígíí éí doo yá'át'ééhgóó nahagizgo t'áadoo biniinaa ádił náhodílchiłí.

⁸T'áadoo náháchį'í índa hashké nániidzįįhii yóó'adí'aah. T'áadoo ádił náhodílchiłí; éí doo yá'áshónígi ándoolííł.

⁹Háálá doo yá'áshǫ́ǫ́góó ádaaníiłii ádooldįįł, nidi Bóhólníihii yiba' ádaat'éii éí nahasdzáán daabíí' dooleeł.

¹⁰Háálá t'óó nááhodoo'náá'ígo diné doo yá'áshóonii ádin doo; t'áá aaníí, kééhat'į́į́ nít'éé' yę́ęgi hazhó'ó hádííní'į́į́', nidi ádin doo.

¹¹Nidi a'ohgo ádaat'éii nahasdzáán daabíí' dooleeł, áádóó t'áá ałtsoní bee hasht'ehodít'é baa bił nidahoozhǫǫh doo.

¹²Diné doo yá'áshóonii éí diné t'áá ákogi ááníiłii yinahagiz, áádóó yich'į' biwoo' ahíidiłk'ash;

¹³éí Bóhólníihii t'óó haidloh doo, háálá éí bijį́ há nihonít'i' dooígíí bił bééhózin.

¹⁴Badahojoobá'íii índa hojooba' nahas'áanii atídeidoolííł áádóó diné t'áá ákogi ádaaníiłii nideidoołtsił biniyé diné doo yá'ádaashóonii be'ełtįįtł'óól nídeidiłts'ǫ' índa diltłish hadayiiznil.

¹⁵Dabidiltłish dabijéí baa anídadoojił, áádóó bida'ałtį́į́' k'ídahidooltǫǫł.

¹⁶T'óó ahojíyóí doo yá'ádajíshóonii bidziilgo dah da'jílée nidi, diné t'áá ákogi ááníiłii t'įįhdígo dah oolééłjígo agháago yá'át'ééh.

¹⁷Háálá diné doo yá'ádaashóonii yee dabidziilígíí dahidooltǫǫł, nidi Bóhólníihii éí diné t'áá ákogi ádaat'éii naazį́įgo áyósin.

¹⁸T'áá ákogi ádaat'éii bídayéełkaahígíí Bóhólníihii bił bééhózin, áádóó bíí' dadooleełii éí hool'áágóó hólǫ́ǫ doo.

¹⁹Doo yá'áshǫ́ǫ́góó áhooníiłgo doo t'óó baa yáhásinígi ádabidi'doolníił da; dahodichingo yidiiłkáah nidi, hwiih danilį́į doo.

²⁰Nidi diné doo yá'ádaashóonii ádoodįįł; Bóhólníihii bi'ana'í éí dibé yázhí bik'ah nááhániihii nahalingo ádooldįįł; łid nahalingo yóó'ahildóoh doo.

²¹Diné doo yá'áshóonii béeso ba'a'niłgo doo nina'ódlééł át'ée da, nidi diné t'áá ákogi ááníiłii éí bił hadlee' áádóó jooba'.

²²Jó, Bóhólníihii hak'idajidlíii éí nahasdzáán daahóó' dooleeł, nidi Bóhólníihii hóyée'go há hahaasdzíi'ii éí ádazhdoodįįł.

²³Bóhólníihii éí diné nididooltałgóó yiyoołááł, áádóó joogááłgóó Bóhólníihii haa bił hózhǫ́.

²⁴Azhą́ jideezgo' nidi, doo tsé'yaa azhdoogoh da, háálá Bóhólníihii de áhósin.

²⁵Ániid naasháá nít'éé'; k'ad éí hasistih, nidi t'áá ákogi ááníiłii t'ah doo yóó'abi'dit'aahgo yiistséeh da, índa ba'áłchíní t'ah doo bááh yókeedgo yiistséeh da.

²⁶T'áá áłahjį' jooba' áádóó a'iinííł, índa ba'áłchíní bik'idahojidlí.

²⁷Doo yá'ádaashóonii bits'ánínáahgo yá'át'éehgo áánííł, áko hool'áágóó hinínáa doo.

²⁸Háálá Bóhólníihii éí t'áá ákogi ááníiłii ayóó'áyó'ní, áádóó bidiyį́į́' danilíinii doo yóó'iidi'aah da. Hool'áágóó baa áháyą́ą doo, nidi doo yá'áshóonii ba'áłchíní éí ádooldįįł.

²⁹T'áá ákogi ádaaníiłii hool'áágóó kéyah bíí' dadooleeł, áádóó ákwii hool'áágóó kéédahat'į́į doo.

³⁰T'áá ákogi ááníiłii hóyą́ągo yáłti', áádóó doo haada yit'éii yaa yáłti'.

³¹BiDiyin God bibee haz'áanii bijéí bii' hólǫ́; ts'ídá doo ałtánídiighasgóó yigáał doo.

³²Diné doo yá'áshóonii éí t'áá ákogi ááníiłii yizéé' yidoot'įįł yiniyé naayik'íghal.

³³Bóhólníihii éí diné t'áá ákogi ááníiłii éí diné doo yá'áshóonii doo yaa hodidoo'áał da, áádóó aa hwiinít'į́įgi haa náhódóot'įįł biniyé niho'deedlóozgo há nihoot'aahígíí Bóhólníihii doo yee has'ą́ą da.

³⁴Bóhólníihii biba' ánít'é, áádóó bik'eh áhoot'éégóó yínááł, áko kéyah níí' dooleeł biniyé ayóó ánít'éego ándi'doolnííł; doo yá'ádaashóonii ádabi'dooldįįłgo yidííłtsééł.

³⁵Diné doo yá'áshóonii doo ła' jóle' át'éii áádóó tsin dootł'izh sikaadii haníísánígíí nahalingo k'ee'ąą nooséełgo yiiłtsą́.

³⁶Ákondi ákǫ́ǫ́ ch'íníyáá nít'éé'; jó, doo ákwii hojílǫ́ǫ da lá, hahonétą́ą́' nít'éé', háájí shį́į́ dzizlį́į́' lá.

³⁷Diné t'áadoo bee bik'íhót'ahíii hazhó'ó baa ákonínízin doo; t'áá ákogi át'éii níníł'į́; diné ákót'éii ba'áłchíní náás noot'į́įł doo.

³⁸Nidi bee haz'áanii dayiitíihii éí t'áá łahjį' ádooldįįł; diné doo yá'ádaashóonii áho'disdįįdgo doo nidi hwéédahaniih da doo.

³⁹Bóhólníihii bibee yisdá'iildéehii éí t'áá ákogi ádaat'éii yee yisdáhákááh; bich'į' dahodii'náahgo bine' a'niichéehii yá nilį́.

⁴⁰Bóhólníihii éí bíká adoolwołgo yisdábidoonił; diné doo yá'ádaashóonii éí bits'ą́ąjį' yisdábiijááh, háálá hó haa dadzólí.