Read Navajo PSALMS 39 Bible Online

PSALMS 39 - Navajo bible

PSALMS 39

¹Shitsoo' bee doo ádił adeesziihígíí biniyé naasháágóó ádaa áháshyą́ą doo. Diné tsi'nidaakaii shinaagóó nidaakaigo shizaad baa áháshyą́ą doo, dííniid.

²Doo yáshti'góó t'óó hasht'edíínísht'éé nít'éé'; yá'át'éehii nidi doo ła' baa hweeshne' da, nidi t'óó tsé'édinda yínííł sélį́į́'.

³T'áá ádíyi'ídi t'óó ádił ninisdzíiłgo baa nitséskeesii kǫ' diltłi' nahalin silį́į'go índa haasdzíí',

⁴Bóhólníihii nílíinii, ákohgo ashíidoołkáałii índa ákwíí nááshiidoolkáałii shił bééhonísįįh, índa t'óó kónígháníjį' hinishnánígíí shił bééhodoozįįł.

⁵Jó, shíyoołkáałii t'áá díkwíidi yílá bee ni'deelnii' nahalingo shá íinilaa, áádóó hinishná áníłtsooígíí t'áadoo nánídlínígóó baa nitsíníkees. T'áá aaníí, t'ááłáhídi ha'oodzolígíí bíighahgo diné dahiná! Síilah.

⁶T'áá aaníí, t'áadoo le'é bízhdínéeshyęęzhígíí nahalingo diné hiná! T'áá aaníí, t'áadoo biniyéhígóó doo hasht'edadít'ée da. Diné hasht'e'ni'dii'níił łeh, nidi bíí' dooleełii éí doo bił bééhózin da!

⁷K'ad ha'át'íísh biniyé t'ah nisin, Bóhólníihii? Ninahjį' shá chohoo'į́.

⁸Bee haz'áanii híti'ígíí t'áá ałtso bits'ą́ąjį' yisdáshíłteeh. Diné doo ádahalyáanii doo shá nidahałt'i'góó áshílééh!

⁹Doo yáshti' da. Shizéé' doo ąą áháshłéeh da, háálá ni ánít'į́.

¹⁰Atíshíł'ínígíí k'adí, háálá náshiníłts'ingo shi'niniłhį́.

¹¹Doo ákwii át'éii biniinaa diné nidíteehgo atíníł'į́įgo ch'osh ałchozhii ałchozhígíí nahalingo baa bi ł hózhónígíí bits'ą́ą́' ádííłdįįł. T'áá aaníí, diné t'áá ałtso be'iina' t'ááłáhídi ha'oodzolígíí nahalin! Síilah.

¹²Bóhólníihii nílíinii, shisodizin shá diits'į́į́h, áádóó nánooshkąąhígíí shá yíníłts'ą́ą́'! Shinák'eeshto' nínálzhishgo t'áadoo t'óó hasht'edíínít'éhí! Háálá t'óó kónígháníjį' na'ałk'ee sédá, dashizhé'é yę́ę nahalingo dé'éyóní nishłį́.

¹³T'ah doo áníshdin yishłeehdą́ą́', áá sísįįhgo shił hózhǫ́ nídeeshdleeł.