Read Navajo PSALMS 42 Bible Online

PSALMS 42 - Navajo bible

PSALMS 42

¹Bįįh éí tó danílíinii yídin nilínígi át'éego shii' sizíinii nídin nilį́, shiDiyin God.

²Shii' sizíinii éí Diyin God hináanii yíká dibáá' nilį́. Hahgoshą' Diyin God baa deesháałgo bidááhdóó nideeshááł?

³Diné éí, Háájíshą' niDiyin God silį́į́'? áłahjį' dashiłníigo t'áá ákwíí jį́ índa t'áá ákwíí tł'éé' shinák'eeshto' shich'iyą'go t'óó yishcha nít'éé'.

⁴Diné áłah nádleehgo bił naashdeeh yę́ę, Diyin God bikin si'ą́ąjį' ałnánásh'ish yę́ę, diné áłah nilínígíí bił dahózhǫ́ǫgo biinéé' nídididla' yę́ę, ahééh danízingo dahataał yę́ę áádóó hodiyingo áłah ná'ádleehjį' bił ałnánásh'nééh yę́ę, díí béédaashniihgo t'áá íiyisí nich'į' sodiszin.

⁵Shii' sizíinii nílíinii, ha'át'íí lá bąą doo nił hats'íid da? Áádóó ha'át'íí lá bąą ádił nitsééníltłi'? Diyin God bee nił chohoo'į́, háálá shíká análwo'go shił hózhǫ́ǫgo ánáshoodlíłígíí baa nááhásh'niih doo.

⁶ShiDiyin God nílíinii, shii' sizíinii doo bił hóóts'íid da; éí bąą Jórdan tooh binaa nahós'a'dóó Dził Hérman áádóó Dził Máízar sinilídóó nénáshniih dooleeł.

⁷Ayóó íits'a'go nahałtingo tónteel ałch'į' ádaaní áádóó ałkéé' deílk'oołígíí shik'i ch'éhélk'ooł nít'éé'.

⁸Ákondi jį́įgo Bóhólníihii aa a'ááh nízinii yee hadoodzih. Áádóó tł'ée'go Diyin God bich'į' hashtaał doo; Diyin God bee hinishnáanii bich'į' sodiszin doo.

⁹Diyin God, shá tsé bine' na'adzi'ii nilíinii, ábidideeshniił, Ha'át'íísh biniinaa sheisínínah? Ha'át'íísh biniinaa ana'í atídashił'į́įgo bik'ee yishchago tádíshááh?

¹⁰Diltłish deeníinii hats'in néinishish nahalingo atídashił'į́įgo shida'ana'í t'áá áłahjį' shaa daadlohgo ádashiłní, Háájíshą' niDiyin God silį́į́'?

¹¹Shii' sizíinii nílíinii, ha'át'íí lá bąą doo nił hats'íid da? Áádóó ha'át'íí lá bąą ádił nitsééníltłi'? Diyin God bee nił chohoo'į́, háálá shíká análwo'go shił hózhǫ́ǫgo ánáshoodlíłígíí éí shiDiyin God baa nááhásh'niih doo.