Read Navajo PSALMS 44 Bible Online

PSALMS 44 - Navajo bible

PSALMS 44

¹Diyin God nílíinii, t'áá nihí dasidiits'ą́ą́', éí danihizhé'é bídayéełkaah yę́ędą́ą́' baa nisíníyáhígíí yee nihił dahoolne'.

²T'áá ni ał'ąą dine'é kéyah bii'dóó hahinííníłkaad. Áko índa tsin k'izhdííláhígíí nahalingo ákwii nihwíínínil. Ał'ąą dine'é éí bich'į' nidahoyíníłnáá' índa nidine'é k'ee'ąą noot'į́įłgo íinilaa.

³Jó, t'áá bí bidiltłish yee doo kéyah dayoosbą́ą da áádóó doo t'áá bí bigaan yee yisdáákai da. Nidi nigaan nish'náájí áádóó t'áá ni nidziilígíí índa ninii' bits'ádi'nílídígíí bee íínít'įįd. Háálá bich'oniníigo ánít'į́.

⁴Ni lą́ą, aláahgo shinanit'a'í nílį́, shiDiyin God nílíinii. Jéíkab dine'é yisdádookah, diníigo bá hahídziih.

⁵Ninahjį' nihi'ana'í ni'jį' naa'adahoyii'nííł. Anaa' danihił'íinii nízhi' binahjį' bik'i nideiikai.

⁶Háálá shi'ałtį́į́' doo ba'ííníshłíi da índa shidiltłish doo bee deesdzih da.

⁷Nidi nihi'ana'í danilíinii bits'ą́ąjį' yisdánihíínínil áádóó nihik'ee dadiniihii t'óó baa yáhásinígi íinilaa.

⁸Diyin God éí t'áá áłahjį' baa dadzííníidlíigo baa dahwii'niih áádóó hool'áágóó nízhi' baa dahwii'niih doo. Síilah.

⁹Nidi nahjį' kónihiinilaa áádóó doo da'niidlį́į́góó ánihiinilaa, áko nihisiláo t'áadoo bił nisíníbaa' da.

¹⁰Ana'í t'áá bich'į'dóó naníshiijée'go ánihiinilaa. Áádóó danihijoołxáii éí nihinaalye'é yę́ę áłah ádayiilaa.

¹¹Atsį' biniyé dibé nidadootsiłii nidahoniidlingo ánihiinilaa. Índa ał'ąą dine'é bitahgóó tanihiníníłkaad.

¹²Nidine'é niidlíinii t'įįhdígo nihą́ą́h da'ílį́įgo nanihiyíníłnii', áádóó doo lą'í nihą́ą́h ni'iizlį́į' da.

¹³Bił kéédahwiit'íinii bich'į'go bá nahat'i'ii ánihiinilaa. Nihinaagóó kéédahat'íinii nihá nidahałt' i'go índa t'óó nihaa daadlohgo íinilaa.

¹⁴Ał'ąą dine'é bitahgóó t'óó nihee niyá'ádahodilti'go áádóó nihich'į' bitsii' deiłmazgo íinilaa.

¹⁵T'áá áłahjį' doo ił nishłį́į da, áádóó t'óó ádaa yánísdzin shide ádzaa.

¹⁶Háálá shá nidahałt'i'go saad shich'į' adayiiníiłgo dashódziih áádóó ana'í índa k'éédidoo'níiłii biniinaa t'óó ádaa yániisdzį́į́'.

¹⁷Díí t'áá ałtso nihik'ijį' dahéełdas daazlį́į́', nidi doo naa deisii'nah da; nihił aha'díínít'ánígíí t'áadoo doo ákǫ́ǫ́ ádeiilyaa da.

¹⁸Nihijéí biyi'di doo t'ą́ą́' áńdeiidzaa da, índa nik'ehgo áhoot'éii doo bits'áhaakai da,

¹⁹azhą́ mą'ii bitahdi nanihidiníyiish nidi, áádóó anoonééł bichaha'oh nihik'iiniłdoh nidi, t'áadoo kódeiidzaa da.

²⁰NihiDiyin God bízhi' baa deisii'nahgo, doodaii' diyin dabidi'níinii bich'į' dah dadiilnii'go,

²¹da' doósh éí Diyin God bił bééhodoozįįł da? Jó, bí ajéí biyi'di nidanil'inii bił bééhózin?

²²T'áá aaníí, niniinaa shá bíighah nanihi'ditseed; dibé nidootsiłii nidahoniidlingo nihaa nitsáhákees.

²³Bóhólníihii nílíinii, ch'éénídzííd! Ha'át'íísh bąą íłhosh? Nídiidááh! Hool'áágóó nahjį' kónihóólééh lágo!

²⁴Ha'át'íísh bąą nihits'ąą na'ádiníl'in áádóó bee atídanihi'dil'íinii índa bee nihide ádahólzinii baa náyoo'nah?

²⁵Háálá nihii' naazíinii ni'jį' yaa dadínéest'ą́. Índa ni'jį' nihídazhdiiłjéé' nidahoniidlin dasiidlį́į́'.

²⁶Díldzíiłgo nihíká anilyeed! Aa a'ááh nínízinii binahjį' nihik'é niná'nídléego yisdánihínííł.