Read Navajo PSALMS 46 Bible Online

PSALMS 46 - Navajo bible

PSALMS 46

¹Diyin God éí bine' ahiniichéehii áádóó bee danihidziilii nilį́; nihide áhoot'įįhgo t'áá áko nihíká iilwo'ii nilį́.

²Éí bąą azhą́ nahasdzáán łahgo ádzaa nidi, azhą́ tónteel ałníi'di dził adahałtsǫ́ǫ́s nidi, doo nídeiildzid da doo.

³Azhą́ tó ayóó ádeits'a'go ádá hálchį'go bíígháán náádadiidáah nidi, áádóó tó deílk'oołígíí dził bínídazdiiłhałgo nidayiiłnáa nidi, doo nídeiildzid da doo. Síilah.

⁴Tooh léi' nílį́, áádóó bits'ádaazlínígíí Diyin God bikin haal'áadi Aláahgo Ayóó'át'éii kééhat'į́įgi bił hózhǫ́ǫgo áyósin.

⁵Diyin God éí kin haal'áii yił hólǫ́, áádóó doo nahjį' kóbidi'doolníił da. Abíínígo Diyin God bíká adoolwoł.

⁶Ał'ąą dine'é ádéédahooldzííd; ał'ąą dine'é bee bóhólníihgo bił nahaz'ą́ą́góó dah nidaasdááz. Haadzíi'go nahasdzáán dííłhį́į́'.

⁷T'áá ałtsoní bee Bóhólníihii éí nihił hólǫ́. Jéíkab biDiyin God bine' adahiniichééh. Síilah.

⁸Hágo, Bóhólníihii binaanish níníł'į́; nihokáá'góó hóółchxǫ'ígíí níníł'į́.

⁹Nahasdzáán nidanees'ą́ąjį' anaa' dahólóonii ánéísįįd. Ałtį́į́' yiyiitííh; tsiidétáán yiyiiłne'. Tsinaabąąs bijáád naakiígíí iidiyiiłk'ą́ą́h.

¹⁰Hasht'edíínít'é; shí Diyin God nishłį́įgo nił bééhodoozįįł. Ał'ąą dine'é bitahgóó ayóó ánísht'éego áshidi'doolnííł; nahasdzáán bikáa'gi ałdó' ayóó ánísht'éego áshidi'doolnííł.

¹¹T'áá ałtsoní bee Bóhólníihii éí nihił hólǫ́. Jéíkab biDiyin God bine' adahiniichééh. Síilah.